തിരുവനന്തപുരം: കോഴിക്കോട് നാലുവയസുകാരി 'ഷിഗെല്ല' ബാധിതയായി മരിച്ചതോടെ ജാഗ്രതാനിര്ദേശവുമായി ആരോഗ്യവകുപ്പ്. രോഗബാധിതരുടെ എണ്ണം കഴിഞ്ഞ വര്ഷത്തേക്കാള് മൂന്നിരട്ടിയോളം വര്ധിച്ചിട്ടുണ്ട്. ഈ സാഹചര്യത്തില് ഹോട്ടലുകള്, തട്ടുകടകള് ഉള്പ്പെടെയുള്ള സ്ഥാപനങ്ങളില് പരിശോധന കര്ശനമാക്കാന് ആരോഗ്യ-ഭക്ഷ്യസുരക്ഷാ വകുപ്പുകള്ക്ക് നിര്ദേശം നല്കി.
രോഗവ്യാപനത്തിന്റെ പശ്ചാത്തലത്തില് ഹോട്ടലുകളിലും തട്ടുകടകളിലും പൂര്ണമായും ശുദ്ധീകരിച്ച വെള്ളം മാത്രമേ നല്കാവൂയെന്നാണു കര്ശന നിര്ദേശം. വരും ദിവസങ്ങളില് സംസ്ഥാനവ്യാപകമായി ഹോട്ടലുകളിലും മറ്റ് ഭക്ഷണശാലകളിലും ഭക്ഷ്യസുരക്ഷാ ഉദ്യോഗസ്ഥര് മിന്നല് പരിശോധന നടത്തും. ആരോഗ്യ മാനദണ്ഡങ്ങള് പാലിക്കാത്ത സ്ഥാപനങ്ങള്ക്കെതിരേ നിയമനടപടി സ്വീകരിക്കുമെന്ന് ആരോഗ്യ മന്ത്രി കെ. മുരളീധരന് മുന്നറിയിപ്പ് നല്കി.
പ്രധാനമായും മലിനജലത്തിലൂടെയും കേടായതും പഴകിയതുമായ ഭക്ഷണത്തിലൂടെയുമാണു ഷിഗെല്ല ബാക്ടീരിയ ശരീരത്തില് പ്രവേശിക്കുന്നത്. രോഗാണു പ്രധാനമായും കുടലിനെയാണ് ബാധിക്കുന്നത്. ബാക്ടീരിയ ഉള്ളില് ചെന്ന് മൂന്നു ദിവസത്തിനു ശേഷമാകും ലക്ഷണങ്ങള് കണ്ടുതുടങ്ങുന്നത്.
കഴിഞ്ഞ ആറുവരെ 85 പേര്ക്ക് ഈവര്ഷം ഷിഗെല്ല രോഗബാധ സ്ഥിരീകരിച്ചപ്പോള് 70 പേര് സംശയനിഴലിലാണ്. രണ്ടുപേര് മരിച്ചു. ഈ മാസം മാത്രം 10 പേര്ക്കു രോഗം സ്ഥിരീകരിച്ചു. 2025 ജൂണ് ആറു വരെ 61 പേര്ക്കാണു രോഗം ബാധിച്ചതെങ്കില് ഇത്തവണ അത് 155 ആയി. കഴിഞ്ഞ വര്ഷം ഇക്കാലയളവില് മരണങ്ങളൊന്നും റിപ്പോര്ട്ട് ചെയ്തിരുന്നില്ല. 2025 ഡിസംബര് 31 വരെ ആകെ 152 പേരാണു രോഗബാധിതരായത്. എന്നാല്, ഇതുവരെ 126 പേര്ക്ക് മാത്രമാണ് രോഗം സ്ഥിരീകരിച്ചതെന്നാണ് ആരോഗ്യ മന്ത്രി കെ. മുരളീധരന് വ്യക്തമാക്കിയത്.
