കൊച്ചി: താരസംഘടന ' അമ്മ'യിലെ അംഗങ്ങള്ക്ക് തുറന്ന കത്തുമായി നടന് ടിനി ടോം. അനീതികള്ക്കെതിരെ ശബ്ദിച്ചതിന്റെ പേരില് താന്നെ ടാര്ഗറ്റ് ചെയ്തുവെന്ന് ടിനി ടോം ആരോപിച്ചു. അന്സിബയുടെ ആരോപണങ്ങള് പോലീസ് തളളിക്കളഞ്ഞതാണ്. ഒരു എഫ്ഐആര് പോലും തനിക്കെതിരെ രജിസ്റ്റര് ചെയ്തിട്ടില്ല. താന് ഇതൊന്നും മാധ്യമങ്ങളില് പോയി പറയാന് നിന്നില്ല. എല്ലാം ദൈവത്തിനും നീതിക്കും വിട്ടുകൊടുത്തു. ആരോടും പറയാതെ ഇറങ്ങിപ്പോയതില് ക്ഷമ ചോദിക്കുന്നു. അമ്മയുടെ സാധാരണ മെമ്പറായി തുടരുമെന്നും ടിനി ടോം വ്യക്തമാക്കി.
ടിനി ടോമിന്റെ കത്ത്:
'ആദ്യം നിങ്ങള് എല്ലാവരോടും ഞാന് നന്ദി അറിയിക്കട്ടേ, അമ്മയില് നടന്നിട്ടുള്ള എല്ലാ തെരെഞ്ഞെടുപ്പുകളിലും വലിയ ഭൂരിപക്ഷത്തില് എന്നെ വിജയിപ്പിച്ചതിനു 2018 മുതല് ഇന്നലവരെ അമ്മയുടെ എക്സിക്യൂട്ടീവില് ലാലേട്ടന്റെ കീഴിലും ഇപ്പോള് ശ്വേത മേനോന്റെ കീഴിലും സത്യസന്ധമായി എനിക്ക് കഴിയുംവിധം നിങ്ങള്ക്ക് വേണ്ടി പ്രവര്ത്തിക്കാന് സാധിച്ചു, അനീതികള്ക്കെതിരെ ഞാന് ശബ്ദിച്ചതിന്റെ പേരില് ഞാന് ടാര്ഗറ്റ് ചെയ്യപ്പെട്ടിരുന്നു. ആരോപണങ്ങള് പോലീസ് എഫ്ഐആര് എടുക്കാതെ നിരുപാധികം തള്ളി കളയുകയും എനിക്ക് ക്ലീന് ചിറ്റ് നല്കുകയും ചെയ്തു ഇതൊന്നും ഞാന് ഒരു ചാനലിലും വിളമ്പാന് പോയിട്ടില്ല എല്ലാം ദൈവത്തിനും നീതിക്കും മാത്രം വിട്ടുകൊടുത്തു. സത്യമേ ജയിക്കൂ അതാണ് തെളിഞ്ഞത്. ഇനി നിങ്ങളോട് ക്ഷമ ചോദിക്കുകയാണ്, ആരോടും പറയാതെ ഇറങ്ങി പോകുന്നതില്, എന്ന് കരുതി നിങ്ങളുടെ വിളികള് ഞാന് അവഗണിക്കില്ല എനിക്ക് പറ്റുന്ന വിധത്തില് ഞാന് നിങ്ങളോടൊപ്പം ഉണ്ടാകും എന്ന് നിങ്ങളുടെ സ്വന്തം സഹോദരന് ടിനി ടോം'
