മുംബൈ: ഐപിഎല്ലിലെ ഒരു മുന്ദക്ഷിണാഫ്രിക്കന് താരവും ഒരു ചീയര്ലീഡറുമായുള്ള മാധ്യമങ്ങള് ചര്ച്ചചെയ്ത പ്രണയവാര്ത്തയ്ക്ക് പിന്നില് ഐപിഎല് മാനേജ്മെന്റായിരുന്നെന്ന് മുന് ഐപിഎല് തലവന് ലളിത് മോദി. ഐപിഎല് എന്ന ബ്രാന്ഡിന്റെ ഏറ്റവും പ്രധാനപ്പെട്ട ചാലകശക്തി ഇത്തരം വിവാദങ്ങളാണെന്നും ഇത്തരം കഥകള് ഐപിഎല് അധികാരികള് ബോധപൂര്വ്വം ചെയ്യുന്നതാണെന്നും പറഞ്ഞു.
പുറത്തുനിന്ന് നോക്കുന്നവര്ക്ക് അത് തികച്ചും സ്വാഭാവികമായി തോന്നുമെങ്കിലും യാഥാര്ഥ്യം അതല്ല. എന്റെ കൂടെയുള്ള ജീവനക്കാരും രാഷ്ട്രീയക്കാരും മറ്റ് ഉദ്യോഗസ്ഥരുമെല്ലാം ചേര്ന്ന് കൃത്യമായി പ്ലാന് ചെയ്യുന്നതായിരുന്നു ഈ വിവാദങ്ങള്. ഒന്നും അവിചാരിതമായി സംഭവിക്കുന്നതല്ല. പ്രേക്ഷക പങ്കാളിത്തം കുറയുമ്പോഴെല്ലാം ഞങ്ങള് പുതിയ വിവാദങ്ങള്ക്ക് തിരി കൊളുത്തുമെന്നും പറഞ്ഞു.
വ്യൂവര്ഷിപ്പ് താഴേക്ക് പോകുമ്പോള് ഐപിഎല് മാനേജ്മെന്റ് തന്നെ ബോധപൂര്വ്വം വാര്ത്തകള് സൃഷ്ടിച്ച് മാധ്യമങ്ങള്ക്ക് നല്കാറുണ്ടെന്ന് അദ്ദേഹം വെളിപ്പെടുത്തി. ഐപിഎല് ടൂര്ണമെന്റുകള്ക്കിടയില് ഉണ്ടാകാറുള്ള ഭൂരിഭാഗം ഓഫ്-ഫീല്ഡ് വിവാദങ്ങളും റേറ്റിങ് കൂട്ടാനായി മുന്കൂട്ടി തയ്യാറാക്കുന്ന തിരക്കഥകളാണെന്നും ഹ്യൂമന്സ് ഓഫ് ബോംബെ'ക്ക് നല്കിയ പ്രത്യേക അഭിമുഖത്തില് ലളിത്മോദി പറഞ്ഞു.
'ടൂര്ണമെന്റിന് ഒരു വിവാദം ആവശ്യമായിരുന്ന സമയത്തായിരുന്നു ദക്ഷിണാഫ്രിക്കന് നായകനും ചിയര്ലീഡറും തമ്മിലുള്ള ബന്ധത്തെക്കുറിച്ച് വിവരം കിട്ടിയത്. ഈ വാര്ത്ത മാധ്യമങ്ങള്ക്ക് ചോര്ത്തി നല്കി. അതോടെ എല്ലാവരുടെയും ശ്രദ്ധ ഐപിഎല്ലിലേക്ക് തിരിയുകയും റേറ്റിങ് കുതിച്ചുയരുകയും ചെയ്തു. പിന്നീട് ആ താരം ആ ചിയര്ലീഡറെ വിവാഹം കഴിച്ചു' ലളിത്മോദി പറഞ്ഞു.
രാജസ്ഥാന് റോയല്സ് നായകന് റിയാന് പരാഗ് ഡ്രെസ്സിങ് റൂമിലിരുന്നും, പഞ്ചാബ് കിങ്സ് താരം യുസ്വേന്ദ്ര ചഹല് വിമാനത്തിനുള്ളിലും ഇ-സിഗരറ്റ് ഉപയോഗിച്ച ദൃശ്യങ്ങള് വലിയ ചര്ച്ചയായിരുന്നു. ഇതിന് പുറമെ മുംബൈ ഇന്ത്യന്സ് താരം തിലക് വര്മ്മയെക്കുറിച്ച് പഞ്ചാബിന്റെ അര്ഷ്ദീപ് സിങ് നടത്തിയ പരാമര്ശങ്ങളും ക്രിക്കറ്റ് ലോകത്ത് വലിയ വിവാദങ്ങള്ക്ക് വഴിവെച്ചിരുന്നു.
