അമേരിക്കയിലെ ബെവര്ലി ഹില്സിലുള്ള 'പോസ' എന്ന പ്രമുഖ റെസ്റ്റോറന്റില് ജന്മദിനാഘോഷത്തിന് കൊണ്ടുവന്ന കേക്ക് മുറിച്ചു നല്കിയതിന് വന് തുക സര്വീസ് ചാര്ജ് ഈടാക്കിയ സംഭവം സോഷ്യല് മീഡിയയില് വലിയ വിവാദമാകുന്നു. ആഘോഷത്തില് പങ്കെടുത്ത 11 പേര്ക്കായി ഒരാള്ക്ക് 10 ഡോളര് വീതം കണക്കാക്കി 'കേക്ക് കട്ടിങ് ഫീ' ഇനത്തില് മാത്രം 110 ഡോളറാണ് (ഏകദേശം 10,650 രൂപ) റെസ്റ്റോറന്റ് ബില്ലില് ചേര്ത്തത്. ഒരു പ്രമുഖ ഫുഡ് ഇന്ഫ്ലുവന്സര് തനിക്ക് ലഭിച്ച ഭീമമായ ഈ ബില്ലിന്റെ ദൃശ്യങ്ങള് ഇന്സ്റ്റാഗ്രാമിലൂടെ പങ്കുവെച്ചതോടെയാണ് സംഭവം പുറംലോകമറിഞ്ഞതും വലിയ രീതിയിലുള്ള വിമര്ശനങ്ങള്ക്ക് വഴിവെച്ചതും. ആകെ കഴിച്ച ഭക്ഷണത്തിന്റെ ബില് തുക ഒരു ലക്ഷത്തോളം രൂപ കടന്നതിന് പിന്നാലെയാണ് ഈ അധിക നിരക്ക് ഇവരുടെ ശ്രദ്ധയില്പ്പെട്ടത്.
മൂന്ന് ലക്ഷത്തിലധികം ആളുകള് കണ്ട ഈ വീഡിയോയ്ക്ക് താഴെ ഉപഭോക്താക്കളും ഹോട്ടല് അനുകൂലികളും തമ്മില് വലിയ വാദപ്രതിവാദങ്ങളാണ് നടക്കുന്നത്. ഉയര്ന്ന നിലവാരമുള്ള ഹോട്ടലുകളില് പുറത്തുനിന്നുള്ള ഭക്ഷണസാധനങ്ങള് കൊണ്ടുവരുമ്പോള് ഇത്തരം നിരക്കുകള് ഈടാക്കാറുണ്ടെന്ന് ചിലര് റെസ്റ്റോറന്റിനെ പിന്തുണച്ചപ്പോള്, കേക്ക് മുറിക്കുന്നതിന് മുന്പ് ഈ ചാര്ജിനെക്കുറിച്ച് ഉപഭോക്താക്കളെ കൃത്യമായി അറിയിക്കാത്തതാണ് വലിയ വീഴ്ചയെന്ന് ഭൂരിഭാഗം പേരും ചൂണ്ടിക്കാട്ടി. 'വെറുമൊരു കത്തി കൊണ്ട് കേക്ക് മുറിച്ചതിന് പതിനായിരത്തിലധികം രൂപ വാങ്ങുന്നത് ശുദ്ധ ഭ്രാന്താണ്' എന്ന രീതിയിലുള്ള കടുത്ത പ്രതികരണങ്ങളാണ് സോഷ്യല് മീഡിയയില് ഉയര്ന്നത്.
വിഷയം വലിയ ചര്ച്ചയായതോടെ വിശദീകരണവുമായി റെസ്റ്റോറന്റ് അധികൃതര് തന്നെ നേരിട്ട് രംഗത്തെത്തിയിട്ടുണ്ട്. ഈ തുകയെക്കുറിച്ച് ഉപഭോക്താവിനെ മുന്കൂട്ടി അറിയിക്കാന് സാധിക്കാത്തതില് പരസ്യമായി ഖേദപ്രകടനം നടത്തിയ മാനേജ്മെന്റ്, ഈടാക്കിയ തുക പൂര്ണ്ണമായി റീഫണ്ട് ചെയ്യാന് തയ്യാറാണെന്നും അറിയിച്ചു. ഒപ്പം മികച്ചൊരു ഭക്ഷണാനുഭവത്തിനായി ഇവരെ വീണ്ടും റെസ്റ്റോറന്റിലേക്ക് ക്ഷണിക്കുകയും ചെയ്തു. വിമര്ശനങ്ങള് ശക്തമായ പശ്ചാത്തലത്തില്, പുറത്തുനിന്ന് കൊണ്ടുവരുന്ന കേക്ക് മുറിക്കുന്നതിനായി ഈടാക്കിയിരുന്ന നിരക്ക് ഒരാള്ക്ക് 10 ഡോളര് എന്നതില് നിന്നും 5 ഡോളറായി പകുതിയാക്കി കുറച്ചതായും റെസ്റ്റോറന്റ് മാനേജ്മെന്റ് വ്യക്തമാക്കി.
