ന്യൂഡല്ഹി: ലോക്സഭയിലെ പ്രതിപക്ഷ നേതാവും മുതിര്ന്ന കോണ്ഗ്രസ് നേതാവുമായ രാഹുല് ഗാന്ധിയ്ക്ക് 56-ാം ജന്മദിനാശംസകള് നേര്ന്ന് പ്രധാനമന്ത്രി നരേന്ദ്രമോദി.
'' ലോക്സഭയിലെ പ്രതിപക്ഷ നേതാവ് ശ്രീ രാഹുല് ഗാന്ധി ജിയ്ക്ക് ജന്മദിനാശംസകള്. അദ്ദേഹത്തിന്റെ ആരോഗ്യത്തിനും ദീര്ഘായുസ്സിനും വേണ്ടി പ്രാര്ത്ഥിക്കുന്നു''- നരേന്ദ്ര മോദി എക്സില് കുറിച്ചു.
1970 ജൂണ് 19ന് മുന് പ്രധാനമന്ത്രി രാജീവ് ഗാന്ധിയുടെയും കോണ്ഗ്രസ് അധ്യക്ഷ സോണിയ ഗാന്ധിയുടെയും മകനായാണ് രാഹുല് ഗാന്ധി ജനിച്ചത്. ഡല്ഹിയിലെ സെന്റ് കൊളംബസ് സ്കൂള്, ഡെറാഡൂണിലെ ദൂണ് സ്കൂള് എന്നിവിടങ്ങളിലായിരുന്നു സ്കൂള് വിദ്യാഭ്യാസം. ഡല്ഹിയിലെ സെന്റ് സ്റ്റീഫന്സ് കോളേജില് ബിരുദ പഠനം ആരംഭിച്ചത്. തുടര്ന്ന് യു.എസിലെ ഹാര്വാര്ഡ് സര്വ്വകലാശാലയില് ചേര്ന്നെങ്കിലും, പിതാവ് രാജീവ് ഗാന്ധിയുടെ വധത്തെത്തുടര്ന്നുളള സുരക്ഷാ കാരണങ്ങളാല് അവിടെ നിന്ന് മാറി ഫ്ളോറിഡയിലെ റോളിന്സ് കോളേജില് പഠനം പൂറത്തിയാക്കി.
1995ല് യു.കെയിലെ കേംബ്രിഡ്ജ് സര്വ്വകലാശാലയുടെ കീഴിലുളള ട്രിനിറ്റി കോളേജില് നിന്ന് ഡെവലപ്മെന്റ് സ്റ്റഡീസില് എം.ഫില് ബിരുദം നേടി. പഠനശേഷം ലണ്ടനില് കുറച്ചു കാലം ജോലി ചെയ്തിരുന്നു. അതിനുശേഷം ഇന്ത്യയില് മടങ്ങിയെത്തി മുംബൈ ആസ്ഥാനമായി ഒരു ടെക്നോളജി ഔട്ട്സോഴ്സിങ് സ്ഥാപനം ആരംഭിക്കുകയും ചെയ്തു. 2004ലാണ് അദ്ദേഹം സജീവ രാഷ്ട്രീയത്തിലേക്ക് പ്രവേശിച്ചത്.
