ചെന്നൈ: തമിഴ്നാട് മുഖ്യമന്ത്രി വിജയ് 300 പുതിയ തമിഴ്നാട് സ്റ്റേറ്റ് ട്രാന്സ്പോര്ട്ട് കോര്പ്പറേഷന് ബസുകള് ഫ്ലാഗ് ഓഫ് ചെയ്തു, പുതുതായി നിരത്തിലിറക്കിയ ബസുകളിലൊന്നില് അദ്ദേഹം യാത്രയും ചെയ്തു. ബസിന്റെ മുന്സീറ്റിലിരുന്ന് അദ്ദേഹം വീഡിയോ എടുക്കുന്നതും കാണാമായിരുന്നു.
സെക്രട്ടേറിയറ്റിലായിരുന്നു ഫ്ളാഗ്ഓഫ്. ബസുകള് ഔദ്യോഗികമായി ടി.എന്.എസ്.ടി.സി ഫ്ലീറ്റിലേക്ക് ഉള്പ്പെടുത്തിയെങ്കിലും, ഈ വാഹനങ്ങളുടെ ജില്ലാടിസ്ഥാനത്തിലുള്ള വിതരണവും റൂട്ട് വിവരങ്ങളും ഗതാഗത വകുപ്പ് അധികൃതര് ഇതുവരെ പ്രഖ്യാപിച്ചിട്ടില്ല. 300 പുതിയ ബസുകള് സര്വീസ് ആരംഭിക്കുന്നത് തമിഴ്നാട്ടിലെ പൊതുഗതാഗത സംവിധാനത്തിന്റെ കാര്യക്ഷമത വര്ദ്ധിപ്പിക്കുമെന്നാണ് പ്രതീക്ഷിക്കുന്നത്.
യാത്രാക്കാരുടെ തിരക്കും നിലവിലുള്ള ബസുകളുടെ അവസ്ഥയും പരിഗണിച്ച് ബസുകള് വിവിധ റൂട്ടുകളിലേക്ക് വിതരണം ചെയ്യും. ഈ പദ്ധതി കണക്റ്റിവിറ്റിയും സര്വീസുകളുടെ എണ്ണവും വര്ദ്ധിപ്പിക്കാന് ലക്ഷ്യമിടുന്നു, പ്രത്യേകിച്ച് തിരക്കേറിയ റൂട്ടുകളില് ഇത് യാത്രക്കാര്ക്ക് ഏറെ പ്രയോജനം ചെയ്യും.
യഥാര്ത്ഥത്തില് ജൂണ് 22-ന് മുഖ്യമന്ത്രിയുടെ ജന്മദിനത്തോട് അനുബന്ധിച്ചായിരുന്നു ഈ ഉദ്ഘാടനം നിശ്ചയിച്ചിരുന്നത്. ഇതിനായി സംസ്ഥാനത്തിന്റെ വിവിധ ഭാഗങ്ങളില് നിന്നുള്ള ബസുകള് നേരത്തെ തന്നെ ചെന്നൈയിലെത്തിച്ച് കോയമ്പേട്, കിളമ്പാക്കം ബസ് ടെര്മിനലുകള് ഉള്പ്പെടെയുള്ള പ്രധാന സ്ഥലങ്ങളില് പാര്ക്ക് ചെയ്തിരുന്നു. എന്നാല് ചടങ്ങ് വ്യാഴാഴ്ചത്തേക്ക് മാറ്റിവെക്കുകയായിരുന്നു.
പ്രവര്ത്തന ആവശ്യങ്ങള്, യാത്രക്കാരുടെ എണ്ണം, നിലവിലുള്ള ബസുകളുടെ അവസ്ഥ എന്നിവയുടെ അടിസ്ഥാനത്തില് 300 ബസുകളും വിവിധ സംസ്ഥാന ഗതാഗത കോര്പ്പറേഷനുകളിലായി വിന്യസിക്കുമെന്ന് അധികൃതര് അറിയിച്ചു. ഓരോ ജില്ലയ്ക്കും ഡിവിഷനും അല്ലെങ്കില് ട്രാന്സ്പോര്ട്ട് കോര്പ്പറേഷനും എത്ര ബസുകള് വീതം ലഭിക്കുമെന്നതിനെക്കുറിച്ചുള്ള കൃത്യമായ വിവരങ്ങള് ഇതുവരെ പുറത്തുവിട്ടിട്ടില്ല.
