വായിലെ ആരോഗ്യം സംരക്ഷിക്കുന്നത് ദിവസത്തില് രണ്ടുനേരം ബ്രഷ് ചെയ്യുന്നതില് മാത്രം ഒതുങ്ങുന്ന ഒന്നല്ല. നമ്മുടെ ചെറിയ ചില ദൈനംദിന ശീലങ്ങള്ക്കും ഇതില് വലിയ പങ്കുണ്ട്. പകല് സമയങ്ങളില് ഇടയ്ക്കിടെ കാപ്പി കുടിക്കുന്നത്, എപ്പോഴും എന്തെങ്കിലും ലഘുഭക്ഷണം കഴിക്കുന്നത്, അല്ലെങ്കില് പല്ല് വളരെ കടുപ്പത്തില് ബ്രഷ് ചെയ്യുന്നത് പോലെയുള്ള ചില ശീലങ്ങള് നമ്മള് ഒട്ടും ആലോചിക്കാതെ വീണ്ടും വീണ്ടും ചെയ്യാറുണ്ട്. എന്നാല് ഇവ നമ്മുടെ പല്ലുകളെ സാവധാനം നശിപ്പിച്ചുകൊണ്ടിരിക്കുകയാണ്. ഇത്തരം ശീലങ്ങള് ഉടനടി വേദന ഉണ്ടാക്കുകയോ പല്ലിന്റെ ആരോഗ്യത്തെ ദോഷകരമായി ബാധിക്കുന്നതായി പെട്ടെന്ന് ശ്രദ്ധയില് പെടുകയോ ഇല്ലെങ്കിലും, കാലക്രമേണ ഇവ ഇനാമല് തേയ്മാനം, പല്ലിന്റെ അമിതമായ പുളിപ്പ് (Sensitivity), പല്ല് ദ്രവിക്കല് (Cavities) എന്നിവയ്ക്ക് കാരണമാകും.
1. മധുരവും പുളിയും (അസിഡിറ്റി) ഉള്ള പാനീയങ്ങള് ഇടയ്ക്കിടെ കുടിക്കുന്നത് - പകല് സമയങ്ങളില് ഉന്മേഷം നിലനിര്ത്താന് എനര്ജി ഡ്രിങ്കുകള്, സോഡകള്, പഴച്ചാറുകള്, അല്ലെങ്കില് ഫ്ലേവേര്ഡ് കോഫികള് എന്നിവ കുടിക്കാന് പലരും ഇഷ്ടപ്പെടുന്നു. ഇത്തരം പാനീയങ്ങള് ഒരു തവണ കുടിക്കുന്നത് കൊണ്ട് വലിയ കേടുപാടുകള് സംഭവിച്ചേക്കില്ല, എന്നാല് ദിവസം മുഴുവന് ഇവ അല്പാല്പമായി കുടിച്ചുകൊണ്ടിരിക്കുന്നത് പല്ലുകളെ തുടര്ച്ചയായി ആസിഡുകളുടെ സാന്നിധ്യത്തിലേക്ക് നയിക്കും. ആസിഡുകള് പല്ലിലെ ഇനാമലിനെ ദുര്ബലപ്പെടുത്തുന്നു, കൂടാതെ മധുരം ബാക്ടീരിയകള്ക്ക് വളരാനുള്ള ആഹാരമായി മാറുന്നു. ഈ ബാക്ടീരിയകള് ഉത്പാദിപ്പിക്കുന്ന ആസിഡ് വായിന്റെ ആരോഗ്യത്തിന് വളരെയധികം ഹാനികരമാണ്.
2. കടുപ്പത്തില് ബ്രഷ് ചെയ്യുന്നത് - ദിവസവും രണ്ടുനേരം ബ്രഷ് ചെയ്യുന്നത് നല്ലതാണെങ്കിലും, അത് വളരെ ബലംപിടിച്ചോ കടുപ്പത്തിലോ ചെയ്യുന്നത് ഗുണത്തേക്കാളേറെ ദോഷം ചെയ്യും. അമിതമായ സമ്മര്ദ്ദം ചെലുത്തി ബ്രഷ് ചെയ്യുകയോ അല്ലെങ്കില് ഹാര്ഡ്-ബ്രിസില് (തുമ്പുകള് കടുപ്പമുള്ള) ഉള്ള ടൂത്ത് ബ്രഷ് ഉപയോഗിക്കുകയോ ചെയ്യുന്നത് ഇനാമല് തേയ്മാനത്തിനും ഈറുകളില് അസ്വസ്ഥത ഉണ്ടാക്കി അവ താഴേക്ക് ഇറങ്ങുന്നതിനും (Gum recession) കാരണമാകും. ഒരിക്കല് നഷ്ടപ്പെട്ട ഇനാമല് വീണ്ടെടുക്കാന് കഴിയില്ല.
3. അടിക്കടിയുള്ള ലഘുഭക്ഷണങ്ങള് (Snacking) - ദിവസം മുഴുവന് എന്തെങ്കിലും കഴിച്ചുകൊണ്ടിരിക്കുന്നത് ഭക്ഷണക്രമത്തെ മാത്രമല്ല ബാധിക്കുന്നത്, അത് വായിലെ ബാക്ടീരിയകള്ക്ക് നിരന്തരം ഭക്ഷണം നല്കുന്നതിലൂടെ പല്ലിന്റെ ആരോഗ്യത്തെയും ദോഷകരമായി ബാധിക്കുന്നു. നിങ്ങള് ഭക്ഷണം കഴിക്കുന്ന ഓരോ തവണയും വായിലെ ബാക്ടീരിയകള് പല്ലുകളെ നശിപ്പിക്കുന്ന ആസിഡുകള് ഉത്പാദിപ്പിക്കുന്നു. ദിവസം മുഴുവന് ഇങ്ങനെ ലഘുഭക്ഷണങ്ങള് കഴിച്ചുകൊണ്ടിരുന്നാല്, ആസിഡിന്റെ ദൂഷ്യഫലങ്ങളെ പ്രതിരോധിക്കാന് ഉമിനീരിന് സമയം ലഭിക്കാതെ വരുന്നു.
4. ഭക്ഷ്യേതര വസ്തുക്കള് കടിക്കുന്നത് - കുട്ടികള് നഖം കടിക്കുന്നതോ പേന, പെന്സില് എന്നിവ ചവയ്ക്കുന്നതോ ആയ ശീലങ്ങള് നമ്മള് എപ്പോഴും വിലക്കാറുണ്ട്. ഇത് വെറുമൊരു മോശം ശീലം മാത്രമല്ല, പല്ലിന്റെ ആരോഗ്യത്തെ ഇത് ഗുരുതരമായി ബാധിക്കുകയും ചെയ്യും. ഈ ശീലങ്ങള് പല്ലുകളില് അമിതമായ സമ്മര്ദ്ദം ചെലുത്തുന്നു, ഇത് ചെറിയ വിള്ളലുകള്ക്കും പല്ലിന്റെ അരികുകള് പൊട്ടുന്നതിനും പല്ല് തേയ്മാനത്തിനും കാരണമാകും. ഒറ്റനോട്ടത്തില് ഇത് നിരുപദ്രവകരമായി തോന്നാമെങ്കിലും, പല്ലുകള് ഒടിയുന്നതിന് വരെ ഇത് കാരണമാകാം.
5. വായ് വരള്ച്ച (Dry mouth) അവഗണിക്കുന്നത് - വായ് വരണ്ടുപോകുന്നത് ഒരു ചെറിയ ബുദ്ധിമുട്ടായി തോന്നാമെങ്കിലും, പല്ലിലെ ഭക്ഷണാവശിഷ്ടങ്ങള് കഴുകിക്കളയുന്നതിനും ഹാനികരമായ ആസിഡുകളെ നിര്വീര്യമാക്കുന്നതിനും ഉമിനീര് വളരെ പ്രധാനപ്പെട്ട പങ്ക് വഹിക്കുന്നുണ്ട്. ശരീരത്തില് ജലാംശം കുറയുന്നത്, അമിതമായ കഫീന് ഉപയോഗം, പുകവലി, ചില മരുന്നുകള് എന്നിവ ഉമിനീരിന്റെ ഉത്പാദനം കുറയ്ക്കും. ഇത് പല്ല് ദ്രവിക്കാനും, വായ് നാറ്റത്തിനുമുള്ള സാധ്യത വര്ദ്ധിപ്പിക്കുന്നു. ആവശ്യത്തിന് വെള്ളം കുടിച്ച് ശരീരത്തില് ജലാംശം നിലനിര്ത്തുന്നത് വായിന്റെ ആരോഗ്യം മെച്ചപ്പെടുത്താനുള്ള എളുപ്പവും ഫലപ്രദവുമായ മാര്ഗ്ഗമാണ്.
