ആലപ്പുഴ/തിരുവനന്തപുരം: പിണറായി സര്ക്കാരിന്റെ നവകേരളയാത്രയ്ക്കിടെ ആലപ്പുഴയില് കെ.എസ്.യു, യൂത്ത് കോണ്ഗ്രസ് പ്രവര്ത്തകരെ മുഖ്യമന്ത്രിയുടെ ഗണ്മാനും സുരക്ഷാ ഉദ്യോഗസ്ഥരും മര്ദിച്ച കേസില് പ്രത്യേകാന്വേഷണസംഘം (എസ്.ഐ.ടി) ആലപ്പുഴ മജിസ്ട്രേറ്റ് കോടതിയില് പ്രാഥമിക റിപ്പോര്ട്ട് സമര്പ്പിച്ചു. അന്നത്തെ മുഖ്യമന്ത്രി പിണറായി വിജയന്റെ ഗണ്മാന് അനില്കുമാര്, സുരക്ഷാച്ചുമതലയിലുണ്ടായിരുന്ന പോലീസുകാരായ എസ്. സന്ദീപ്, ഷൈജു, വിപിന്, അരുണ് തുടങ്ങിയവര് കുറ്റക്കാരാണെന്നാണ് റിപ്പോര്ട്ടിലെ കണ്ടെത്തല്.
പ്രതികള്ക്കെതിരേ വകുപ്പുകള് ചുമത്തിയിട്ടില്ല. വകുപ്പുതലനടപടിക്കുള്ള ശിപാര്ശ സംസ്ഥാന പോലീസ് മേധാവിക്ക് ഉടന് കൈമാറും. മുഖ്യമന്ത്രിയും മന്ത്രിമാരും സഞ്ചരിച്ച വാഹനത്തിനുനേരേ കരിങ്കൊടി പ്രതിഷേധം നടത്തിയതിനേത്തുടര്ന്ന് ലോക്കല് പോലീസ് തടഞ്ഞുവച്ച കെ.എസ്.യു, യൂത്ത് കോണ്ഗ്രസ് നേതാക്കളായ എ.ഡി. തോമസിനെയും അജയ് ജൂവല് കുര്യാക്കോസിനെയും പ്രതികള് തലയ്ക്കടിച്ച് പരുക്കേല്പ്പിച്ചെന്ന് അന്വേഷണ റിപ്പോര്ട്ടില് പറയുന്നു. അന്ന് കെ.എസ്.യു. ജില്ലാ പ്രസിഡന്റായിരുന്ന എ.ഡി. തോമസ് നിലവില് ആലപ്പുഴ എം.എല്.എയാണ്.
ലോക്കല് പോലീസ് നീക്കംചെയ്ത പ്രതിഷേധക്കാരെ മുഖ്യമന്ത്രിയുടെ സുരക്ഷാ ഉദ്യോഗസ്ഥര് മര്ദിച്ചതു ഗുരുതരചട്ടലംഘനമാണെന്നും റിപ്പോര്ട്ടില് വ്യക്തമാക്കുന്നു. മര്ദനക്കേസിലെ ആദ്യ അന്വേഷണ റിപ്പോര്ട്ട് അട്ടിമറിച്ചതുമായി ബന്ധപ്പെട്ട് അന്ന് ക്രമസമാധാനച്ചുമതലയുണ്ടായിരുന്ന എ.ഡി.ജി.പി: എം.ആര്. അജിത്കുമാറിനും കുരുക്ക് മുറുകി. ആദ്യ കേസ് ഡയറി തിരുത്തിയതായി എസ്.ഐ.ടി. കണ്ടെത്തിയ സാഹചര്യത്തില് എ.ഡി.ജി.പിക്കെതിരേ വകുപ്പുതലനടപടിയുണ്ടായേക്കും. കേസ് ഡയറി തിരുത്താന് എ.ഡി.ജി.പി. നിര്ദേശിച്ചതായി എസ്.ഐ.ടി. റിപ്പോര്ട്ടില് പറയുന്നു. അതിനായി അന്നത്തെ ആലപ്പുഴ ഡിവൈ.എസ്.പി. സുനില്രാജിനെ എ.ഡി.ജി.പിയുടെ ഓഫീസിലേക്ക് മൂന്നുതവണ രഹസ്യമായി വിളിച്ചുവരുത്തി.ആലപ്പുഴ മുന് ജില്ലാ പോലീസ് മേധാവി ചൈത്ര തെരേസാ ജോണ് നല്കിയ അന്വേഷണ റിപ്പോര്ട്ട് അന്നത്തെ ആഭ്യന്തരവകുപ്പ് പൂഴ്ത്തിവച്ചതായും എസ്.ഐ.ടി. കണ്ടെത്തി.
കേസ് അട്ടിമറിച്ചവര്ക്കെതിരേ നടപടി വേണമെന്ന് മര്ദനമേറ്റ എ.ഡി. തോമസ് എം.എല്.എയും അജയ് ജുവല് കുര്യാക്കോസും ആവശ്യപ്പെട്ടു. കേസ് ഡയറി തിരുത്തിയതിനെക്കുറിച്ച് എ.ഡി.ജി.പി. അജിത്കുമാറിനോട് സര്ക്കാര് വിശദീകരണം തേടും. വിശദീകരണം തൃപ്തികരമല്ലെങ്കില് വ്യാജരേഖ ചമച്ചതിനുള്പ്പടെ കേസെടുക്കുമെന്നാണ് സൂചന. ജൂലൈയില് ഡി.ജി.പിയായി സ്ഥാനക്കയറ്റം ലഭിക്കാനിരിക്കേയാണ് അജിത്കുമാറിനെതിരായ ഗുരുതര കണ്ടെത്തലുകള്. അന്വേഷണ റിപ്പോര്ട്ട് തിരുത്താന് അജിത്കുമാര് ഇടപെട്ടെന്ന് മര്ദനമേറ്റ തോമസും അജയും എസ്.ഐ.ടിക്കു മൊഴിനല്കി.
