വൈറ്റ് ബോൾ ക്രിക്കറ്റിൽ മാരക ഫോമിലാണ് മലയാളിതാരം സഞ്ജു സാംസൺ. ഇന്ത്യയുടെ മിന്നും താരമായ സഞ്ജു, ഇന്ത്യയുടെ ട്വന്റി 20 ലോകകപ്പ് വിജയത്തിൽ നിർണായക പങ്കുവഹിച്ച് ടൂർണമെന്റിലെ താരമായും തെരഞ്ഞെടുക്കപ്പെട്ടിരുന്നു. ടി 20 ലോകകപ്പിലെ ഉജ്ജ്വല പ്രകടനത്തിന് പിന്നാലെ ഐപിഎല്ലിലും ഫോം ഒട്ടും ചോർന്നിട്ടില്ലെന്നും താരം തെളിയിച്ചു. സിഎസ്കെയുടെ പ്രിയപ്പെട്ട ‘ചേട്ടനായി’ താരം മാറിക്കഴിഞ്ഞു.
ഇപ്പോഴിതാ ചെന്നൈ സൂപ്പർ കിങ്സിന്റെ മഞ്ഞക്കുപ്പായമണിഞ്ഞ് ബീച്ച് ക്രിക്കറ്റിൽ പങ്കെടുക്കുന്ന സഞ്ജുവിന്റെ വീഡിയോയാണ് സോഷ്യൽ മീഡിയയിൽ നിറയുന്നത്. സുരക്ഷാ ജീവനക്കാരോ ബൗണ്സർമാരോ ഇല്ലാതെയാണ് താരം ബീച്ചിലേക്ക് എത്തിയത്. താര പരിവേഷമെല്ലാം മാറ്റിവെച്ച്, തങ്ങളുടെ കൂട്ടത്തിലൊരാളായി സഞ്ജു എത്തിയപ്പോള് ആരാധകർക്ക് അവരുടെ കണ്ണുകളെ വിശ്വസിക്കാൻ കഴിഞ്ഞില്ല. താരം ചെന്നൈ ആരാധകരുമായി പെട്ടെന്ന് അടുത്തു, ഇടപഴകി, ഷേക്ക്ഹാന്ഡ് ചെയ്തു സംസാരിച്ചു.
പിന്നീടവരില് ഒരാളായി അവരോടൊപ്പം ക്രിക്കറ്റ് കളിക്കാനും തീരുമാനിച്ചു. ചെന്നൈ ഓപ്പണര് വലംകൈയ്യൻ ബാറ്ററായ സഞ്ജു, ഇടംകൈയ്യനായാണ് ബീച്ചില് ബാറ്റ് ചെയ്തത്. ആരാധകര്ക്കതും അക്ഷരാർത്ഥത്തില് ഞെട്ടലായിരുന്നു. അതില്ത്തന്നെ പറത്തിയതൊക്കെയും സിക്സറുകള് കൂടിയായപ്പോള് ആരാധകര് ആവേശത്തോടെയത് ഏറ്റെടുത്തു. ആരാധകരുമായി തമാശകള് പങ്കുവെച്ചും ഒന്നിച്ച് ചിരിച്ചും സഞ്ജു സമയം ചിലവഴിച്ചതിന്റെ വീഡിയോയും സഞ്ജുവിന്റെ സർപ്രൈസ് എൻട്രിയും വളരെ പെട്ടെന്നാണ് വൈറലായി മാറിയത്.
ചെന്നൈ ടീമിനായി ഒരു മത്സരം പോലും കളിക്കുന്നതിന് മുൻപ് തന്നെ അവിടുത്തെ ആരാധകരിൽ നിന്നും ലഭിച്ച അവിശ്വസനീയമായ സ്നേഹത്തെക്കുറിച്ച് സഞ്ജു അടുത്തിടെ മനസ്സ് തുറന്നിരുന്നു. ചെന്നൈ സൂപ്പർ കിങ്സിന്റെ ഔദ്യോഗിക പോഡ്കാസ്റ്റിലാണ് താരം ഇക്കാര്യം പങ്കുവെച്ചത്.
‘‘ട്രേഡിംഗ് ചർച്ചകള് നടക്കുന്ന സമയത്ത്, ഞാൻ ചെന്നൈയിലേക്ക് വരുമെന്ന വാർത്തകള് വന്നിരുന്നു. ആ സമയം മുതല് തന്നെ ചെന്നൈ ആരാധകരില് നിന്നും വലിയ സ്നേഹമാണ് കിട്ടിക്കൊണ്ടിരുന്നത്. ചെന്നൈയില് വരുമ്പോഴോ അല്ലെങ്കില് അവിടുത്തെ ആളുകളെ കാണുമ്പോഴോ അവരെന്നെ അടുത്ത് വിളിച്ച് ‘ഹേയ് സഞ്ജു, സിഎസ്കെയിലേക്ക് വരൂ’ എന്ന് പറയുമായിരുന്നു. ഇപ്പോള് അവർക്കായി കളിക്കുമ്പോള് വലിയ ഉത്തരവാദിത്തം തോന്നുന്നുണ്ട്. ചെന്നൈ ആരാധകർക്ക് മുന്നില് കളിക്കുമ്പോള് തെറ്റുകള് വരുത്താൻ തോന്നില്ല. ഒരു ഷോട്ട് കളിക്കുന്നതിന് മുൻപ് ഞാൻ രണ്ടുതവണ ചിന്തിക്കും. അത്രമാത്രം ഉത്തരവാദിത്തമുള്ളവനായി ഞാൻ മാറി...’’ എന്നാണ് സഞ്ജു പറഞ്ഞത്. 11 മത്സരങ്ങളില് നിന്നായി 430 റണ്സ് നേടിയ സഞ്ജുവാണ് ടീമിന്റെ ടോപ്പ് സ്കോറർ. രണ്ട് സെഞ്ചുറികള് ഇതിനോടകം താരം നേടിക്കഴിഞ്ഞു. ചെന്നൈ ആരാധകർ നല്കുന്ന പിന്തുണ തന്നെ കൂടുതല് ഉത്തരവാദിത്തമുള്ള കളിക്കാരനാക്കിയെന്ന് സഞ്ജു അവരോടു പറഞ്ഞിരുന്നു.
