തിരുവനന്തപുരം: പുതിയ സർക്കാരിന്റെ മദ്യനയം വലിയ അഴിമതി ലക്ഷ്യം വെച്ച് അതിവേഗത്തിൽ തീർപ്പാക്കിയതാണെന്ന് ബിജെപി സംസ്ഥാന അധ്യക്ഷൻ കെ. സുരേന്ദ്രൻ. സമൂഹത്തിൽ ദൂരവ്യാപകമായ പ്രത്യാഘാതങ്ങൾ ഉണ്ടാക്കുന്നതാണ് ഈ പുതിയ തീരുമാനം. കൂടുതൽ കൗമാരക്കാരെയും സ്ത്രീകളെയും മദ്യപാനത്തിലേക്ക് നയിക്കാൻ മാത്രമേ ഇത് ഉപകരിക്കൂ. മുഖ്യമന്ത്രി സത്യപ്രതിജ്ഞ ചെയ്ത ഉടൻ തന്നെ 'മിസൈൽ വേഗത്തിലാണ്' ഈ ഫയൽ തീർപ്പാക്കിയതെന്നും ഇതിന് പിന്നിൽ ഗുരുതരമായ അഴിമതി ആരോപണങ്ങളാണ് ഉയരുന്നതെന്നും സുരേന്ദ്രൻ വാർത്താസമ്മേളനത്തിൽ പറഞ്ഞു.
ഇന്ദിര ഗ്യാരണ്ടിയിൽ പറഞ്ഞ കാര്യങ്ങൾ നടപ്പാക്കാൻ വിപുലമായ ചർച്ച വേണമെന്ന് പറയുന്ന മുഖ്യമന്ത്രി, മദ്യനയം പോലുള്ള ഒരു സുപ്രധാന വിഷയം ജനങ്ങളുമായോ പാർട്ടിയിലോ മുന്നണിയിലോ മന്ത്രിസഭയിലോ പോലും ചർച്ച ചെയ്യാതെ തീരുമാനമെടുത്തത് ദുരൂഹമാണ്. മദ്യനയവും കരിമണൽ ഖനനവും സംബന്ധിച്ച തീരുമാനങ്ങൾ എടുത്തതിന് പിന്നിൽ അടിയന്തരമായ എന്ത് സാഹചര്യമാണുണ്ടായിരുന്നതെന്ന് വ്യക്തമാക്കണം. മുഖ്യമന്ത്രിയുടെ ദുരൂഹമായ മംഗലാപുരം യാത്രകളും കർണാടകയിലേക്കുള്ള ഇടയ്ക്കിടെയുള്ള സന്ദർശനങ്ങളും ഇതിനോടൊപ്പം കൂട്ടി വായിക്കേണ്ടതാണെന്നും അദ്ദേഹം സംശയം പ്രകടിപ്പിച്ചു.
സ്വന്തം എക്സൈസ് മന്ത്രിയെപ്പോലും ഇരുട്ടിൽ നിർത്തിയാണ് മുഖ്യമന്ത്രി ഈ തീരുമാനമെടുത്തത്. വിഷയത്തിൽ പ്രതിപക്ഷ നേതാവ് വി.ഡി. സതീശൻ സ്വീകരിച്ചിരിക്കുന്നത് കടുത്ത യുടേൺ ആണ്. മുൻപ് വലിയ രീതിയിൽ വാചകക്കസർത്ത് നടത്തിയ സതീശൻ ഇപ്പോൾ ഈ നയവ്യതിയാനത്തെക്കുറിച്ച് മൗനം പാലിക്കുകയാണ്. ഈ മദ്യനയ മാറ്റത്തെക്കുറിച്ച് പ്രതിപക്ഷ മുന്നണിയായ യുഡിഎഫ് അറിഞ്ഞിരുന്നോ എന്ന് വ്യക്തമാക്കണം. യുഡിഎഫിനെ വിജയിപ്പിക്കാൻ അഹോരാത്രം കഷ്ടപ്പെട്ട മത-സാമുദായിക സംഘടനകൾക്ക് ഈ ജനദ്രോഹ നയത്തിൽ എന്താണ് പറയാനുള്ളതെന്നും, കോൺഗ്രസ് നേതാവ് വി.എം. സുധീരന്റെയും ഹൈക്കമാൻഡിന്റെയും നിലപാട് എന്താണെന്നും സുരേന്ദ്രൻ ചോദിച്ചു.
ബജറ്റിന്റെ രഹസ്യം സൂക്ഷിക്കാനാണ് തീരുമാനങ്ങൾ ചർച്ച ചെയ്യാതിരുന്നതെന്ന് പറയുന്ന ആഭ്യന്തരമന്ത്രി ആരെയാണ് കബളിപ്പിക്കാൻ നോക്കുന്നതെന്നും അദ്ദേഹം ചോദിച്ചു. സർക്കാരിന്റെ ഈ അഴിമതി നിറഞ്ഞ മദ്യനയത്തിനെതിരെ ബിജെപി ശക്തമായ ജനകീയ പ്രതിഷേധം സംഘടിപ്പിക്കും. അതേസമയം, കേന്ദ്ര മന്ത്രിസഭ പുനസംഘടനയിൽ അനൂപ് ആന്റണി, സാബു ജേക്കബ് എന്നിവർക്ക് സാധ്യതയുണ്ടോ എന്ന ചോദ്യത്തിന്, അത്തരം കാര്യങ്ങൾ പ്രധാനമന്ത്രിയുടെ തലത്തിൽ തീരുമാനിക്കേണ്ടതാണെന്നും ഇവിടെയിരുന്ന് തനിക്ക് അതിൽ മറുപടി പറയാൻ കഴിയില്ലെന്നും സുരേന്ദ്രൻ വ്യക്തമാക്കി.
