നെഞ്ചുവേദന, അമിതമായി വിയര്ക്കുക, കൈകള്ക്ക് തരിപ്പ് അനുഭവപ്പെടുക എന്നിവ ഹൃദയാഘാതത്തിന്റെ ലക്ഷണങ്ങളായി തോന്നാം. പരിഭ്രാന്തി അല്ലെങ്കില് പരിഭ്രമം കാരണം ഉണ്ടാകുന്ന ഇത്തരം അസ്വസ്ഥതകള് (Panic Attack) യഥാര്ത്ഥത്തില് ഒരു ഹൃദയാഘാതത്തിന് കാരണമാകുമോ എന്ന് ഹാര്ട്ട് സര്ജന് ഡോ. ജെറമി ലണ്ടന് തന്റെ ഇന്സ്റ്റഗ്രാം പേജിലൂടെ വിശദീകരിച്ച ചില കാര്യങ്ങളാണ് പ്രധാനം.
നെഞ്ചുവേദന, വിയര്ക്കല്, കൈകളില് തരിപ്പ്, അമിതമായ നെഞ്ചിടിപ്പ്-ഭയമുണര്ത്തുന്ന ഈ ലക്ഷണങ്ങള് സാധാരണയായി ഹൃദയാഘാതവുമായി ബന്ധപ്പെട്ടതാണ്. എന്നാല്, പരിഭ്രാന്തി ശക്തമാകുന്ന സമയത്തും (Panic Attack) ഇവ സാധാരണയായി ഉണ്ടാകാറുണ്ട്. ഇതാണ് കടുത്ത ഉത്കണ്ഠ നിറഞ്ഞ ഇത്തരം അവസ്ഥകള് യഥാര്ത്ഥത്തില് ഒരു ഹൃദയാഘാതത്തിന് കാരണമാകുമോ എന്ന് പലരെയും ചിന്തിപ്പിക്കുന്നത്.
പാനിക് അറ്റാക്കും ഹൃദയാഘാതവും സമാനമായി തോന്നുന്നത് എന്തുകൊണ്ട്?
'ഒരു പാനിക് അറ്റാക്ക് ഹൃദയാഘാതത്തിന് കാരണമാകുമോ? ആരോഗ്യവാനായ ഒരാളില് ഇതിനുള്ള സാധ്യത ഇല്ലെന്നുതന്നെ പറയാം,' - ഡോ. ലണ്ടന് പറഞ്ഞു. 'പക്ഷേ പ്രശ്നം എന്തെന്നാല്, ഇവയുടെ ലക്ഷണങ്ങള് തമ്മില് വലിയ സാമ്യമുണ്ട് എന്നതാണ്നെഞ്ചുവേദന, വിയര്ക്കല്, കൈകളിലേക്ക് പടരുന്ന തരിപ്പ് എന്നിവയെല്ലാം രണ്ടിലും ഉണ്ടാകാം.' ലക്ഷണങ്ങള് സമാനമായി തോന്നാമെങ്കിലും ശരീരത്തിനുള്ളില് നടക്കുന്ന പ്രക്രിയകള് തികച്ചും വ്യത്യസ്തമാണ്. 'ഹൃദയാഘാതത്തില്, ഹൃദയത്തിലെ ധമനികളില് (Coronary arteries) തടസ്സമുണ്ടാകുന്നു. എന്നാല് പാനിക് അറ്റാക്കില്, ശരീരത്തില് സ്ട്രെസ് ഹോര്മോണുകള് (മാനസിക സമ്മര്ദ്ദമുണ്ടാക്കുന്ന ഹോര്മോണുകള്) പെട്ടെന്ന് അമിതമായി ഉത്പാദിപ്പിക്കപ്പെടുകയാണ് ചെയ്യുന്നത്,' - അദ്ദേഹം വിശദീകരിച്ചു.
ലക്ഷണങ്ങളിലെ ഈ സാമ്യം കൊണ്ടാണ് ആളുകള് അടിയന്തിര വൈദ്യസഹായം തേടുന്നതിനുള്ള ഏറ്റവും പ്രധാനപ്പെട്ട കാരണങ്ങളിലൊന്നായി നെഞ്ചുവേദന മാറുന്നത്. 'അടിയന്തിര വിഭാഗത്തില് (Emergency Room) ആളുകള് എത്തുന്നതിനുള്ള ഏറ്റവും പൊതുവായ കാരണങ്ങളിലൊന്ന് നെഞ്ചുവേദനയാണ്, അത് തികച്ചും ശരിയായ കാര്യവുമാണ്,' - ഡോ. ലണ്ടന് ചൂണ്ടിക്കാണിച്ചു.
ഇടയ്ക്കിടെയുണ്ടാകുന്ന പാനിക് അറ്റാക്കുകള് ഹൃദയാരോഗ്യത്തെ ബാധിക്കുമോ?
ആരോഗ്യമുള്ള ഒരാളില് ഒറ്റപ്പെട്ട പാനിക് അറ്റാക്ക് ഹൃദയാഘാതത്തിന് കാരണമാകാന് സാധ്യതയില്ലെങ്കിലും, വിട്ടുമാറാത്ത ഉത്കണ്ഠ അവഗണിക്കരുതെന്ന് ഡോ. ലണ്ടന് പറഞ്ഞു. 'വിട്ടുമാറാത്തതും ഇടയ്ക്കിടെ ഉണ്ടാകുന്നതുമായ പാനിക് അറ്റാക്കുകള് ഹൃദ്രോഗ സാധ്യത വര്ദ്ധിപ്പിക്കുമെന്ന കാര്യം എടുത്തുപറയേണ്ടതുണ്ട്,' - അദ്ദേഹം പറഞ്ഞു. 'നിങ്ങള്ക്ക് നേരത്തെ തന്നെ ഹൃദ്രോഗ ചരിത്രമുണ്ടെങ്കില്, ഇത് അതിനെ കൂടുതല് ദോഷകരമായി ബാധിച്ചേക്കാം.'
മാനസിക സമ്മര്ദ്ദവും ഉത്കണ്ഠയും കാലക്രമേണ ഹൃദയമിടിപ്പ് വ്യവസ്ഥയ്ക്ക് മേല് തുടര്ച്ചയായ ഭാരം അടിച്ചേല്പ്പിക്കുന്നു, ഇത് ദീര്ഘകാലാടിസ്ഥാനത്തില് ആരോഗ്യപ്രശ്നങ്ങള്ക്ക് കാരണമായേക്കാം. എങ്കിലും, ആരോഗ്യകരമായ ഒരു ഹൃദയത്തിന് പാനിക് അറ്റാക്കിനെ അതിജീവിക്കാന് സാധിക്കുമെന്ന് ഡോ. ലണ്ടന് ഉറപ്പുനല്കുന്നു. 'ആരോഗ്യമുള്ള ഒരു ഹൃദയത്തിന് പാനിക് അറ്റാക്കിനെ താങ്ങാന് കഴിയുമെന്ന് മനസ്സിലാക്കുക. എന്നാല് പാനിക് അറ്റാക്ക് എന്നത് യഥാര്ത്ഥത്തിലുള്ള ഒരു അവസ്ഥയാണ്, അത് കാലക്രമേണ ശരീരത്തെ ബാധിക്കാം.'
വിട്ടുമാറാത്ത ഉത്കണ്ഠയ്ക്ക് കൃത്യമായ ചികിത്സ തേടേണ്ടതിന്റെ പ്രാധാന്യവും അദ്ദേഹം എടുത്തുപറഞ്ഞു, ഫലപ്രദമായ ചികിത്സാ രീതികള് ലഭ്യമാണെന്നും അദ്ദേഹം കൂട്ടിച്ചേര്ത്തു. 'വളരെ ഫലപ്രദമായ ചികിത്സാ പ്രോട്ടോക്കോളുകള് നിലവിലുണ്ട്. അതിനാല് എന്തെങ്കിലും അസ്വസ്ഥതയോ സംശയമോ തോന്നിയാല് പരിശോധന നടത്തുക.' പാനിക് അറ്റാക്കിനും ഹൃദയാഘാതത്തിനും ഒരേപോലെയുള്ള പല ഭയപ്പെടുത്തുന്ന ലക്ഷണങ്ങളും ഉണ്ടാകാമെങ്കിലും, അവ രണ്ടും ഒന്നല്ല. വൈദ്യപരിശോധനയില്ലാതെ ഇവ തമ്മിലുള്ള വ്യത്യാസം തിരിച്ചറിയുക ബുദ്ധിമുട്ടായതിനാല്, ലക്ഷണങ്ങള് ആശങ്കയുണ്ടാക്കുമ്പോള് ഉടനടി അടിയന്തിര വൈദ്യസഹായം തേടേണ്ടത് പ്രധാനമാണ്.
