തിരുവനന്തപുരം: കേരളത്തില് വരും മണിക്കൂറുകളില് അതിശക്തമായ മഴ പെയ്യാന് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. മുന്കരുതലിന്റെ ഭാഗമായി വിവിധ ജില്ലകളില് ജാഗ്രതാ നിര്ദ്ദേശങ്ങള് പുറപ്പെടുവിച്ചിട്ടുണ്ട്. ഇടുക്കി, എറണാകുളം, തൃശൂര് ജില്ലകളില് ഓറഞ്ച് അലേര്ട്ടാണ്. പത്തനംതിട്ട, ആലപ്പുഴ, കോട്ടയം, പാലക്കാട്, മലപ്പുറം ജില്ലകളില് എയ്യോ അലേര്ട്ടും പ്രഖ്യാപിച്ചിട്ടുണ്ട്.
തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം എന്നീ ജില്ലകളില് ഒറ്റപ്പെട്ടയിടങ്ങളില് മണിക്കൂറില് 40 കിലോമീറ്റര് വരെ വേഗതയില് കാറ്റോടു കൂടിയ ഇടത്തരം മഴയ്ക്ക് സാധ്യതയുണ്ട്. മറ്റു ജില്ലകളില് നേരിയ മഴ പെയ്തേക്കാം.
കോട്ടയം, എറണാകുളം, ഇടുക്കി ജില്ലകളില് നാളെയും തീവ്രമഴയ്ക്കുള്ള ഓറഞ്ച് അലേര്ട്ട് പ്രഖ്യാപിച്ചിട്ടുണ്ട്. ദേശീയ സമുദ്രസ്ഥിതിപഠന ഗവേഷണ കേന്ദ്രത്തിന്റെ മുന്നറിയിപ്പ് പ്രകാരം കേരള, കന്യാകുമാരി തീരങ്ങളില് 'കള്ളക്കടല്' പ്രതിഭാസം മൂലം ശക്തമായ കടലാക്രമണത്തിന് സാധ്യതയുണ്ട്. ഇന്ന് രാത്രി 8.30 മുതല് നാളെ രാത്രി 11.30 വരെ 0.8 മുതല് 1.4 മീറ്റര് വരെ ഉയരത്തില് തിരമാലകള് അടിച്ചേക്കാം.
ഇന്ന് വൈകുന്നേരം 5.30 വരെ 1.3 മുതല് 1.5 മീറ്റര് വരെ ഉയര്ന്ന തിരമാലകള്ക്ക് സാധ്യതയുണ്ട്. മത്സ്യത്തൊഴിലാളികള്ക്കും തീരദേശവാസികള്ക്കുമുള്ള സുരക്ഷാനിര്ദ്ദേശങ്ങള് കടല്ക്ഷോഭം രൂക്ഷമാകാന് സാധ്യതയുള്ളതിനാല് അതീവ ജാഗ്രത പുലര്ത്തണമെന്ന് അധികൃതര് ആവശ്യപ്പെട്ടു. അപകടമേഖലകളില് താമസിക്കുന്നവര് അധികൃതരുടെ നിര്ദ്ദേശാനുസരണം സുരക്ഷിത സ്ഥാനങ്ങളിലേക്ക് മാറണം.
