ന്യൂജഴ്സി: ലോകകപ്പ് ഫൈനല്സില് സ്വിറ്റ്സര്ലന്ഡിനെതിരെ സമനില പിടിച്ചുവാങ്ങി ഖത്തര് തങ്ങളുടെ ആദ്യ പോയിന്റ് സ്വന്തമാക്കി; കളി തീരാന് നിമിഷങ്ങള് മാത്രം ബാക്കിനില്ക്കെയായിരുന്നു ഖത്തറിന്റെ ആവേശം നിറഞ്ഞ സമനില ഗോള്. മത്സരത്തിന്റെ 94-ാം മിനിറ്റില് ഹൊമാം അല് അമീന് നല്കിയ ക്രോസ് ബൗലെം ഖൂഖി ഹെഡ്ഡറിലൂടെ വലയിലാക്കിയതോടെ ഖത്തര് ടീമില് ആഹ്ലാദപ്രകടനം അണപൊട്ടി.
സ്വിറ്റ്സര്ലന്ഡ് പൂര്ണ്ണമായും ആധിപത്യം പുലര്ത്തിയതും, ബ്രീല് എംബോളോയുടെ ആദ്യ പകുതിയിലെ പെനാല്റ്റി ഗോളിലൂടെ അവര് വിജയിക്കുമെന്ന് കരുതിയതുമായ ഒരു ഏകപക്ഷീയമായ മത്സരത്തിനാണ് ഇതോടെ നാടകീയമായ അന്ത്യമുണ്ടായത്.
ബൊലോഗ്ന മിഡ്ഫീല്ഡര് റെമോ ഫ്രൂലറെ ഖത്തര് ഗോള്കീപ്പര് മഹ്മൂദ് അബുനാദ ഫൗള് ചെയ്തതിനെ തുടര്ന്നാണ് സ്വിസ് സ്ട്രൈക്കര് പെനാല്റ്റി ലക്ഷ്യത്തിലെത്തിച്ചത്. എന്നാല്, ആ നീക്കത്തിനിടയില് ഫ്രൂലര് നേരിയ തോതില് ഓഫ്സൈഡ് ആയിരുന്നുവെന്ന് ടെലിവിഷന് റീപ്ലേകളില് വ്യക്തമായിരുന്നു.
ആ ഘട്ടത്തില്, ഗ്രൂപ്പ് ബി-യില് ഒന്നാം സ്ഥാനത്തേക്ക് കുതിക്കുകയായിരുന്നു മുരത് യാക്കിന്റെ സ്വിസ് പട. ഇനി വരാനിരിക്കുന്ന അടുത്ത രണ്ട് മത്സരങ്ങളില് ബോസ്നിയ-ഹെര്സഗോവിനയോടും കാനഡയോടും അവര്ക്ക് കടുത്ത പോരാട്ടം നേരിടേണ്ടതുണ്ട്.
എന്നിരുന്നാലും, മികച്ച അവസരങ്ങള് ഗോളാക്കി മാറ്റുന്നതില് വരുത്തിയ വീഴ്ചയ്ക്കും കളിയുടെ അവസാന ഘട്ടത്തില് പ്രകടമാക്കിയ മന്ദഗതിക്കും അവര്ക്ക് കടുത്ത വില നല്കേണ്ടി വന്നു. നോട്ടിംഗ്ഹാം ഫോറസ്റ്റ് ഫോര്വേഡ് ഡാന് എന്ഡോയ് ലഭിച്ച പല മികച്ച അവസരങ്ങളും പാഴാക്കിയപ്പോള്, റൂബന് വര്ഗാസും എംബോളോയും സുവര്ണ്ണാവസരങ്ങള് നഷ്ടപ്പെടുത്തി. ഇതോടെ, മത്സരത്തിലുടനീളം പിന്നിലായിപ്പോയ ഖത്തറിന് ആരും പ്രതീക്ഷിക്കാത്ത ഒരു വിലപ്പെട്ട പോയിന്റ് സ്വന്തമാക്കാന് വഴിതുറന്നു.
നാല് വര്ഷം മുമ്പ് ലോകകപ്പിന് ആതിഥേയത്വം വഹിച്ചപ്പോള് ഖത്തര് നിരവധി അനാവശ്യ റെക്കോര്ഡുകള് സ്വന്തം പേരില് കൂട്ടിചേര്ത്തിരുന്നു. ഉദ്ഘാടന മത്സരത്തില് തോല്ക്കുന്ന ആദ്യ ആതിഥേയ രാജ്യം, രണ്ട് മത്സരങ്ങള്ക്ക് ശേഷം ടൂര്ണമെന്റില് നിന്ന് പുറത്താകുന്ന ആദ്യ രാജ്യം, മൂന്ന് മത്സരങ്ങളും തോല്ക്കുന്ന ആദ്യ രാജ്യം എന്നീ നാണക്കേടുകള് അവര്ക്ക് ഏറ്റുവാങ്ങേണ്ടി വന്നിരുന്നു. ഒരു ഗോള് മാത്രം നേടുകയും ഏഴ് ഗോളുകള് വഴങ്ങുകയും ചെയ്ത അവര് കണക്കുകളുടെ അടിസ്ഥാനത്തില് ലോകകപ്പ് ചരിത്രത്തിലെ ഏറ്റവും മോശം ആതിഥേയ ടീമായിരുന്നു.
ശനിയാഴ്ച നടന്ന മത്സരത്തിന്റെ ഭൂരിഭാഗം സമയത്തും അവര് പഴയ കളി തന്നെയാണ് ആവര്ത്തിക്കുന്നതെന്നാണ് തോന്നിയത്. ഗോളിലേക്കുള്ള ഷോട്ടുകള്, പന്തിന്മേലുള്ള നിയന്ത്രണം , കോര്ണറുകള്, എക്സ്പെക്റ്റഡ് ഗോള്സ് (ഃഏ) തുടങ്ങി എല്ലാ കണക്കുകളിലും സ്വിറ്റ്സര്ലന്ഡ് തന്നെയായിരുന്നു മുന്നില്. എന്നിട്ടും, എല്ലാ ഫുട്ബോള് യുക്തികളെയും കാറ്റില്പ്പറത്തിക്കൊണ്ട് ഖൂഖി നേടിയ ആ ഹെഡ്ഡര് ഖത്തറിന്റെ ഫുട്ബോള് ചരിത്രത്തിലെ ഏറ്റവും മഹത്തായ നിമിഷമായി മാറി.
