മേപ്പാടി: മേപ്പാടിയില് വീണ്ടും ഉണ്ടായ കാട്ടാന ആക്രമണത്തില് ദാരുണാന്ത്യം. മേപ്പാടി വനമേഖലയിലെ ചൂണ്ടിയില് വെച്ച ഇന്ന് രാവിലെ ഉണ്ടായ ആക്രമണത്തില് ഗുരുതരമായി പരിക്കേറ്റ ജസ്സിയാണ് മരണത്തിന് കീഴടങ്ങിയത്. ഇന്ന് രാവിലെ 6.45 ന് ഭര്ത്താവ് ഷാജിക്കൊപ്പം ജോലിക്ക് പോകുന്ന സമയത്തായിരുന്നു കാട്ടാന ആക്രമിച്ചത്. ഷാജി ഓടി രക്ഷപ്പെട്ടെങ്കിലും ജെസ്സി ആക്രമണത്തിന് ഇരയാകുകയായിരുന്നു.
രണ്ടുപേരും രാവിലെ വനമേഖലയിലൂടെ ബൈക്കില് ജോലിസ്ഥലത്തേക്ക് പോകുമ്പോള് കാട്ടാനയുടെ മുന്നില് പെടുകയായിരുന്നു. തുടര്ന്ന് ഇരുവരും ബൈക്ക് ഉപേക്ഷിച്ച് ഓടി. ഷാജി മുന്നിലും ജെസ്സി പിന്നിലുമായിരുന്നു. ഷാജി ഓടി രക്ഷപ്പെട്ടപ്പോള് ജെസ്സിക്ക് ഓടാനായില്ല. തുടര്ന്ന് ആന ആക്രമിക്കുകയായിരുന്നു. ഗുരുതരമായി പരിക്കേറ്റ നിലയില് ജെസ്സിയെ അവിടേയ്ക്ക് എത്തിയ നാട്ടുകാര് പിന്നീട് മേപ്പാടിയിലെ ഒരു സ്വകാര്യ ആശുപത്രിയില് പ്രവേശിപ്പിച്ചെങ്കിലും രക്ഷിക്കാനായില്ല.
മേപ്പാടി മേഖലയില് കാട്ടാന ആക്രമണങ്ങള് വലിയ ആശങ്കയാണ് സൃഷ്ടിച്ചിട്ടുള്ളത്. നേരത്തേ മേപ്പാടി എരുമക്കൊല്ലി പൂളക്കുന്ന് ഗ്രാമത്തില് കാട്ടാനയുടെ ആക്രമണത്തില് വയോധികനായ അറുമുഖന് കൊല്ലപ്പെട്ടിരുന്നു. 2004 ല് ഒരു ആദിവാസി യുവാവിനെയും കാട്ടാന കൊന്നിരുന്നു. മേപ്പാടി ഉരുള്പൊട്ടല് ദുരന്തത്തിന് ശേഷം ഇവിടെ ജനവാസമേഖലയില് ആനയിറങ്ങുന്ന സംഭവം പതിവായി മാറിയിട്ടുണ്ട്.
