മനുഷ്യർക്ക് പറ്റുമോ ഇത്?; കെ‌എസ്‌ആർടിസി ഡ്രൈവറുടെ ധൈര്യം രക്ഷിച്ചത് കർണാടക ബസ് ഡ്രൈവറെ

കോഴിക്കോട്: കെ‌എസ്‌ആർടിസി സ്വിഫ്റ്റ് ബസിന്റെ ഡ്രൈവർ കാവനൂർ സ്വദേശി നസീമിനെ എത്ര അഭിനന്ദിച്ചാലും മതിയാവില്ല. നസീമിന്റെ മനോധൈര്യവും അവസരോചിതമായ ഇടപെടലും കാരണം കർണാടക ബസിന്റെ ഡ്രൈവർ അത്ഭുതകരമായി രക്ഷപെട്ടു. ഇതുമായി ബന്ധപ്പെട്ട സിസി ടിവി ദൃശ്യങ്ങൾ കണ്ടാൽ ആരും അത്ഭുതം കൊണ്ട് മൂക്കത്ത് വിരൽ വച്ചുപോകും.

വെള്ളിയാഴ്ച രാത്രി മൈസൂരു-ബംഗളൂരു ദേശീയപാതയിലാണ് സംഭവം നടക്കുന്നത്. കർണാടക ആർടിസി ബസിന്റെ ഡൈവർ പഞ്ചറായ ടയർ മാറ്റാൻ ശ്രമിക്കുന്നതിനിടെ പാഞ്ഞുവന്ന ലോറിയിൽ നിന്ന് രക്ഷ നേടാനായി മറുവശത്തേക്ക് ഓടിമാറി. എന്നാൽ, പിന്നാലെ വന്ന കെ‌എസ്‌ആർടിസിയുടെ സ്വിഫ്റ്റ് ബസ് അപകടകരമായ രീതിയിൽ അടുത്ത് എത്തിയിരുന്നു. ബസ് ആളെ ഇടിക്കുമെന്ന ഘട്ടത്തിൽ ഡ്രൈവർ അവസരോചിതമായി ഇടപെട്ടു, ബസ് വശത്തുള്ള ഡിവൈഡറിലേക്ക് ഇടിച്ചു കയറ്റി നിർത്തി.

ഡിവൈഡറിന് ഉയരം കുറവായിരുന്നത് കാരണമാണ് ഇത്തരത്തിൽ സാഹസികമായി ഒരു അപകടം ഒഴിവാക്കാൻ സാധിച്ചത്. തന്റെ യാത്രക്കാർക്കും പരുക്കു പറ്റാതെയായിരുന്നു നസീമിന്റെ ഈ രക്ഷാപ്രവർത്തനം. മറ്റൊരു വാഹനത്തിന്റെ ക്യാമറയിൽ നിന്നുള്ള ദൃശ്യങ്ങളാണ് ഈ അത്ഭുതകരമായ രക്ഷപെടുത്തലിന്റെ ദൃശ്യങ്ങൾ പുറത്തുവരാൻ കാരണമായത്.