നടനും രാഷ്ട്രീയപ്രവർത്തകനുമായ കൃഷ്ണകുമാറിന്റെ 58-ാം പിറന്നാൾ ആഘോഷത്തിന്റെ ചിത്രങ്ങളും കുറിപ്പുമാണ് ഇപ്പോൾ സോഷ്യൽ മീഡിയയിൽ ശ്രദ്ധേയമാകുന്നത്. കഴിഞ്ഞ ദിവസമായിരുന്നു താരത്തിന്റെ ജന്മദിനം. ഭാര്യ സിന്ധു, മക്കളായ ഇഷാനി, ഹൻസിക എന്നിവർക്കൊപ്പമായിരുന്നു ഇത്തവണ കൃഷ്ണകുമാറിന്റെ പിറന്നാൾ ആഘോഷം.
പിറന്നാൾ കേക്കിനൊപ്പമുള്ള ചിത്രങ്ങളും കുടുംബത്തോടൊപ്പമുള്ള സന്തോഷനിമിഷങ്ങളും പങ്കുവെച്ചുകൊണ്ട് താരം കുറിച്ച വാക്കുകൾ ആരാധകരുടെ ഹൃദയം കവരുകയാണ്. എല്ലാം കൊണ്ടും സമ്പന്നവും അനുഗ്രഹീതവുമായ ഒരു ജീവിതം സമ്മാനിച്ചതിന് ദൈവത്തോട് നന്ദി പറയുകയാണ് കൃഷ്ണകുമാർ.
"58 വർഷം... എല്ലാം കൊണ്ടും സമ്പന്നമായ ജീവിതം.. മാതാപിതാക്കൾക്കൊപ്പം ജീവിച്ചു... സഹോദരൻ, ഭാര്യ, മക്കൾ, കൊച്ചുമകൻ, സ്നേഹം നിറഞ്ഞ ശക്തരായ സുഹൃത്തുക്കൾ.. ഇവരോടൊപ്പം ആഹ്ലാദവും ആരോഗ്യകരവും നിറഞ്ഞ അനുഗ്രഹീതമായ ജീവിതം സമ്മാനിച്ച ദൈവത്തിനു നന്ദി.." - കൃഷ്ണകുമാർ കുറിച്ചു.
പിറന്നാൾ ദിനത്തിൽ മക്കളായ അഹാന, ദിയ, ഇഷാനി, ഹൻസിക എന്നിവരും ഭാര്യ സിന്ധുവും സോഷ്യൽ മീഡിയയിലൂടെ താരത്തിന് ആശംസകൾ നേർന്നിരുന്നു. ഇതിന് പിന്നാലെയാണ് താരം തന്റെ സന്തോഷം പങ്കുവെച്ച് രംഗത്തെത്തിയത്. പോസ്റ്റിന് താഴെ നിരവധിപ്പേരാണ് പ്രിയതാരത്തിന് ജന്മദിനാശംസകൾ നേർന്ന് കമന്റുകൾ പങ്കുവെക്കുന്നത്.
