പാറ്റ്ന: മുന് മുഖ്യമന്ത്രിയും രാഷ്ട്രീയ ജനതാദള് നേതാവുമായ റാബ്രി ദേവിയോട് പട്നയിലെ 10 സര്ക്കുലര് റോഡിലുള്ള ഔദ്യോഗിക വസതി ഒഴിയാന് ആവശ്യപ്പെട്ട് ബിഹാര്സര്ക്കാര്. സര്ക്കാര് വസതി ഒഴിയണമെന്ന് കാണിച്ച് അധികൃതര് റാബ്രി ദേവിക്ക് നോട്ടീസ് നല്കി. ബിഹാര് മൃഗസംരക്ഷണ, ക്ഷീരവികസന വകുപ്പ് മന്ത്രി നന്ദ് കിഷോര് റാമിന് ഈ വസതി പുനര്വിന്യസിച്ചതിനെ തുടര്ന്നാണ് ഈ നടപടി.
ഈ നോട്ടീസോടെ, ഏതാണ്ട് രണ്ട് പതിറ്റാണ്ടുകാലം നീണ്ടുനിന്ന താമസം അവസാനിക്കുകയാണ്. ഈ കാലയളവില് ഈ ബംഗ്ലാവ് ബിഹാറിലെ ഏറ്റവും ശ്രദ്ധേയമായ രാഷ്ട്രീയ വിലാസങ്ങളിലൊന്നായി മാറിയിരുന്നു. മുഖ്യമന്ത്രിയുടെ വസതിക്കും രാജ്ഭവനും സമീപത്തായി സ്ഥിതി ചെയ്യുന്ന 10, സര്ക്കുലര് റോഡ് ബംഗ്ലാവ്, വര്ഷങ്ങളായി ആര്.ജെ.ഡിയുടെ ക്യാമ്പ് ഓഫീസായാണ് പ്രവര്ത്തിച്ചിരുന്നത്.
ബിഹാര് ലെജിസ്ലേറ്റീവ് കൗണ്സിലിലെ പ്രതിപക്ഷ നേതാവ് എന്ന നിലയില് 39 ഹാര്ഡിഞ്ച് റോഡിലുള്ള മറ്റൊരു ഔദ്യോഗിക വസതിയിലേക്ക് മാറാന് അധികൃതര് റാബ്രി ദേവിയോട് ആവശ്യപ്പെട്ടിട്ടുണ്ട്. കഴിഞ്ഞ വര്ഷം നവംബറിലും മുന് ബിഹാര് മുഖ്യമന്ത്രിക്ക് സമാനമായ നോട്ടീസ് നല്കിയിരുന്നു. അന്ന് ആര്.ജെ.ഡി നേതാക്കള് ഇതിനെതിരെ രൂക്ഷമായാണ് പ്രതികരിച്ചത്.
റാബ്രി ദേവിയുടെ മകള് രോഹിണി ആചാര്യയും ഇതിനെതിരെ പ്രകോപിതയായി ഒരു പോസ്റ്റ് പങ്കുവെച്ചിരുന്നു. ആര്.ജെ.ഡി നേതാവും മുന് ഉപമുഖ്യമന്ത്രിയുമായ തേജസ്വി യാദവ്, പാര്ട്ടി ബിഹാറില് അധികാരം പങ്കിട്ടിരുന്ന കാലത്ത് താന് താമസിച്ചിരുന്ന 5, ദേശ്രത്ന മാര്ഗിലെ വസതിയില് നിന്ന് നിരവധി സാധനങ്ങള് കടത്തിക്കൊണ്ടുപോയെന്ന ആരോപണം നേരത്തെ നേരിട്ടിരുന്നു.
