ഒറ്റയ്ക്കുള്ള യാത്രകള് സ്വാതന്ത്ര്യവും പുതിയ അനുഭവങ്ങളും തരുമെങ്കിലും, കൃത്യമായ പ്ലാനിംഗ് ഇല്ലെങ്കില് അത് മാനസിക സമ്മര്ദ്ദത്തിന് കാരണമായേക്കാം. സോളോ ട്രിപ്പുകള് എളുപ്പമാക്കാന് ട്രാവല് വിദഗ്ദ്ധര് നിര്ദ്ദേശിക്കുന്ന 5 വഴികള് ഇതാ :
1. ബഡ്ജറ്റ് നിശ്ചയിക്കുക, യാത്രയുടെ ലക്ഷ്യം മനസ്സിലാക്കുക
യാത്ര പ്ലാന് ചെയ്യുമ്പോള് ആദ്യം ശ്രദ്ധിക്കേണ്ടത് പണമാണ്. നിങ്ങളുടെ ആകെ ബഡ്ജറ്റിനെ കൃത്യമായി തരംതിരിക്കുക:
* വിമാന/ട്രെയിന് ടിക്കറ്റുകള്, താമസം
* പ്രാദേശിക യാത്രകള്, ഭക്ഷണം
* ടിക്കറ്റ് നിരക്കുകള്, ഷോപ്പിംഗ്
* അടിയന്തിര സാഹചര്യങ്ങള്ക്കായുള്ള പണം (Contingency fund)
* കൂട്ടമായി പോകുമ്പോള് ചെലവുകള് പങ്കിടാന് ആളുണ്ടാകും, എന്നാല് ഒറ്റയ്ക്കാകുമ്പോള് എല്ലാ സാമ്പത്തിക കാര്യങ്ങളും നിങ്ങള് തന്നെ കൈകാര്യം ചെയ്യണം. ഒപ്പം ഈ യാത്ര എന്തിനുവേണ്ടിയുള്ളതാണെന്ന് ഉറപ്പിക്കുക - അത് പുതിയ ഭക്ഷണങ്ങള് പരീക്ഷിക്കാനാണോ, സംസ്കാരങ്ങള് പഠിക്കാനാണോ, അഡ്വഞ്ചറാണോ അതോ വെറുതെ വിശ്രമിക്കാനാണോ എന്ന് ആദ്യമേ തീരുമാനിക്കുക.
2. പോകുന്ന സ്ഥലത്തെക്കുറിച്ച് മുന്കൂട്ടി പഠിക്കുക
* പ്രധാന കാഴ്ചകള് ഏതൊക്കെയാണെന്ന് നോക്കുന്നതിനപ്പുറം ആ സ്ഥലത്തെക്കുറിച്ച് ആഴത്തില് മനസ്സിലാക്കുക:
* സന്ദര്ശിക്കാന് ഏറ്റവും അനുയോജ്യമായ സമയം.
* അവിടുത്തെ ലോക്കല് ട്രാന്സ്പോര്ട്ട് സിസ്റ്റം എങ്ങനെയാണ് പ്രവര്ത്തിക്കുന്നത്.
* സുരക്ഷിതമായ താമസസ്ഥലങ്ങള്, പ്രധാന സ്മാരകങ്ങളുടെ സമയക്രമം.
* സോളോ ട്രാവലേഴ്സിന് സുരക്ഷിതമെന്ന് പേരെടുത്ത സ്ഥലങ്ങള് തിരഞ്ഞെടുക്കാന് ശ്രദ്ധിക്കുക. മികച്ച ഗതാഗത സൗകര്യമുള്ള, റെസ്റ്റോറന്റുകള്ക്കും മെഡിക്കല് ഷോപ്പുകള്ക്കും അടുത്തുള്ള, ആളനക്കമുള്ള പ്രദേശങ്ങളില് താമസം തിരഞ്ഞെടുക്കുന്നത് രാത്രികാലങ്ങളില് പോലും യാത്ര എളുപ്പമാക്കും.
3. കാഴ്ചകള് ദൂരം നോക്കി ഗ്രൂപ്പ് ചെയ്യുക
* പലരും വരുത്തുന്ന വലിയൊരു തെറ്റാണ് പ്രശസ്തമായ സ്ഥലങ്ങളുടെ ലിസ്റ്റ് ഉണ്ടാക്കി അങ്ങോട്ടേക്ക് പോവുക എന്നത്. ഇത് പലപ്പോഴും നഗരത്തിന്റെ ഒരറ്റത്തുനിന്നും മറ്റേ അറ്റത്തേക്ക് വെറുതെ യാത്ര ചെയ്ത് സമയം കളയാന് ഇടയാക്കും.
* മികച്ച വഴി: അടുത്തടുത്തുള്ള കാഴ്ചകള് ഒന്നിച്ച് പ്ലാന് ചെയ്യുക. ഒരു മ്യൂസിയവും മാര്ക്കറ്റും നല്ലൊരു കഫേയും ഒരേ ഏരിയയിലാണെങ്കില്, അവയെല്ലാം ഒരൊറ്റ ബ്ലോക്കായി പ്ലാന് ചെയ്യുക. ഇത് യാത്രാസമയവും പണവും ലാഭിക്കും.
4. പ്ലാനിംഗില് ഫ്ലെക്സിബിലിറ്റി (ഇളവുകള്) നിലനിര്ത്തുക
* ദിവസത്തിലെ എല്ലാ മണിക്കൂറുകളും മുന്കൂട്ടി പ്ലാന് ചെയ്ത് വെക്കരുത്. സോളോ ട്രിപ്പിന്റെ പ്രധാന ഭംഗി തന്നെ നമ്മുടെ ഇഷ്ടത്തിനനുസരിച്ച് പ്ലാന് മാറ്റാം എന്നതാണ്.
* ലളിതമായ ഫോര്മുല: ഒരു ദിവസത്തില് പ്രധാനപ്പെട്ട ഒരു കാര്യം, രണ്ടാമതൊരു കാര്യം, പിന്നെ ഒഴിവാക്കാന് സാധിക്കുന്ന മറ്റൊരു ഓപ്ഷണല് കാര്യം എന്നിങ്ങനെ മാത്രം പ്ലാന് ചെയ്യുക.
* ഭക്ഷണത്തിനും വിശ്രമത്തിനും ക്യൂ നില്ക്കാനുമൊക്കെ കൃത്യമായ ബഫര് സമയം മാറ്റിവെക്കുക. യാത്രാമധ്യേ കാണുന്ന ഒരു നല്ല കാഴ്ച ആസ്വദിക്കാനോ ലോക്കല് ആളുകളോട് സംസാരിച്ചിരിക്കാനോ ഉള്ള സമയം ഇതിലൂടെ ലഭിക്കും.
5. സുരക്ഷയും ബാക്കപ്പ് പ്ലാനുകളും ഉറപ്പാക്കുക
* സുരക്ഷ എന്നത് യാത്രയുടെ ഭാഗം തന്നെയാണ്. നിങ്ങളുടെ താമസവും യാത്രകളും അതിനനുസരിച്ച് മാത്രം തിരഞ്ഞെടുക്കുക.
* നിങ്ങളുടെ ദിവസേനയുള്ള യാത്രാവിവരങ്ങളും താമസിക്കുന്ന ഹോട്ടലിന്റെ വിവരങ്ങളും വീട്ടിലെ ഒരംഗവുമായോ സുഹൃത്തുമായോ പങ്കുവെക്കുക.
* നിങ്ങളുടെ ഐഡി കാര്ഡ്, പാസ്പോര്ട്ട്, വിസ, ടിക്കറ്റുകള്, ഇന്ഷുറന്സ് എന്നിവയുടെ ഡിജിറ്റല് കോപ്പികളും (ഫോണില്) ഫിസിക്കല് കോപ്പികളും (പ്രിന്റ്) കൈയില് കരുതുക.
* യാത്ര തിരിക്കുന്നതിന് മുന്പ് അവിടുത്തെ കാലാവസ്ഥ, പ്രാദേശിക നിയമങ്ങള്, ട്രാവല് അഡൈ്വസറികള് എന്നിവ പരിശോധിക്കുക.
