സോഷ്യൽ മീഡിയയിൽ ഇപ്പോൾ 'മെലഡി' മിഠായിയാണ് താരം. ഇറ്റാലിയൻ പ്രധാനമന്ത്രി ജോർജിയ മെലോണിക്ക് ഇന്ത്യൻ പ്രധാനമന്ത്രി നരേന്ദ്ര മോദി മെലഡി മിഠായി പാക്കറ്റ് സമ്മാനിച്ച വാർത്ത വലിയ രീതിയിൽ ചർച്ചയായിരുന്നു. ഇതിന് പിന്നാലെ, ബോളിവുഡ് താരം സൊനാക്ഷി സിൻഹയും പങ്കാളി സഹീർ ഇക്ബാലും ചേർന്നൊരുക്കിയ പുതിയൊരു 'മെലഡി റീൽ' ആണ് ഇപ്പോൾ ഇന്റർനെറ്റിൽ വൈറലാകുന്നത്.
‘ഒരു പാരലൽ ലോകത്ത്’ എന്ന രസകരമായ ക്യാപ്ഷനോടെയാണ് സൊനാക്ഷി ഈ റീൽ പങ്കുവെച്ചിരിക്കുന്നത്. ക്യാമറയ്ക്ക് മുന്നിലിരുന്ന് സൊനാക്ഷി സഹീറിനോട് തന്നോട് എന്താണ് ചോദിക്കാനുള്ളതെന്ന് ആരായുന്നു. "ഞാൻ നിന്നെ എത്രമാത്രം സ്നേഹിക്കുന്നുവെന്ന് നിനക്കറിയില്ലേ?" എന്ന് സഹീർ തിരിച്ചു ചോദിക്കുന്നു. സൊനാക്ഷി തമാശയോടെ, "ഇല്ല, അപ്പഴോ" എന്ന് പറയുന്നു.
തൊട്ടടുത്ത നിമിഷം, പ്രശസ്തമായ പരസ്യവാചകത്തെ ഓർമ്മിപ്പിച്ചുകൊണ്ട് "മെലഡി കഴിക്കൂ, സ്വയം മനസ്സിലാക്കൂ" എന്ന് പറഞ്ഞ് സഹീർ സൊനാക്ഷിക്ക് നേരെ ഒരു മെലഡി മിഠായി നീട്ടുന്നു. മിഠായി സൊനാക്ഷിയുടെ കഴുത്തിന് നേരെ വെച്ചിട്ട് സഹീർ അവിടെനിന്ന് മാറുന്നതും, തമാശരൂപേണ സൊനാക്ഷി അത് സഹീറിന് നേരെ വലിച്ചെറിയുന്നതുമാണ് വീഡിയോയുടെ അവസാനം.
നേരത്തെ, പ്രധാനമന്ത്രി നരേന്ദ്ര മോദി തനിക്ക് സമ്മാനിച്ച മെലഡി മിഠായി പാക്കറ്റുമായി ഇരുവരും നിൽക്കുന്ന വീഡിയോ ജോർജിയ മെലോണി തന്നെയാണ് സോഷ്യൽ മീഡിയയിൽ പങ്കുവെച്ചത്. 'മെലോണി-മോദി' കൂട്ടുകെട്ടിനെ സോഷ്യൽ മീഡിയ 'മെലഡി' എന്ന് വിളിക്കുന്ന പശ്ചാത്തലത്തിലായിരുന്നു ഈ സ്പെഷ്യൽ സമ്മാനം. ഈ ട്രെൻഡ് ഏറ്റുപിടിച്ചാണ് ഇപ്പോൾ സൊനാക്ഷിയും സഹീറും പുതിയ വീഡിയോയുമായി എത്തിയിരിക്കുന്നത്.
