മമതയ്ക്കായി ബഹറംപൂർ സീറ്റ് ഒഴിയാൻ ആവശ്യപ്പെട്ടിട്ടില്ല; റിപ്പോർട്ടുകൾ തള്ളി സൗരവ് ഗാംഗുലിയും യൂസഫ് പഠാനും

കൊൽക്കത്ത: പശ്ചിമ ബംഗാളിൽ ഭരണം നഷ്ടമായതിന് പിന്നാലെ പ്രതിസന്ധിയിലൂടെ കടന്നുപോകുന്ന തൃണമൂൽ കോൺഗ്രസിനിടെ, പാർട്ടി അധ്യക്ഷ മമതാ ബാനർജിക്കായി ബഹറംപൂർ ലോക്സഭാ സീറ്റ് ഒഴിഞ്ഞുകൊടുക്കാൻ യൂസഫ് പഠാനോട് ആവശ്യപ്പെട്ടെന്ന തരത്തിലുള്ള മാധ്യമ റിപ്പോർട്ടുകൾ മുൻ ഇന്ത്യൻ ക്യാപ്റ്റൻ സൗരവ് ഗാംഗുലി നിഷേധിച്ചു. അത്തരത്തിലുള്ള വാർത്തകൾ തികച്ചും അടിസ്ഥാനരഹിതവും അസത്യവുമാണെന്ന് യൂസഫ് പഠാനും വ്യക്തമാക്കി.

ഏപ്രിൽ-മേയ് മാസങ്ങളിൽ നടന്ന തെരഞ്ഞെടുപ്പിലെ അപ്രതീക്ഷിത തിരിച്ചടികൾക്ക് പിന്നാലെ പാർട്ടിക്കുള്ളിൽ അസ്വാരസ്യങ്ങൾ ശക്തമായ സാഹചര്യത്തിലാണ് മൂന്ന് തവണ മുഖ്യമന്ത്രിയായിരുന്ന മമതാ ബാനർജി പ്രതിസന്ധി നേരിടുന്നത്. തെരഞ്ഞെടുപ്പിൽ ഭരണം നഷ്ടപ്പെട്ടതിനു പുറമെ സ്വന്തം തട്ടകമായ ഭവാനിപൂരിലും മമത പരാജയപ്പെട്ടിരുന്നു. ഇതോടെ നിലവിൽ അവർക്ക് നിയമനിർമ്മാണ സഭകളിൽ ഒന്നിലും അംഗത്വമില്ലാത്ത സാഹചര്യമാണ് ഉണ്ടായിരിക്കുന്നത്.