ജീവിതത്തില് നിന്ന് ചിരി മാഞ്ഞുപോയ പത്ത് വര്ഷങ്ങളെക്കുറിച്ച് മനസ്സു തുറന്ന് നടി നേഹ ധൂപിയ. കരിയറിന്റെ തുടക്കകാലത്ത് ഒരു കാസ്റ്റിങ് ഡയറക്ടര് നടത്തിയ പരാമര്ശമാണ് തന്റെ ചിരി മായ്ച്ചുകളഞ്ഞതെന്നും താരം പറഞ്ഞു. ഈ സംഭവം വര്ഷങ്ങളോളം തന്നെ ബാധിച്ചുവെന്നും തന്റെ ആത്മവിശ്വാസം തകര്ത്തുകളഞ്ഞുവെന്നും നേഹ പറഞ്ഞു. നടി ഹുമ ഖുറേഷിയുമായുളള സംഭാഷണത്തിലാണ് നേഹ ഇക്കാര്യങ്ങള് വെളിപ്പെടുത്തിയത്.
‘എന്റെ കരിയറിന്റെ ഏറ്റവും തുടക്കത്തിലായിരുന്നു ആ സംഭവം. ഒരു ടിവി ഷോ ഓഡിഷനായി കാറില് പോകുകയായിരുന്നു. കാസ്റ്റിങ് ഡയറക്ടറുടെ കാറിലായിരുന്നു യാത്ര. അയാള് എന്നെ നോക്കിയപ്പോള് ഞാന് പുഞ്ചിരിച്ചു. അപ്പോള് അയാള് പറഞ്ഞു ‘നീ ചിരിക്കരുത്, നിന്റെ ചിരി വളരെ മോശമാണ് എന്ന്’ നേഹ ധൂപിയ പറഞ്ഞു. മറ്റുളളവര്ക്ക് ആ പരമാര്ശം നിസാരമായി തോന്നിയേക്കാമെങ്കിലും തന്നെ അത് ആഴത്തില് ബാധിച്ചുവെന്നും തന്റെ പ്രൊഫഷണല് സമീപനത്തെ അത് മാറ്റിമറിച്ചെന്നും താരം കൂട്ടിച്ചേര്ത്തു.
‘പത്ത് വര്ഷത്തോളമാണ് ഞാന് പുഞ്ചിരിക്കുന്നത് നിര്ത്തിയത്. ഫോട്ടോഗ്രാഫുകളിലും ഓഡിഷനുകളിലുമൊന്നും ഞാന് പിന്നീട് ചിരിച്ച മുഖത്തോടെ പ്രത്യക്ഷപ്പെട്ടിട്ടില്ല. കാരണം ഞാനും കരുതി എന്റെ പുഞ്ചിരിക്ക് എന്തോ കുഴപ്പമുണ്ടെന്ന്. ഞാന് മിസ് ഇന്ത്യാ മത്സരത്തില് വിജയിച്ചു. പക്ഷേ അന്നത്തെ എന്റെ ചിത്രങ്ങള് നോക്കൂ. എന്റെ ചിരിക്കുന്ന മുഖം കാണാന് കഴിയില്ല. മിസ് യൂണിവേഴ്സ് മത്സരത്തില് പരാജയപ്പെട്ടതും എന്റെ ആത്മവിശ്വാസത്തെ ഉലച്ചുകളഞ്ഞു. മാസങ്ങളോളം സമയമെടുത്താണ് ഞാന് വൈകാരികമായി അതില് നിന്ന് മുക്തി നേടിയത്’ നേഹ പറഞ്ഞു.
സോഷ്യല് മീഡിയയിലെ നിരന്തരമുള്ള ബോഡി ഷെയ്മിംഗും സൈബര് ആക്രമണവും നേരിട്ടിട്ടുള്ള താരമാണ് നേഹ. നടന് അങ്കത് ബേദിയാണ് നേഹയുടെ ഭര്ത്താവ്. ഇരുവര്ക്കും രണ്ട് കുട്ടികളാണുള്ളത്. മക്കള്ക്കൊപ്പമുള്ള ചിത്രങ്ങളും വീഡിയോകളുമൊക്കെ സോഷ്യല് മീഡിയയിലൂടെ പങ്കുവെക്കാറുണ്ട് നേഹ.
