തിരുവനന്തപുരം: മന്ത്രിസ്ഥാനമേറ്റ സണ്ണി ജോസഫ് കെപി.സി.സി. അധ്യക്ഷ പദവി ഒഴിയുന്നതോടെ പകരക്കാരനെ കണ്ടെത്താനുള്ള ചര്ച്ചകള് കോണ്ഗ്രസില് സജീവമായി. അഞ്ച് ലോക്സഭാംഗങ്ങളും ഒരു എം.എല്.എയും രംഗത്തുള്ള മത്സരത്തില് എട്ടുതവണ ലോക്സഭാംഗവും നിലവിലെ കെപി.സി.സി. വര്ക്കിങ് പ്രസിഡന്റുമായ കൊടിക്കുന്നില് സുരേഷിന് മുന്തൂക്കമുണ്ടെന്നാണ് പാര്ട്ടി കേന്ദ്രങ്ങളില്നിന്നുള്ള സൂചന.
ദളിത് വിഭാഗത്തിന് സംസ്ഥാന കോണ്ഗ്രസിന്റെ പരമോന്നത സംഘടനാ പദവി നല്കണമെന്ന വിലയിരുത്തലും അദ്ദേഹത്തിന്റെ സാധ്യത വര്ധിപ്പിച്ചിട്ടുണ്ട്. കെപി.സി.സി അധ്യക്ഷസ്ഥാനത്തിനായി ലോക്സഭാംഗങ്ങളായ ബെന്നി ബെഹനാന്, അടൂര് പ്രകാശ്, ഷാഫി പറമ്പില്, ആന്റോ ആന്റണി എന്നിവരും രംഗത്തുണ്ട്. എം.എല്.എമാരില്നിന്ന് മാത്യു കുഴല്നാടന് മാത്രമാണ് സജീവ പരിഗണനയിലുള്ളത്. സംഘടനാ പരിചയം, ഗ്രൂപ്പ് സന്തുലിതാവസ്ഥ, സാമൂഹിക സമവാക്യങ്ങള്, അടുത്ത നിയമസഭാ തെരഞ്ഞെടുപ്പിനുള്ള മുന്നൊരുക്കം എന്നിവ കണക്കിലെടുത്താണ് പുതിയ അധ്യക്ഷനെ കണ്ടെത്താനുള്ള നീക്കങ്ങള് നടക്കുന്നത്.
മുഖ്യമന്ത്രി, മന്ത്രിസഭ, കെപി.സി.സി. അധ്യക്ഷന് എന്നീ അധികാര കേന്ദ്രങ്ങള്ക്കിടയില് സാമൂഹിക സന്തുലിതാവസ്ഥ ഉറപ്പാക്കുകയെന്ന ലക്ഷ്യത്തോടെയാണ് കോണ്ഗ്രസ് നേതൃത്വം നീങ്ങുന്നത്. ദളിത് വിഭാഗത്തില്നിന്നുള്ള നേതാവിനെ കെപി.സി.സി അധ്യക്ഷനാക്കുന്നത് ശക്തമായ രാഷ്ട്രീയ സന്ദേശമാകുമെന്നാണ് വിലയിരുത്തല്. അധ്യക്ഷ സ്ഥാനത്തിനായുള്ള ചരടുവലികള് ഡല്ഹിയിലേക്കും നീണ്ടിട്ടുണ്ട്.
വിവിധ ഗ്രൂപ്പുകളും നേതാക്കളും തങ്ങളുടെ നിലപാടുകള് ഹൈക്കമാന്ഡിനെ അറിയിച്ചുകഴിഞ്ഞു. ദീര്ഘകാല പാര്ലമെന്ററി പരിചയവും സംഘടനാ രംഗത്തെ സജീവ സാന്നിധ്യവും സാമൂഹിക പ്രാതിനിധ്യവും കണക്കിലെടുക്കുമ്പോള് കൊടിക്കുന്നിലിന് നിലവില് മേല്ക്കൈയുണ്ടെന്നാണ് കോണ്ഗ്രസ് വൃത്തങ്ങള് വിലയിരുത്തുന്നത്.
2021ല് കെ. സുധാകരന് കെപി.സി.സി അധ്യക്ഷനായതിന് ശേഷം സംസ്ഥാന കോണ്ഗ്രസ് സംഘടനയില് വലിയ മാറ്റങ്ങളാണുണ്ടായത്. യു.ഡി.എഫ്. അധികാരത്തിലെത്തിയ സാഹചര്യത്തില് സംഘടനയെയും സര്ക്കാരിനെയും ഒരുപോലെ മുന്നോട്ടുകൊണ്ടുപോകാന് കഴിയുന്ന നേതാവിനെ കണ്ടെത്തുകയെന്ന വെല്ലുവിളിയാണ് ഹൈക്കമാന്ഡിന് മുന്നിലുള്ളത്. പുതിയ അധ്യക്ഷനെ സംബന്ധിച്ച അന്തിമ തീരുമാനം ദിവസങ്ങള്ക്കകം ഉണ്ടാകുമെന്നാണു സൂചന.
