തിരുവനന്തപുരം: സംസ്ഥാനത്തെ ഡ്രൈവിങ് ലൈസൻസ് നടപടികളിൽ നിർണായക മാറ്റവുമായി മോട്ടോർ വാഹന വകുപ്പ് (എംവിഡി). ലൈറ്റ് മോട്ടോർ വെഹിക്കിൾ (എൽഎംവി) വിഭാഗത്തിലെ ഡ്രൈവിങ് ടെസ്റ്റിന്റെ പ്രധാന ഘടകമായ ‘എച്ച്’ ടെസ്റ്റിൽ ഇനി മുതൽ വാഹനം റിവേഴ്സ് ഗിയറിൽ നിയന്ത്രിക്കുമ്പോൾ റിയർവ്യൂ അഥവാ റിവേഴ്സ് ക്യാമറ ഉപയോഗിക്കാൻ അനുമതി നൽകും.
കേന്ദ്ര മോട്ടോർ വാഹന നിയമത്തിൽ വരുത്തിയ ഭേദഗതിയുടെ അടിസ്ഥാനത്തിലാണ് കേരളത്തിലും പുതിയ സംവിധാനം നടപ്പാക്കുന്നത്. ഡ്രൈവിങ് ടെസ്റ്റുകൾ കൂടുതൽ പ്രായോഗികവും ആധുനിക വാഹന സാങ്കേതികവിദ്യയുമായി യോജിച്ചതുമാക്കുകയെന്ന ലക്ഷ്യത്തോടെയാണ് തീരുമാനം.
നിലവിൽ വിപണിയിലെത്തുന്ന ഭൂരിഭാഗം വാഹനങ്ങളിലും റിവേഴ്സ് ക്യാമറ സംവിധാനങ്ങൾ സാധാരണ സവിശേഷതയായി ഉൾപ്പെടുത്തിയിരിക്കുന്ന സാഹചര്യത്തിലാണ് എംവിഡിയുടെ നടപടി. ഇതുവരെ ഡ്രൈവിങ് ടെസ്റ്റിനിടെ വാഹനത്തിന്റെ വശങ്ങളിലെയും ഉൾഭാഗത്തെയും മിററുകൾ മാത്രം ഉപയോഗിച്ചായിരുന്നു റിവേഴ്സ് ചെയ്യേണ്ടിയിരുന്നത്. റിവേഴ്സ് ക്യാമറയുടെ സഹായം അനുവദിച്ചിരുന്നില്ല.
പുതിയ തീരുമാനം ഡ്രൈവിങ് പരിശീലന രീതികളിലും ടെസ്റ്റ് നടപടിക്രമങ്ങളിലുമെല്ലാം മാറ്റത്തിന് വഴിയൊരുക്കുമെന്നാണ് വിലയിരുത്തൽ. സംസ്ഥാനത്തെ ഡ്രൈവിങ് ടെസ്റ്റ് കേന്ദ്രങ്ങളിൽ ഇത് ഉടൻ പ്രാബല്യത്തിൽ വരും.
