തമിഴ്നാടിന്റെ പുതിയ മുഖ്യമന്ത്രിയായി അധികാരമേറ്റ നടന് വിജയ് യെ അഭിനന്ദിച്ച് മലേഷ്യന് പ്രധാനമന്ത്രി അന്വര് ഇബ്രാഹിം. തമിഴ്നാടും മലേഷ്യയും തമ്മിലുളള ചരിത്രപരവും സാംസ്കാരികവുമായ ബന്ധത്തെ എടുത്തുപറഞ്ഞ അദ്ദേഹം, വിജയ് യെ തന്റെ സുഹൃത്ത് എന്നാണ് അഭിസംബോധന ചെയ്തത്. തമിഴ് ജനതയും മലേഷ്യയും തമ്മിലുളള ദീര്ഘകാല ബന്ധത്തിന്റെ പുതിയ അധ്യായമായി വിജയ് യുടെ രാഷ്ട്രീയ പ്രവേശനത്തെയും വിജയത്തെയും ലോകം ഉറ്റുനോക്കുകയാണെന്ന് അദ്ദേഹം വ്യക്തമാക്കി.
'' കഴിഞ്ഞ കുറെ വര്ഷങ്ങളായി വിജയ് യുടെ ആരാധകര് അദ്ദേഹത്തെ സ്ക്രീനില് കണ്ടുകൊണ്ടിരിക്കുകയാണ്. അഴിമതിക്കാരായ രാഷ്ട്രീയക്കാരെയും വില്ലന്മാരെയും വെറും മൂന്ന് മണിക്കൂറുകള് കൊണ്ട് വിജയ് സിനിമയില് പരാജയപ്പെടുത്തുന്നത് അവര് ആവേശത്തോടെ നോക്കിനിന്നു. എന്നാല് ഇപ്പോള് തമിഴ്നാട്ടിലെ ജനങ്ങള് വിജയ് യെ ഏല്പ്പിച്ചിരിക്കുന്നത് സിനിമയിലെ ഏതൊരു വേഷത്തെക്കാളും വലിയ ഉത്തരവാദിത്തമാണ്'' അന്വര് ഇബ്രാഹിം കുറിച്ചു.
വിജയ് യുടെ സര്ക്കാര് എന്ന സിനിമയിലെ ' ഒരു വിരല് പുരട്ചി' എന്ന ഗാനത്തെ പരാമര്ശിച്ചുകൊണ്ട് ആ വിപ്ലവം ഇപ്പോള് ചരിത്രം സൃഷ്ടിക്കാന് ഒരുങ്ങി നില്ക്കുകയാണെന്ന് അദ്ദേഹം പറഞ്ഞു. തമിഴ്നാടും മലേഷ്യയും തമ്മില് തലമുറകളായി നിലനില്ക്കുന്ന സാംസ്കാരികവും വൈകാരികവുമായ ബന്ധം വരും വര്ഷങ്ങളില് കൂടുതല് ശക്തിപ്പെടുത്താന് മുഖ്യമന്ത്രി വിജയിക്കൊപ്പം ചേര്ന്ന് പ്രവര്ത്തിക്കാന് താന് ആഗ്രഹിക്കുന്നുവെന്നും അദ്ദേഹം വ്യക്തമാക്കി.
ഞായറാഴ്ചയായിരുന്നു വിജയ് തമിഴ്നാട് മുഖ്യമന്ത്രിയായി സത്യപ്രതിജ്ഞ ചെയ്തത്. വിജയ്ക്ക് ഒപ്പം ഒമ്പത് മന്ത്രിമാരും സത്യപ്രതിജ്ഞ ചെയ്തു.
തമിഴ്നാട്ടിലെ 234 അംഗ നിയമസഭയില് 108 സീറ്റുകള് നേടിയാണ് വിജയ് യുടെ ടിവികെ ഏറ്റവും വലിയ ഒറ്റക്കക്ഷിയായത്. എന്നാല്, കേവല ഭൂരിപക്ഷത്തിന് 118 അംഗങ്ങളുടെ പിന്തുണ ഉറപ്പാക്കേണ്ടിയിരുന്നു. രണ്ട് സീറ്റുകളില് നിന്ന് ജയിച്ച വിജയ്ക്ക് ഒരു സീറ്റ് രാജിവയ്ക്കേണ്ടിവരും. അപ്പോള് ടിവികെയുടെ നമ്പര് 107 ആയി ചുരുങ്ങും. അഞ്ച് സീറ്റുകളുളള കോണ്ഗ്രസ് ഡിഎംകെ പാളയം വിട്ട് ടിവികെയ്ക്ക് പിന്തുണ നല്കി. എന്നാല്, ഡിഎംകെ നേതാവ് സ്റ്റാലിന്റെ പരോക്ഷ പിന്തുണയോടെ രണ്ട് വീതം സീറ്റുകള് ഉളള സിപിഎം, സിപിഐ, മുസ്ലീംലീഗ് എന്നിവരും വിജയ്ക്ക് പിന്തുണ നല്കിയതോടെയാണ് സര്ക്കാര് രൂപീകരണം യാഥാര്ത്ഥ്യമായത്.
