സോഷ്യല് മീഡിയയിലൂടെ പങ്കിടാറുള്ള ചില കൗതുകരമായ വീഡിയോകള് വളരെ പെട്ടെന്നാണ് വൈറലായി മാറാറുള്ളത്. അപ്രതീക്ഷിതമായ സംഭവങ്ങളോ രസം പകരുന്ന കാഴ്ചകളോ അമ്പരപ്പിക്കുന്ന ദൃശ്യങ്ങളോ ഒക്കെയാണ് പലപ്പോഴും നിമിഷവേഗത്തില് കാഴ്ച്ചക്കാര് ഏറ്റെടുക്കാറുള്ളത്.
ഇപ്പോഴിതാ അത്തരത്തില് നഗരത്തിലെ ഒരു പൊതുപാർക്കില് പ്രായമായ ഒരു സ്ത്രീ അതീവ ഊർജ്ജസ്വലതയോടെ വ്യായാമം ചെയ്യുന്ന ഒരു വീഡിയോയാണ് എക്സ് പ്ലാറ്റ്ഫോമിലൂടെ വൈറലാകുന്നത്. 10 സെക്കൻഡ് ദൈർഘ്യമുള്ള വീഡിയോയില് സാരിയുടുത്താണ് ഈ മുത്തശ്ശി വ്യായാമം ചെയ്യുന്നത്. പാർക്കിലെ ‘എയർ സ്വിംഗ്’ വ്യായാമ ഉപകരണത്തിലാണ് അതിവേഗത്തില് മുത്തശ്ശി വർക്കൗട്ട് ചെയ്യുന്നത്.
മുത്തശ്ശിയുടെ ശരവേഗത്തിലുള്ള വര്ക്കൗട്ട് കണ്ട് കുട്ടികളടക്കമുള്ള നിരവധി പേർ അത്ഭുതത്തോടെ നോക്കിനില്ക്കുന്നത് കാണാം.
ഈ വീഡിയോ എക്സ് പ്ലാറ്റ്ഫോമില് പങ്കുവെച്ചത് ബംഗളൂരു സ്വദേശിയായ സന്ദീപ് പാർശ്വനാഥ് ആണ്. ‘‘യാതൊരുവിധ മേല്നോട്ടവുമില്ലാതെ ഇത്തരം ഉപകരണങ്ങള് ഉപയോഗിക്കുന്നത് അപകടകരമല്ലേ! എന്തെങ്കിലും സംഭവിച്ചാൽ ആരാണ് ഉത്തരവാദിത്തം ഏറ്റെടുക്കുക. പാർക്കുകളിലെ ഓരോ ഔട്ട്ഡോർ ജിം ഉപകരണങ്ങളുടെയും അരികിലുള്ള ബോർഡുകളിൽ ബിബിഎംപി വ്യക്തമായ ഉപയോഗ മാർഗ്ഗനിർദ്ദേശങ്ങളും സുരക്ഷാ നിർദ്ദേശങ്ങളും സ്ഥാപിക്കണം....’ എന്ന ക്യാപ്ഷന് നല്കിയാണ് സന്ദീപ് വീഡിയോ പങ്കിട്ടിരിക്കുന്നത്.
വീഡിയോ വൈറലായതോടെ പൊതുപാർക്കുകളിലെ വ്യായാമ ഉപകരണങ്ങളുടെ സുരക്ഷയെക്കുറിച്ചുള്ള വലിയ ചര്ച്ചകള്ക്ക് ഈ വീഡിയോ വഴിവച്ചിട്ടുണ്ട്. എന്നാല് വീഡിയോയുടെ വേഗത എഡിറ്റിംഗിലൂടെയോ എഐ സാങ്കേതികവിദ്യ ഉപയോഗിച്ചോ കൂട്ടിയതാണോ എന്ന സംശയവും പലരും പ്രകടിപ്പിക്കുന്നുണ്ട്. മുന്നറിയിപ്പ് ബോർഡുകള് സ്ഥാപിക്കുന്നതിനേക്കാള് ആളുകളുടെ വ്യക്തിപരമായ ജാഗ്രതയും പൊതുവിവേകവുമാണ് ഇത്തരം ഇടങ്ങളില് ആവശ്യമെന്നും മറ്റു ചിലർ ചൂണ്ടിക്കാണിക്കുന്നുണ്ട്. അതേസമയം, ഈ പ്രായത്തിലും ആരോഗ്യം സംരക്ഷിക്കാൻ അവർ കാണിക്കുന്ന ആവേശത്തെയും ഊർജ്ജത്തെയും അഭിനന്ദിക്കുന്നവരും കുറവല്ല.
Is this not dangerous without supervision! Who will take responsibility if something happens. BBMP should install clear usage guidelines and safety instructions on boards next to each outdoor gym equipment in parks. pic.twitter.com/iUvFUI50tJ
— Sandeep Parswanath (@sarpame) July 6, 2026
