താമരശ്ശേരി: കുട്ടികള്‍ മദ്യപിക്കുന്നതായുള്ള സംശയത്തെ തുടര്‍ന്ന് വിദ്യാര്‍ത്ഥിയുടെ ബാഗില്‍ നടത്തിയ പരിശോധനയില്‍ വാറ്റുചാരായം പിടിച്ചു. താമരശ്ശേരിയില്‍ നടന്ന സംഭവത്തില്‍ വിദ്യാര്‍ത്ഥിയുടെ രണ്ടാനച്ഛനെ പോലീസ് തിരയുകയാണ്. കുട്ടിയുടെ വീടിന് സമീപത്ത് നിന്നും 56 കുപ്പി വാറ്റുചാരായം പിടിക്കുകയും ചെയ്തിട്ടുണ്ട്. പൊതുവിദ്യാലയത്തില്‍ പഠിക്കുന്ന കുട്ടിയുടെ ബാഗില്‍ നിന്നുമാണ് ചാരായം കണ്ടെത്തിയത്.
സ്‌കൂളിന്റെയോ കുട്ടിയുടേയോ വിവരങ്ങള്‍ പുറത്തുവിട്ടിട്ടില്ല. കഴിഞ്ഞ ദിവസം ക്ലാസ്സിലെ കുട്ടികള്‍ മദ്യപിച്ചു വരുന്നതായി അദ്ധ്യാപകര്‍ കണ്ടെത്തിയതിനെ തുടര്‍ന്നാണ് സംശയമുള്ള കുട്ടിയുടെ ബാഗ് പരിശോധന നടത്തിയത്. തുടര്‍ന്ന് വാട്ടര്‍ബോട്ടില്‍ നിന്നും അരലിറ്റര്‍ വാറ്റുചാരായം കണ്ടെത്തുകയായിരുന്നു. കുട്ടിയെ ചോദ്യം ചെയ്തപ്പോള്‍ മറ്റൊരു കുട്ടി കൊണ്ടുവന്നതാണെന്നായിരുന്നു കിട്ടിയ മറുപടി.
അദ്ധ്യാപകര്‍ തുടര്‍ന്ന് പോലീസിനെ വിവരം അറിയിക്കുകയായിരുന്നു. പോലീസ് നടത്തിയ വിശദമായ ചോദ്യം ചെയ്യലില്‍ രക്ഷിതാവ് തന്നെ വാറ്റുന്ന ചാരായമാണ് എന്നും അതില്‍ നിന്നും എടുത്തുകൊണ്ടുവരികയായിരുന്നു എന്നും കുട്ടി പോലീസിന് മൊഴി നല്‍കി. പിന്നീട് കുട്ടിയുടെ വീടിന് സമീപത്തെ റബ്ബര്‍തോട്ടത്തില്‍ നടത്തിയ പരിശോധനയില്‍ 56 കുപ്പി വാറ്റുചാരായം പിടികൂടുകയായിരുന്നു. കുട്ടിയുടെ രണ്ടാനച്ഛനാണ് വാറ്റിയിരുന്നതെന്ന് പോലീസ് കണ്ടെത്തിയിട്ടുണ്ട്. ഇയാള്‍ ഒളിവില്‍ പോയിരിക്കുകയാണ്.
Comments