മൂന്നാർ: ഇൻസ്റ്റഗ്രാം വഴി പരിചയപ്പെട്ട പ്ലസ്ടു വിദ്യാർത്ഥിനികളെ ലോഡ്ജിൽ എത്തിച്ച് പീഡിപ്പിച്ച കേസിൽ രണ്ട് തമിഴ്നാട് സ്വദേശികളെ പൊലീസ് അറസ്റ്റ് ചെയ്തു. ദിണ്ഡിഗൽ സ്വദേശികളായ പ്രതികളിൽ ഒരാൾ പ്രായപൂർത്തിയാകാത്തയാളാണെന്ന് പൊലീസ് അറിയിച്ചു.
ഇൻസ്റ്റഗ്രാം വഴിയാണ് പ്രതികൾ വിദ്യാർത്ഥിനികളുമായി ബന്ധം സ്ഥാപിച്ചത്. സ്കൂളിലേക്കെന്ന് പറഞ്ഞ് ഹോസ്റ്റലിൽ നിന്ന് പുറപ്പെട്ട കുട്ടികളെ മൂന്നാറിലെ ഒരു ലോഡ്ജിൽ എത്തിച്ച് രണ്ട് ദിവസത്തോളം താമസിപ്പിച്ച ശേഷം പീഡനത്തിനിരയാക്കിയെന്നാണ് പരാതി.
കുട്ടികൾ സ്കൂളിൽ എത്താത്തത് ശ്രദ്ധയിൽപ്പെട്ടതിനെ തുടർന്ന് അധ്യാപകർ നടത്തിയ അന്വേഷണത്തിലാണ് സംഭവത്തിന്റെ വിവരം പുറത്തായത്. ഹോസ്റ്റലിൽ നിന്ന് ഇറങ്ങിയ ശേഷം കുട്ടികൾ സ്കൂളിൽ എത്താത്തത് സംശയത്തിന് ഇടയാക്കിയിരുന്നു. തുടർന്ന് നടത്തിയ പ്രാഥമിക അന്വേഷണത്തിലാണ് പീഡനവിവരത്തിന്റെ സൂചന ലഭിച്ചത്.
ഉടൻ തന്നെ സ്കൂൾ അധികൃതർ പൊലീസിനെ വിവരം അറിയിച്ചു. കേസെടുത്ത പൊലീസ് അന്വേഷണം ആരംഭിച്ചിട്ടുണ്ട്. സംഭവ സ്ഥലമായ ലോഡ്ജിലെ സിസിടിവി ദൃശ്യങ്ങൾ അന്വേഷണ സംഘം ശേഖരിച്ചതായി അറിയിച്ചു.
