തിരുവനന്തപുരം: മുഖ്യമന്ത്രി വി.ഡി. സതീശന് ആശംസകളുമായി കന്നി തെരഞ്ഞെടുപ്പ് വിജയത്തിലെ എതിരാളി. തേവര എസ്.എച്ച് കോളജിലെ യൂണിയന് തെരഞ്ഞെടുപ്പില് സതീശന് പരാജയപ്പെടുത്തിയ എസ്.എഫ്.ഐ. സ്ഥാനാര്ഥി കെ.എം. മോഹന്ദാസാണ് മുഖ്യമന്ത്രിക്ക് ആശംസകള് നേര്ന്നത്.
'ദാഹനീരായ്, പ്രാണവായുവായ് ഞങ്ങളുണ്ടാകും'... നാലര പതിറ്റാണ്ട് മുന്പ് കോളജ് യൂണിയന് തെരഞ്ഞെടുപ്പില് തേവര എസ്.എച്ച്. കോളജിലെ ക്ലാസ് മുറികളില് ഒരു പൊടിമീശക്കാരന് വിദ്യാര്ഥിയുടെ പ്രസംഗം മുഴങ്ങി. കെ.എസ്.യു-കെ.എസ്.സി. സഖ്യത്തെ നിലപാടില്ലാത്ത വെള്ളം പോലെയാണെന്നു പരിഹസിച്ച എസ്.എഫ്.ഐക്കുള്ള മറുപടിയുമായി ക്യാമ്പസില് നിറഞ്ഞത് കെ.എസ്.യു. സ്ഥാനാര്ഥി വി.ഡി. സതീശനായിരുന്നു. തേവര കോളജിലെ പ്രീഡിഗ്രി പഠന കാലത്താണ് 1980-ലെ തെരഞ്ഞെടുപ്പില് എസ്.എഫ്.ഐയിലെ കെ.എം. മോഹന്ദാസിനെ സതീശന് പരാജയപ്പെടുത്തിയത്. തന്നെ പരാജയപ്പെടുത്തി തെരഞ്ഞെടുപ്പ് രാഷ്ട്രീയത്തില് ആദ്യ ചുവടുവച്ച ആള് മുഖ്യമന്ത്രിയാകുമ്പോള് അതിന്റെ കൗതുകവും സന്തോഷവും പനങ്ങാട് സ്വദേശി മോഹന്ദാസിനുണ്ട്.
1979 -81 കാലത്തെ പ്രീഡിഗ്രി പഠന നാളുകള് മോഹന്ദാസിന്റെ മനസ്സില് നിറമുള്ള ഓര്മകളാണ്. പ്രീഡിഗ്രി ആദ്യ വര്ഷക്കാരുടെ പ്രതിനിധിയായി തെരഞ്ഞെടുപ്പില് മോഹന്ദാസ് വിജയിച്ചു. തുടര്ന്ന് രണ്ടാം വര്ഷവും എസ്.എഫ്.ഐ. സ്ഥാനാര്ഥിയായി. അത്തവണ കെ.എസ്.യു. സ്ഥാനാര്ഥിയായത് വി.ഡി. സതീശനായിരുന്നു. മോഹന്ദാസ് ക്ലാസില് പ്രസംഗിച്ചത് ഇങ്ങനെയാണ്, 'ഞങ്ങള്ക്കെതിരേ കെ.എസ്.യു -കെ.എസ്.സി. കൂട്ടുകെട്ടാണു മത്സരിക്കുന്നത്. ഹൈഡ്രജനും ഓക്സിജനും ചേര്ന്ന് വെള്ളം പോലെ നിറമോ മണമോ രൂപമോ ഇല്ലാത്ത അവസ്ഥയാണ്. ഞങ്ങള്ക്ക് വ്യക്തമായ നയങ്ങളുണ്ട്, ഉറച്ച അഭിപ്രായങ്ങളുണ്ട്'.
ഉടനെത്തി സതീശന്റെ മറുപടി, 'ഞങ്ങള് ഹൈഡ്രജനും ഓക്സിജനും ചേര്ന്ന വെള്ളം പോലുള്ള മുന്നണി ആണെന്ന് നിങ്ങളോട് വോട്ട് ചോദിച്ച് മോഹന്ദാസ് പറയുകയുണ്ടായല്ലോ. ശരിയാണ്, ഓര്ത്തു നോക്കൂ, ഓക്സിജനും വെള്ളവുമില്ലാതെ ഇവിടെ ജീവിക്കാനാകുമോ? ഞങ്ങളുടെ മുന്നണിയെ വിജയിപ്പിച്ചാല് നിങ്ങളുടെ ദാഹനീരായ്, പ്രാണവായുവായി ഞങ്ങള് ഒപ്പമുണ്ടാകും'.
തെരഞ്ഞെടുപ്പ് ഫലം പ്രഖ്യാപിച്ചപ്പോള് മാഗസിന് എഡിറ്റര്, യൂണിയന് കൗണ്സിലര് ഒഴിച്ച് ബാക്കി എല്ലാ സീറ്റിലും കെ.എസ്.യു-കെ.എസ്.സി. സഖ്യം വിജയിച്ചു, സതീശന് ആദ്യ തെരഞ്ഞെടുപ്പ് വിജയം. തുടര്ന്ന് രാഷ്ട്രീയത്തില് അദ്ദേഹം പടിപടിയായി ഉയര്ന്നു. സജീവ രാഷ്ട്രീയത്തില് നിന്നു മാറിയ മോഹന്ദാസ് ഇപ്പോള് പെയിന്റിങ് തൊഴിലാളിയാണ്. ലോകം മുഴുവന് അറിയപ്പെടുന്ന നേതാവായി ഉയരട്ടെ എന്ന ആശംസയാണ് ആദ്യ എതിരാളി മുഖ്യമന്ത്രിക്കു നല്കുന്നത്.
