മൈക്രോസോഫ്റ്റിന്റെ പാരിസ് ഓഫീസിലെ വേറിട്ട തൊഴില് സംസ്കാരവും കാഴ്ചകളും പങ്കുവെച്ച് ബെംഗളൂരുവില് നിന്നുള്ള സോഫ്റ്റ്വെയര് എഞ്ചിനീയറായ രാഹുല് കൗശിക്. 2024 മുതല് മൈക്രോസോഫ്റ്റില് ജോലി ചെയ്യുന്ന അദ്ദേഹം ഇന്സ്റ്റഗ്രാമില് പങ്കുവെച്ച വീഡിയോയിലാണ് യൂറോപ്പിലെ മികച്ച 'വര്ക്ക് ലൈഫ് ബാലന്സിനെ' കുറിച്ച് മനസ്സ് തുറന്നത്. വിദേശത്തെ ഭാഷാപരമായ തടസങ്ങള്, സസ്യാഹാര ലഭ്യതയെക്കുറിച്ചുള്ള ആശങ്കകള് എന്നിവയ്ക്കൊപ്പം യൂറോപ്പിലെ ഓഫീസ് ജീവിതം ഇന്ത്യയില് നിന്നും എത്രത്തോളം വ്യത്യസ്തമാണെന്നും വീഡിയോയിലൂടെ രാഹുല് വ്യക്തമാക്കുന്നുണ്ട്.
വൈകുന്നേരം നാലരയ്ക്ക് എടുത്ത വീഡിയോയില് ഓഫീസിലെ ഭൂരിഭാഗം ജീവനക്കാരും ജോലി കഴിഞ്ഞ് മടങ്ങിയതായും ഒഴിഞ്ഞുകിടക്കുന്ന കസേരകളും ഡെസ്ക്കുകളുമാണ് കാണാനാകുന്നതെന്നും രാഹുല് പറയുന്നു. യൂറോപ്പിലെ കൃത്യമായ തൊഴില് സമയത്തെക്കുറിച്ച് അദ്ദേഹം പ്രത്യേകം പരാമര്ശിക്കുന്നുണ്ട്. ജോലി സമയം കഴിഞ്ഞാല് ആളുകള് അപ്പോള് തന്നെ ഓഫീസ് വിടുമെന്നും, ബാക്കിയുള്ള സമയം വ്യക്തിപരമായ കാര്യങ്ങള്ക്കായി മാറ്റിവെക്കുമെന്നും അദ്ദേഹം കൂട്ടിച്ചേര്ത്തു. ഓഫീസില് നിന്ന് കാണുന്ന ഈഫല് ടവറിന്റെ മനോഹരമായ കാഴ്ച്ചയും കഫറ്റീരിയയും ഉള്പ്പെടുത്തിയ വീഡിയോയ്ക്ക് 'മൈക്രോസോഫ്റ്റ് പാരീസിലെ ഒരു സോഫ്റ്റ്വെയര് എഞ്ചിനീയറുടെ ഒരു ദിവസത്തെ ജീവിതം' എന്നാണ് ക്യാപ്ഷന് നല്കിയിരിക്കുന്നത്.
യൂറോപ്യന് തൊഴില് നിയമങ്ങള് അനുസരിച്ച് ജോലി സമയത്തിന് ശേഷം ഔദ്യോഗിക കോളുകള്ക്ക് മറുപടി നല്കാനോ സന്ദേശങ്ങളോട് പ്രതികരിക്കാനോ ജീവനക്കാര് ബാധ്യസ്ഥരല്ലെന്നും, ഇത് ഇന്ത്യയിലെ തൊഴില് സംസ്കാരത്തില് നിന്ന് ഏറെ വ്യത്യസ്തമാണെന്നും രാഹുല് ചൂണ്ടിക്കാണിക്കുന്നു. സോഷ്യല് മീഡിയയില് പങ്കുവെച്ച വീഡിയോയ്ക്ക് താഴെ യൂറോപ്പിലെ തൊഴില് സാഹചര്യങ്ങളെ അഭിനന്ദിച്ച് നിരവധി പേരാണ് രംഗത്തെത്തിയത്. ജോലി എന്നത് ജീവിതത്തിന്റെ ഒരു ഭാഗം മാത്രമായിരിക്കണമെന്നും, അത് തന്നെയായിരിക്കരുത് ജീവിതമെന്നും കമന്റുകളിലൂടെ പലരും കുറിച്ചു.
