കേരളത്തിന്റെ പുതിയ മുഖ്യമന്ത്രിയായി തിരഞ്ഞെടുക്കപ്പെട്ട വി.ഡി. സതീശന് വേറിട്ട ശൈലിയിൽ ആശംസകൾ നേർന്ന് പ്രശസ്ത നടനും സംവിധായകനുമായ ബാലചന്ദ്രമേനോൻ. തന്റെ ഏറ്റവും പുതിയ ചിത്രമായ 'പ്രതിച്ഛായ'യിലെ മുഖ്യമന്ത്രി കഥാപാത്രത്തെ മുൻനിർത്തി, തികച്ചും സിനിമാറ്റിക് ആയൊരു കുറിപ്പിലൂടെയാണ് അദ്ദേഹം നിയുക്ത മുഖ്യമന്ത്രിയെയും പുതിയ മന്ത്രിസഭയെയും അഭിനന്ദിച്ചത്.
ഡൽഹിയിലെ നീണ്ട ചർച്ചകൾക്കൊടുവിൽ വി.ഡി. സതീശനെ മുഖ്യമന്ത്രിയായി പ്രഖ്യാപിച്ചതുവരെയുള്ള രാഷ്ട്രീയ നാടകീയതകളെ തന്റെ ഫേസ്ബുക്ക് കുറിപ്പിൽ ബാലചന്ദ്രമേനോൻ ഓർത്തെടുക്കുന്നുണ്ട്. സിനിമയില് മുഖ്യമന്ത്രിയായപ്പോള് തനിക്ക് ലഭിച്ച നാടകീയമായ സൗകര്യങ്ങള്ക്കും അനുഭവങ്ങള്ക്കും മലയാള സിനിമയോട് അദ്ദേഹം നന്ദി പറയുകയും ചെയ്തു. തിങ്കളാഴ്ച സത്യപ്രതിജ്ഞക്കു തയാറെടുക്കുന്ന നിയുക്ത മുഖ്യമന്ത്രി വി ഡി സതീശനും മറ്റു മന്ത്രിസഭാംഗങ്ങള്ക്കും പ്രതിച്ഛായയിലെ മുഖ്യന് വര്ഗീസ് വക ഒരു സിനിമാറ്റിക് ബിഗ് സല്യൂട്ട് എന്നും ബാലചന്ദ്രമേനോന് കുറിച്ചു.
ഫെയ്സ്ബുക്ക് കുറിപ്പിന്റെ പൂര്ണരൂപം
അങ്ങിനെ നമുക്ക് ഒരു പുതിയ മുഖ്യമന്ത്രിയെ കിട്ടി .ശ്രീ .വി. ഡി .സതീശൻ !എന്റെ ഹാർദ്ദമായ അഭിനന്ദനങ്ങളും ആശംസകളും !!ചരിത്രപരമായി പറഞ്ഞാൽ , കേരള സംസ്ഥാനത്തിന്റെ 13 മത്തെ മുഖ്യമന്ത്രിയാണ് അദ്ദേഹം. തെരഞ്ഞെടുപ്പ പ്രചാരണ വേളയിൽ എപ്പോഴോ ഒരിക്കൽ 'ജനവിധി പ്രതികൂലമായാൽ ഞാൻ വനവാസത്തിനു പോകും ' എന്ന് സതീശൻ പറഞ്ഞത് ലേശം അതിരു കടന്നുപോയോ എന്ന് പലരും സംശയിച്ചു . എന്നാൽ ഫലം വന്നുകഴിഞ്ഞപ്പോൾ 'വനവാസത്തിനു പോകണ്ട ; പട്ടാഭിഷേകത്തിനു തയ്യാറായി വന്നാട്ടെ ' എന്ന് മുറവിളി കൊട്ടി അണികൾ ആഹ്ലാദിച്ചു ...
അതാണ് സതീശൻ !
എന്നാൽ ഒന്ന് പറയാം ...മുഖ്യമന്ത്രി പദവിക്ക് ഇത്തരത്തിൽ ഒരു മത്സരം മുൻപുണ്ടായിട്ടുണ്ടോ എന്ന് സംശയം ......പറഞ്ഞാൽ കെ . സി . വേണുഗോപാലും, രമേശ് ചെന്നിത്തലയും, വി.ഡി. സതീശനും അവരുടേതായ നിലയിൽ ലബ്ധപ്രതിഷ്oർ തന്നെ എന്ന് പറയാം ..അത് ഹൈകമാന്റിനെയും വല്ലാതെ ബുദ്ധിമുട്ടിച്ചു . നീണ്ട പത്തു ദിവസങ്ങൾ !! .....സമഗ്രമായ ചർച്ചകൾ ...കൂടിക്കാഴ്ചകൾ .....മാധ്യമങ്ങൾ ഓരോ ദിവസവും ഓരോരുത്തരെ വിജയികളായി സംശയിപ്പിച്ചു ...അണികൾ അക്ഷരാർത്ഥത്തിൽ വിഷമവൃത്തത്തിലായി . ...
അവർ കണ്ണിൽ എണ്ണയൊഴിച്ചു കാത്തു നിന്നു .
എപ്പോഴാണ് ആ 'വെളുത്ത പുക " ഡൽഹിയിൽ പൊന്തി കാണുക എന്ന് കാത്തിരുന്ന ദിനങ്ങൾ . . ക്ഷമ നശിച്ച ചില ആരാധകർ മണ്ണെണ്ണ ഒഴിച്ച് ആത്മാഹൂതിക്കു വരെ തുനിഞ്ഞു ... ഇതിനിടയിൽ, എന്തെന്തു പ്രകടനങ്ങൾ......മുദ്രാവാക്യങ്ങൾ . .... ഫ്ളക്സ് തോരണങ്ങൾ .... കരി ഓയിൽ പ്രയോഗങ്ങൾ . ...ഒരു മുഖ്യമന്ത്രിയുടെ ഇരിപ്പിടത്തിലേക്കു ഇത്രയും പടികൾ കയറണമെന്നുണ്ടോ ???
അടുത്തിടെയാണ് എനിക്ക് 'പ്രതിച്ഛായ ' എന്ന ചിത്രത്തിൽ ഒരു മുഖ്യമന്ത്രിയുടെ വേഷം അവതരിപ്പിക്കാനുള്ള അവസരം കിട്ടിയത് . JIO HOTSTAR എന്ന OTT ചാനലിൽ കൂടി വന്നപ്പോൾ, എന്റെ പ്രിയപ്പെട്ട കുടുംബസദസ്സുകൾ ആ ചിത്രം കാണുകയും, 'വർഗ്ഗീസ്' എന്ന മുഖ്യമന്ത്രിയെ പറ്റിയുള്ള അവരുടെ അഭിനന്ദനം എന്നെ അറിയിക്കുകയും ചെയ്യുന്നു ...
ഷൂട്ടിംഗ് ദിനങ്ങളിൽ ഒരു മുഖ്യന്റെ 'കെട്ടിലും മട്ടിലും' എല്ലാ സൗകര്യങ്ങളും സൗഭാഗ്യങ്ങളും ഞാൻ ആസ്വദിച്ചു. സ്റ്റേറ്റ് കാർ , ഓർഡർലി ,പോലീസ് സന്നാഹം അങ്ങിനെ എല്ലാം ...ഇവിടെ, സമരങ്ങളും ജാഥകളും പദയാത്രകളും ഒക്കെ നടത്തി രാഷ്ട്രീയ നേതാക്കൾ നേടി എടുക്കുന്ന ഈ മുഖ്യമന്ത്രി പദവി , യൂണിറ്റിലെ അംഗങ്ങളുടെ സ്നേഹവാത്സല്യത്തോടെ ക്യാമറക്കു മുന്നിൽ 'സുഖകരമായി ' ആവിഷ്ക്കരിക്കാൻ എനിക്ക് കഴിഞ്ഞു .
വിയർത്താൽ എയർ കൂളർ റെഡി, വല്ലാതെ ഉഷ്ണം തോന്നിയാൽ 'കാരവാ'നിലെ എയർ കണ്ടീഷൻ ലോകം വേറെ.. ചുരുക്കിപ്പറഞ്ഞാൽ ഒരു മുഖ്യമന്ത്രിയുടെ എല്ലാ സ്നേഹവും ആദരവും എനിക്ക് സുലഭമായി ലഭിച്ച രാജകീയതക്കു, ഞാൻ 'മലയാള സിനിമക്കു' നന്ദി പറയുന്നു !
വരുന്ന തിങ്കളാഴ്ച സത്യപ്രതിജ്ഞക്കു തയ്യാറെടുക്കുന്ന നിമുക്ത മുഖ്യമന്ത്രി ശ്രീ വി . ഡി . സതീശനും മറ്റു മന്ത്രിസഭാഗങ്ങൾക്കും 'പ്രതിച്ഛായ' യിലെ മുഖ്യൻ
ശ്രീ വർഗീസ് വക ഒരു "സിനിമാറ്റിക് ബിഗ് സല്യൂട്ട്
