മൂവാറ്റുപുഴ: സ്പാ ജീവനക്കാരിയായ യുവതിയെ അര്ധരാത്രിയില് പിന്തുടര്ന്ന് ആക്രമിക്കാന് ശ്രമിച്ച അഞ്ചു യുവാക്കള് അറസ്റ്റില്. മൂവാറ്റുപുഴ ഈസ്റ്റ് മാറാടി പള്ളിക്കവല ഭാഗത്ത് തട്ടാര്കുന്നേല് അജിത് (19), മീങ്കുന്നം പാറത്താഴത്ത് വീട്ടില് അദ്വൈത് (20), പഞ്ചായത്തുപടി ഭാഗത്ത് ചാവാട്ട് വീട്ടില് ടോമി ഷാജി (19), ഹൈസ്കൂളിനു സമീപം ചാരപ്പുറത്ത് പുത്തന്പുരയില് വീട്ടില് അര്ജുന് സനില് (20), മങ്ങമ്പ്ര ഭാഗത്ത് തെങ്ങനാല് വീട്ടില് അശ്വിന് രഘു (20) എന്നിവരെയാണ് മൂവാറ്റുപുഴ പോലീസ് ഇന്സ്പെക്ടര് അനില് ജോര്ജിന്റെ നേതൃത്വത്തിലുള്ള അന്വേഷണ സംഘം അറസ്റ്റ് ചെയ്തത്.
15 ന് അര്ധരാത്രിയായിരുന്നു കേസിനാസ്പദമായ സംഭവം. പിറവം റോഡില് പ്രവര്ത്തിക്കുന്ന സ്ഥാപനത്തില്നിന്ന് ജോലികഴിഞ്ഞു വീട്ടിലേക്കു പോകാന് കെ.എസ്.ആര്.ടി.സി ബസ് സ്റ്റാന്ഡിലേക്കു നടന്നുപോയ പാലാ സ്വദേശിനിക്കാണു ദുരനുഭവമുണ്ടായത്. ബൈക്കിലെത്തിയ യുവാക്കള് 130 ജംഗ്ഷനടുത്തുവച്ച് യുവതിയെ പിന്തുടരുകയും മോശമായി സമീപിക്കുകയുമായിരുന്നു. ഓടി രക്ഷപ്പെടാന് ശ്രമിച്ചപ്പോള് യുവതിയെ ബൈക്കിടിപ്പിക്കാനും ശ്രമിച്ചു. ഈസമയം അതുവഴിവന്ന ടിപ്പര് കൈകാണിച്ച് നിര്ത്തി യുവതി അതില് കയറി.
ഇതോടെ മാരകായുധങ്ങളുമായി സംഘം പതിനഞ്ച് കിലോമീറ്ററോളം ടിപ്പര് ലോറിയെ പിന്തുടര്ന്നു. അപകടം മനസിലാക്കിയ യുവതി ഇതോടെ ഫോണില് പോലീസിന്റെ സഹായം തേടി. തുടര്ന്ന് പോലിസ് പാഞ്ഞെത്തി യുവതിയെ സുരക്ഷിതയാക്കുകയായിരുന്നു. പോലീസ് ജീപ്പ് കണ്ടതോടെ അക്രമിസംഘം പിന്തിരിഞ്ഞുപോയി. പിന്നീട് ബൈക്കുകളുടെ നമ്പര് അടിസ്ഥാനമാക്കി നടത്തിയ അന്വേഷണത്തിലാണ് പ്രതികള് വലയിലായത്. അന്വേഷണ സംഘത്തില് എസ്.ഐമാരായ സി.ആര്. രഞ്ജുമോള്, എസ്. ശ്രീനാഥ്, എം.എം. ഉബൈസ്, എം.വി. ദിലീപ് കുമാര്, സീനിയര് സിവില് പോലീസ് ഓഫീസര്മാരായ എം.പി. രതീഷ്, ബോബി എബ്രാഹം, രഞ്ജിത് രാജന്, ബിനില് എല്ദോസ്, കെ.പി. നിസാര്, എം.ജി. ഷീജ എന്നിവരുമുണ്ടായിരുന്നു.
