കോട്ടയം: മുഖ്യമന്ത്രി വി.ഡി. സതീശനെതിരെ രൂക്ഷവിമര്ശനവുമായി എന്.എസ്.എസ് ജനറല് സെക്രട്ടറി ജി. സുകുമാരന് നായര് രംഗത്ത്. വി.ഡി. സതീശന് വിചാരിച്ചാല് എന്.എസ്.എസിനെ ഒന്നും ചെയ്യാന് സാധിക്കില്ലെന്നും എന്നാല് എന്.എസ്.എസ് വിചാരിച്ചാല് പലതും സാധിക്കുമെന്നും അദ്ദേഹം ഓര്മ്മിപ്പിച്ചു. രണ്ടുതവണ ഔദ്യോഗികമായി അനുമതി തേടിയിട്ടും മുഖ്യമന്ത്രി കാണാന് തയ്യാറായില്ലെന്ന് വ്യക്തമാക്കിയ സുകുമാരന് നായര്, സതീശന് ഒരു അഹങ്കാരിയാണെന്നും കുറ്റപ്പെടുത്തി. എന്.എസ്.എസ് ബജറ്റ് സമ്മേളനത്തിനിടെയായിരുന്നു മുഖ്യമന്ത്രിക്ക് നേരെയുള്ള ഈ കടുത്ത പരാമര്ശം.
അതേസമയം, എന്.എസ്.എസ് ഡയറക്ടര് ബോര്ഡില് നിന്ന് കെ.ബി. ഗണേഷ് കുമാറിനെ ഒഴിവാക്കിയ നടപടിയിലും ജി. സുകുമാരന് നായര് പ്രതികരിച്ചു. സംഘടനയിലെ എല്ലാ തീരുമാനങ്ങളും പൂര്ണ്ണമായ ജനാധിപത്യ മര്യാദകള് അനുസരിച്ചാണ് എടുത്തിട്ടുള്ളതെന്ന് അദ്ദേഹം വ്യക്തമാക്കി. വര്ഷങ്ങളായി പദവികള് ലഭിക്കാത്ത നിരവധി പേര് സംഘടനയിലുണ്ടെന്നും അവര്ക്ക് കൂടി അവസരം നല്കേണ്ടതുണ്ടെന്നും അദ്ദേഹം പറഞ്ഞു. ഓരോ താലൂക്കിലെയും പ്രവര്ത്തനങ്ങള് വിലയിരുത്തിയാണ് ആളുകളെ മാറ്റുന്നതെന്നും ഇത്തവണ ഒരാളെ മാത്രമേ മാറ്റിയിട്ടുള്ളൂവെന്നും സുകുമാരന് നായര് കൂട്ടിച്ചേര്ത്തു.
ഗണേഷ് കുമാറിന്റെ കാലാവധി അവസാനിച്ചതിനാലാണ് വീണ്ടും ഡയറക്ടര് ബോര്ഡിലേക്ക് പരിഗണിക്കാതിരുന്നതെന്നും അല്ലാതെ അദ്ദേഹത്തെ പുറത്താക്കിയതല്ലെന്നും ജനറല് സെക്രട്ടറി വിശദീകരിച്ചു. സംഘടനയില് മികച്ച രീതിയില് പ്രവര്ത്തിക്കുന്ന മറ്റുള്ളവര്ക്ക് സ്ഥാനം നല്കേണ്ടതുണ്ട്. എന്.എസ്.എസിന്റെ ഈ തീരുമാനത്തില് എന്തെങ്കിലും തരത്തിലുള്ള പരാതികള് ഉണ്ടെങ്കില് ഗണേഷ് കുമാറിന് നിയമപരമായി കേസ് കൊടുക്കാവുന്നതാണെന്നും സുകുമാരന് നായര് വ്യക്തമാക്കി.
