അഞ്ച് പതിറ്റാണ്ടോളമായി മലയാളസിനിമയുടെ ദൃശ്യവിസ്മയമായി തിളങ്ങി നില്ക്കുന്ന താരമാണ് മോഹന്ലാല്. ഭാവപ്പകര്ച്ചകളുടെ വിസ്മയഗോപുരം തീര്ത്ത് ലോകമെമ്പാടുമുള്ള മലയാളി പ്രേക്ഷകരുടെ ഹൃദയം കീഴടക്കിയ, ഇന്ത്യന് സിനിമയുടെ അഭിമാനമായി മാറിയ മഹാപ്രതിഭയാണ് മോഹന്ലാല്. വില്ലന് കഥാപാത്രത്തില് തുടങ്ങി, നായകന്റെ സിംഹാസനത്തില് ഇരിപ്പുറപ്പിച്ച്, അവിടെ നിന്ന് അഭിനയത്തിന്റെ കുലപതിയായി മാറിയ താരമാണ് മോഹന്ലാല്.
ഇക്കഴിഞ്ഞ ദിവസമാണ് 66-ാം ജന്മദിനം ആഘോഷിച്ചത്. മലയാളികള് ആകാംക്ഷയോടെ കാത്തിരുന്ന ദൃശ്യം 3 എന്ന സിനിമയും പ്രേക്ഷകരുടെ മുന്നിലേക്ക് എത്തിയതും ഇന്നലെയായിരുന്നു. ലോകമെമ്പാടുമുള്ള മലയാളികള് തങ്ങളുടെ പ്രിയതാരത്തിന്റെ ജന്മദിനവും ‘ദൃശ്യം 3’ന്റെ റിലീസും മലയാളികള് ആഘോഷമാക്കിയിരുന്നു. മികച്ച പ്രതികരണം ലഭിക്കുന്ന സിനിമ തങ്ങളുടെ സ്വന്തം ലാലേട്ടന്റെ ജന്മദിനത്തില് തന്നെയെത്തിയത് പ്രേക്ഷകര്ക്ക് ഇരട്ടിമധുരമായി മാറി. സഹതാരങ്ങളും സുഹൃത്തുക്കളും ആരാധകരുമടക്കം നിരവധി പേരാണ് താരത്തിന്റെ ജന്മദിനത്തില് ആശംസകളും സ്നേഹവും പങ്കിട്ടത്.
ഇപ്പോഴിതാ തന്റെ ജന്മദിനത്തില് ആശംസ അറിയിച്ചവര്ക്കും സ്നേഹമറിയിച്ചവര്ക്കും നന്ദി കുറിക്കുകയാണ് മോഹന്ലാല്. ഓരോ ആഗ്രഹവും, ഓരോ പ്രാർത്ഥനയും, ഹൃദയംഗമമായ ഓരോ സന്ദേശവും തന്റെ ഹൃദയത്തെ അതിരറ്റ നന്ദിയാൽ നിറച്ചിരിക്കുന്നുവെന്നും ഇന്നത്തെ ദിവസം ഇത്ര സവിശേഷമാക്കിയതിന് നന്ദിയെന്നുമാണ് താരം കുറിച്ചത്.
‘‘ഇന്ന് ഉണര്ന്നത് സ്നേഹത്തിന്റെ ഒരു സമുദ്രത്തിലേക്കാണ്, അതെന്നെ വളരെയധികം സ്പർശിച്ചു. ഓരോ ആഗ്രഹവും, ഓരോ പ്രാർത്ഥനയും, ഹൃദയംഗമമായ ഓരോ സന്ദേശവും എന്റെ ഹൃദയത്തെ അതിരറ്റ നന്ദിയാൽ നിറച്ചിരിക്കുന്നു. ഇതുപോലുള്ള നിമിഷങ്ങളാണ് എനിക്ക് ചുറ്റും ഇത്രയും ഊഷ്മളതയും ദയയും ഉള്ളത് എത്ര ഭാഗ്യമാണെന്ന് എന്നെ ഓർമ്മിപ്പിക്കുന്നത്. എന്റെ യാത്രയിലെ മനോഹരമായ ഒരു ഭാഗമായതിനും ഇന്നത്തെ ദിവസം ഇത്ര സവിശേഷമാക്കിയതിനും നന്ദി. നിങ്ങൾ ഓരോരുത്തര്ക്കും ഓരോന്നിനും വളരെയധികം നന്ദി...’’ എന്നാണ് മോഹന്ലാല് കുറിച്ചത്. തന്റെ പുതിയ ചിത്രം പങ്കിട്ടാണ് മോഹന്ലാലിന്റെ കുറിപ്പ്.
സിനിമയുടെ ഫസ്റ്റ് ഡേ ഫസ്റ്റ് ഷോ കാണാന് എറണാകുളം കവിത തിയേറ്ററില് ആരാധകര്ക്കൊപ്പം മോഹന്ലാലുമുണ്ടായിരുന്നു. ആദ്യ ദിവസത്തെ ആദ്യ ഷോ പ്രദർശനത്തിനിടെ മോഹൻലാൽ വികാരാധീനനാകുന്ന ദൃശ്യങ്ങൾ സോഷ്യല് മീഡിയയില് വൈറലായി മാറിയിരുന്നു. ദൃശ്യം 3 യിലെ അഭിനേതാക്കളുടെയും അണിയറപ്രവർത്തകരുടെയും കൂടെ പ്രേക്ഷകരുടെ പ്രതികരണങ്ങൾ വീക്ഷിച്ചുകൊണ്ട് മോഹൻലാൽ കണ്ണുനീർ തുടയ്ക്കുന്നതാണ് വീഡിയോയില് കാണുന്നത്. വികാരഭരിതനായ മോഹൻലാൽ പിന്നീട് ആരാധകരോട് നന്ദി പ്രകടിപ്പിക്കുകയും ചെയ്തു. ചിത്രത്തിനുള്ള സ്നേഹവും പിന്തുണയും തനിക്കെന്തെങ്കിലും അവാർഡിനേക്കാളും വിലമതിക്കാനാകാത്തതാണെന്ന് താരം പറഞ്ഞു.
ജീത്തു ജോസഫ്- മോഹന്ലാല് കൂട്ടുകെട്ടിലെ സൂപ്പര് ഹിറ്റ് ഫ്രാഞ്ചൈസിയാണ് ദൃശ്യം. മലയാളത്തിന്റെ ത്രില്ലര് സിനിമകള്ക്ക് ഒരു ബെഞ്ച് മാര്ക്ക് നല്കിയ സിനിമയായിരുന്നു ദൃശ്യം. ആദ്യത്തെ ഭാഗം ബ്ലോക്ക്ബസ്റ്റര് വിജയം നേടിയതിനു പിന്നാലെയാണ് രണ്ടാം ഭാഗം പ്രേക്ഷകര്ക്ക് മുന്നിലെത്തിയത്. അതും സൂപ്പര്ഹിറ്റായി മാറി. അതുകൊണ്ട് തന്നെ മൂന്നാം ഭാഗത്തിനായി ആരാധകര് ആകാംക്ഷയോടെയാണ് കാത്തിരുന്നത്. പ്രതീക്ഷിച്ചതിനുമപ്പുറം നല്കിയാണ് ഇത്തവണയും ജീത്തു ജോസഫ് ഞെട്ടിച്ചുവെന്നാണ് സിനിമ കണ്ടിറങ്ങുന്ന ഓരോ പ്രേക്ഷകനും പറയുന്നത്.
