സാധാരണയായി റോഡിലെ ചുവപ്പ് സിഗ്നലുകൾ കണ്ടാൽ ഡ്രൈവർമാർ വണ്ടി ബ്രേക്ക് ചവിട്ടാറുണ്ട്. എന്നാൽ കഴിഞ്ഞ ദിവസം ചൈനയിലെ ഹെനാൻ പ്രവിശ്യയിൽ ഒരു ക്യാബ് ഡ്രൈവർ കണ്ട ചുവപ്പ് സിഗ്നലുകൾ ട്രാഫിക് നിയമങ്ങളുടേതായിരുന്നില്ല, മറിച്ച് ഒരു മൂന്ന് വയസ്സുകാരിയുടെ ജീവന് മുന്നിൽ മിന്നിമറയുന്ന അപകടത്തിന്റെ അടയാളങ്ങളായിരുന്നു. 'ഷെങ്' എന്ന ക്യാബ് ഡ്രൈവർക്ക് മുന്നിലേക്ക് പരിഭ്രാന്തരായ ഒരു കുടുംബം അബോധാവസ്ഥയിലായ തങ്ങളുടെ കുഞ്ഞെയുമെടുത്ത് ഓടിക്കയറുമ്പോൾ, അതൊരു സാധാരണ യാത്രയാകില്ലെന്ന് അദ്ദേഹം ഉറപ്പിച്ചിരുന്നു.
കുഞ്ഞിന്റെ ശ്വാസം നിലയ്ക്കുന്ന അവസ്ഥ കണ്ടതോടെ ഷെങ്ങിന്റെ ഉള്ളിലെ ഡ്രൈവർ ഒരു സൂപ്പർ ഹീറോയായി മാറി. മുന്നിലുള്ളത് കിലോമീറ്ററുകളോളം നീളുന്ന ട്രാഫിക് ബ്ലോക്കാണെന്ന് മനസ്സിലാക്കിയ അദ്ദേഹം വണ്ടിക്ക് ചിറകുകൾ മുളപ്പിച്ചു. സാധാരണക്കാർ നിയമം ലംഘിക്കാൻ മടിക്കുന്ന ഓരോ സിഗ്നലുകളും അദ്ദേഹം പുല്ലുപോലെ വെട്ടിച്ചു മുന്നോട്ട് പാഞ്ഞു. വരാൻ പോകുന്ന വലിയ തുകയുടെ പിഴയോ, ക്യാബ് കമ്പനിയിൽ നിന്നുള്ള സസ്പെൻഷനോ, എന്തിനേറെ സ്വന്തം ലൈസൻസ് റദ്ദാകുമെന്ന ഭയമോ പോലും ആ സ്റ്റിയറിംഗിന് മേലുള്ള അദ്ദേഹത്തിന്റെ പിടി അയച്ചില്ല.
ആ നിമിഷത്തിൽ ഷെങ്ങിന്റെ മനസ്സിൽ ഒരൊറ്റ ലക്ഷ്യം മാത്രമേ ഉണ്ടായിരുന്നുള്ളൂ, എങ്ങനെയെങ്കിലും ഈ കുഞ്ഞിനെ ജീവനോടെ ആശുപത്രിയിൽ എത്തിക്കുക. റോഡിലെ ക്യാമറകളെല്ലാം ഫ്ലാഷുകൾ ഉതിർത്ത് അദ്ദേഹത്തിന്റെ നിയമലംഘനങ്ങൾ ഒപ്പിയെടുക്കുമ്പോഴും, അദ്ദേഹം വണ്ടിയുടെ ആക്സിലറേറ്റർ അമർത്തിക്കൊണ്ടേയിരുന്നു. ഒടുവിൽ ട്രാഫിക് നിയമങ്ങളെയെല്ലാം കാറ്റിൽപ്പറത്തി, സിനിമകളെ വെല്ലുന്ന വേഗതയിൽ അദ്ദേഹം കാർ ആശുപത്രി മുറ്റത്ത് കൊണ്ട് ചവിട്ടി നിർത്തി. സമയത്തിന് മെഡിക്കൽ സഹായം ലഭിച്ചതോടെ ആ കുഞ്ഞ് മരണവക്ത്രത്തിൽ നിന്നും അത്ഭുതകരമായി രക്ഷപ്പെടുകയും ചെയ്തു.
സംഗതി സോഷ്യൽ മീഡിയയിൽ വൈറലായതോടെ വലിയൊരു ട്വിസ്റ്റാണ് കഥയിലുണ്ടായത്. സാധാരണയായി ട്രാഫിക് നിയമം ലംഘിച്ചാൽ വടിയെടുക്കുന്ന പോലീസ്, ഇവിടെ ഡ്രൈവറുടെ വണ്ടിയുടെ നമ്പറിൽ വീണ എല്ലാ പിഴകളും ഒറ്റയടിക്ക് വെട്ടിമാറ്റി പൂജ്യമാക്കി! ഒരു കുഞ്ഞിന്റെ ജീവൻ രക്ഷിക്കാൻ കാണിച്ച ആ ധീരതയ്ക്ക് മുന്നിൽ നിയമം പോലും സല്യൂട്ട് അടിച്ചുവെന്ന് ചുരുക്കം. സ്വന്തം പോക്കറ്റ് ചോരുമെന്ന് ഉറപ്പായിട്ടും മറ്റൊരു കുടുംബത്തിന്റെ കണ്ണീരൊപ്പാൻ വണ്ടി പായിച്ച ഷെങ്ങിനെ സോഷ്യൽ മീഡിയ ഇപ്പോൾ 'റിയൽ ലൈഫ് ഹീറോ' എന്നാണ് വിശേഷിപ്പിക്കുന്നത്.
