ഗുജറാത്തിലെ ലോകപ്രശസ്തമായ ഗീര് ദേശീയോദ്യാനത്തില് നിന്നുള്ള മനോഹരമായ ഒരു വീഡിയോ ആണ് ഇപ്പോള് സോഷ്യല് മീഡിയയില് മൃഗസ്നേഹികളുടെ മനം കവരുന്നത്. സാധാരണയായി പുള്ളിപ്പുലികളെപ്പോലെ സിംഹങ്ങള് മരം കയറുന്നതില് അത്ര വിദഗ്ദ്ധരല്ല. എന്നാല് വലിയൊരു മരത്തിന്റെ മുകളിലേക്ക് കയറാന് ശ്രമിച്ച്, ഒടുവില് പാതിവഴിയില് വെച്ച് പരാജയം സമ്മതിച്ച് താഴേക്കിറങ്ങുന്ന ഒരു സിംഹക്കുട്ടിയുടെ കൗതുകമുണര്ത്തുന്ന ദൃശ്യങ്ങളാണ് ഈ വീഡിയോയിലുള്ളത്.
വീഡിയോയുടെ തുടക്കത്തില്, ഒരു സിംഹക്കുട്ടി അതീവ ആത്മവിശ്വാസത്തോടെ വലിയൊരു മരത്തിന്റെ തായ്ത്തടിയിലൂടെ മുകളിലേക്ക് കയറാന് ശ്രമിക്കുന്നത് കാണാം. പൂച്ചകളെപ്പോലെ നഖങ്ങള് മരത്തില് ആഴ്ത്തിയാണ് കക്ഷി മുകളിലേക്ക് നീങ്ങുന്നത്. എന്നാല് കുറച്ചു ദൂരം മുന്നോട്ട് പോയപ്പോഴാണ് മരംകയറ്റം താന് വിചാരിച്ചത്ര എളുപ്പമല്ലെന്ന് പുള്ളിക്കാരന് മനസ്സിലായത്. മുകളില് എത്തുന്നതിന് മുന്പ് തന്നെ ബാലന്സ് കിട്ടാതെ സിംഹക്കുട്ടി ഒന്ന് പതറി.
തുടര്ന്ന് മുകളിലേക്ക് നോക്കിയ സിംഹക്കുട്ടി, ഇനി മുന്നോട്ട് പോയാല് അപകടമാണെന്ന് മനസ്സിലാക്കി പതുക്കെ താഴേക്ക് ഇറങ്ങാന് തീരുമാനിക്കുകയായിരുന്നു. കയറിയതിനേക്കാള് പാടുപെട്ടാണ് കക്ഷി താഴേക്ക് വഴുതിയിറങ്ങിയത്. ഒടുവില് സുരക്ഷിതമായി നിലംതൊട്ടതോടെയാണ് സിംഹക്കുട്ടിക്ക് ശ്വാസം നേരെ വീണത്. സിംഹക്കുട്ടിയുടെ ഈ നിഷ്കളങ്കമായ ശ്രമവും ബുദ്ധിപൂര്വ്വമായ പിന്മാറ്റവും കണ്ടുനിന്ന ആരെയും ചിരിപ്പിക്കുന്നതാണ്.
ഐഎഫ്എസ് ഉദ്യോഗസ്ഥര് ഉള്പ്പെടെയുള്ള പ്രമുഖര് ഈ വീഡിയോ സോഷ്യല് മീഡിയയില് പങ്കുവെച്ചതോടെ ലക്ഷക്കണക്കിന് ആളുകളാണ് ഇത് കണ്ടുകഴിഞ്ഞത്. 'പരാജയം സമ്മതിച്ച് കൃത്യസമയത്ത് പിന്മാറുന്നതാണ് ബുദ്ധി എന്ന് ഈ കൊച്ചുമിടുക്കന് അറിയാം', 'സിംഹം കാട്ടിലെ രാജാവാണെങ്കിലും മരത്തില് പുലി തന്നെയാണ് രാജാവെന്ന് മനസ്സിലായിക്കാണും' എന്നിങ്ങനെ രസകരമായ കമന്റുകളാണ് വീഡിയോയ്ക്ക് താഴെ വന്നുകൊണ്ടിരിക്കുന്നത്.
Not every story of Gir echoes with a thunderous roar. Some unfold through the playful adventures of its youngest inhabitants. A curious lion cub, eager and bold, tries to conquer a tree, approaching the challenge with remarkable determination. This endearing moment reminds us… pic.twitter.com/WHM55zhpWa
— Parimal Nathwani (@mpparimal) June 17, 2026
