ലോകത്തിലെ ഏറ്റവും വലിയ ബഹിരാകാശ ഏജന്സിയായ നാസയുടെ ഔദ്യോഗിക വെബ്സൈറ്റിലെ അക്ഷരതെറ്റ് ചൂണ്ടിക്കാട്ടി എട്ടുവയസുകാരന് സോഷ്യല് മീഡിയയില് താരമാകുന്നു. മകന്റെ കണ്ടെത്തല് 'ഒരു ക്രിട്ടിക്കല് മിഷന് അപ്ഡേറ്റ്' ആണെന്ന് വിശേഷിപ്പിച്ചുകൊണ്ട് പിതാവ് എക്സില് പങ്കുവെച്ച പോസ്റ്റിലൂടെയാണ് ഈ വിവരം പുറത്തറിഞ്ഞത്. റോക്കറ്റ് വിക്ഷേപണങ്ങളുടെ വലിയൊരു ആരാധകനായ ഈ കൊച്ചുമിടുക്കന്റെ നിരീക്ഷണപാടവം നിമിഷനേരം കൊണ്ടാണ് തരംഗമായത്.
കുട്ടിയുടെ തിരുത്തല് ശ്രദ്ധയില്പ്പെട്ട ഉടന് തന്നെ നാസ ഔദ്യോഗികമായി മറുപടിയുമായി രംഗത്തെത്തി. 'കാണാതായ അക്ഷരം വെബ്സൈറ്റില് തിരികെ കൊണ്ടുവരാന് ഞങ്ങള് ദൗത്യം ആരംഭിച്ചു' എന്നായിരുന്നു നാസയുടെ രസകരമായ മറുപടി. നാസയുടെ ഈ പ്രതികരണം മകനെ ഏറെ സന്തോഷിപ്പിച്ചെന്നും, ഭാവിയില് ഒരു 'അപ്സൈഡ് ഡൗണ് അസ്ട്രോണറ്റ്' ആകാന് ആഗ്രഹിക്കുന്ന അവന് സ്കൂളിലെ കൂട്ടുകാരോട് പറയാന് വലിയൊരു കഥയായി ഇത മാറിയെന്നും പിതാവ് കൂട്ടിച്ചേര്ത്തു.
നാസയും കുട്ടിയും തമ്മിലുള്ള ഈ കൗതുകകരമായ സംവാദം സോഷ്യല് മീഡിയയില് ഇതിനകം വൈറലായിക്കഴിഞ്ഞു. നിരവധി പേരാണ് കുട്ടിയുടെ അസാധാരണമായ ശ്രദ്ധയെയും ബുദ്ധിശക്തിയെയും അഭിനന്ദിച്ചുകൊണ്ട് രംഗത്തെത്തുന്നത്. ഭാവിയില് ഇവന് ചൊവ്വയിലെ മനുഷ്യവാസ കേന്ദ്രങ്ങള് വരെ നിയന്ത്രിക്കുന്ന വലിയൊരു ശാസ്ത്രജ്ഞനായി വളരുമെന്നാണ് സോഷ്യല് മീഡിയയിലെ ഭൂരിഭാഗം ആളുകളുടെയും പ്രവചനം.
