ന്യൂഡൽഹി: മനസ്സ് തകർക്കുന്ന വേദനയിലും തന്റെ ഒന്നരവയസ്സുകാരി മകളെ ഓർത്ത് വിതുമ്പിക്കൊണ്ട് ഒരു ഇരുപത്തിനാലുകാരി ഈ ലോകത്തോട് വിടപറഞ്ഞു. ഡൽഹിയിലെ നങ്ലോയിൽ ഭർതൃവീട്ടിലെ കിടപ്പുമുറിയിൽ ഫാനിൽ തൂങ്ങിമരിച്ച നിലയിൽ കണ്ടെത്തിയ ടീന എന്ന പെൺകുട്ടിയുടെ മരണം കേവലമൊരു വാർത്തയല്ല, മറിച്ച് കണ്ണീരോടെയല്ലാതെ വായിച്ചുതീർക്കാൻ കഴിയാത്ത ഒരു വലിയ നോവാണ്. മരണത്തിലേക്ക് പോകും മുൻപ് അവൾ തന്റെ മൊബൈൽ ഫോണിൽ റെക്കോർഡ് ചെയ്ത് വെച്ച മൂന്ന് മിനിറ്റോളം നീളുന്ന വീഡിയോ സന്ദേശം കേൾക്കുന്ന ആരുടെയും കണ്ണുകൾ ഈറനണിയും.
താൻ ഏറെ സ്നേഹിച്ച മാതാപിതാക്കളെയും ഭർത്താവിനെയും സാക്ഷി നിർത്തിയാണ് ടീന ആ അവസാന വീഡിയോ ചിത്രീകരിച്ചത്. തന്റെ വേർപാടിൽ മാതാപിതാക്കൾ തകർന്നുപോകരുതെന്നും പരസ്പരം വഴക്കിടാതെ ജീവിക്കണമെന്നും അവൾ കെഞ്ചുന്നുണ്ടായിരുന്നു. എല്ലാത്തിനുമുപരി, അവൾക്ക് ഒരേയൊരു ആഗ്രഹം മാത്രമാണുണ്ടായിരുന്നത്, തന്റെ ജീവനായ ഒന്നരവയസ്സുകാരി മകൾ. മകളെ അമ്മയും അച്ഛനും നന്നായി നോക്കണമെന്നും അവളുടെ സംരക്ഷണം ഭർത്താവ് ഉൾപ്പെടെ മറ്റാർക്കും വിട്ടുകൊടുക്കരുതെന്നും ആ അമ്മ മനസ്സ് പൊട്ടിക്കരഞ്ഞുകൊണ്ട് അപേക്ഷിച്ചു.
ഒരു ചെറിയ കുടുംബമായി സമാധാനത്തോടെ ജീവിക്കാനായിരുന്നു താൻ ആഗ്രഹിച്ചതെന്ന് അവൾ പറയുന്നു. എന്നാൽ ഭർതൃവീട്ടിൽ നിന്നും നേരിടേണ്ടി വന്ന ക്രൂരമായ മാനസിക പീഡനങ്ങൾ ആ പെൺകുട്ടിയുടെ താങ്ങാവുന്നതിലും അപ്പുറമായിരുന്നു. ഒടുവിൽ താൻ ആഭിചാരക്രിയകൾ നടത്തി എന്ന തരത്തിലുള്ള കള്ളക്കഥകൾ കൂടി ഭർതൃവീട്ടുകാർ കെട്ടിച്ചമച്ചപ്പോൾ ആത്മാഭിമാനമുള്ള ആ പെൺകുട്ടി പൂർണ്ണമായി തകർന്നുപോയി. ഭർത്താവിന്റെ സ്വഭാവദൂഷ്യവും പീഡനങ്ങളും കാരണം ഇനിയൊരിക്കലും മുന്നോട്ട് പോകാൻ കഴിയില്ലെന്ന് തിരിച്ചറിഞ്ഞ നിമിഷമാണ് അവൾ മരണത്തിലേക്ക് നടന്നുപോയത്.
രണ്ടര വർഷം മുൻപ് ഏറെ പ്രതീക്ഷകളോടെയായിരുന്നു രോഹിത്തുമായുള്ള ടീനയുടെ വിവാഹം കഴിഞ്ഞത്. മകൾക്ക് ഒന്നര വയസ്സ് തികയുമ്പോഴേക്കും ആ അമ്മയ്ക്ക് ഈ ലോകം വിടേണ്ടി വന്നു. ടീനയുടെ അമ്മയുടെ മൊഴി പ്രകാരം ഭർത്താവ് രോഹിത് മദ്യപിച്ചെത്തി അവളെ ശാരീരികമായി ക്രൂര പീഡനത്തിനിരയാക്കുമായിരുന്നു. ഏതാനും മാസങ്ങൾക്ക് മുൻപ് ഉണ്ടായ ഒരു അപകടത്തെ തുടർന്ന് തലയ്ക്ക് ഗുരുതരമായി പരിക്കേറ്റ രോഹിത് നിലവിൽ ആശുപത്രിയിൽ തീവ്രപരിചരണ വിഭാഗത്തിലാണ്. ഒരു വശത്ത് ജീവിതത്തോട് പോരാടുന്ന ഭർത്താവും മറുവശത്ത് ഭർതൃവീട്ടുകാരുടെ പീഡനം മൂലം ജീവനൊടുക്കിയ അമ്മയും, ഒടുവിൽ ഒന്നുമറിയാതെ തനിച്ചായിപ്പോയ ഒരു പിഞ്ചുകുഞ്ഞും.
(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല. മാനസിക ബുദ്ധിമുട്ടുകൾ ഉണ്ടായാൽ സഹായത്തിനായി ബന്ധപ്പെടുക - കേരള സർക്കാർ ദിശ ഹെൽപ്പ്ലൈൻ: 1056)
