മലയാള സിനിമാ-സീരിയല് പ്രേക്ഷകര്ക്ക് സുപരിചിതയായ താരമാണ് സീമ ജി നായര്. നിരവധി സിനിമകളില് സഹനായിക, സഹോദരി വേഷങ്ങളില് താരം തിളങ്ങിയിട്ടുണ്ട്. ടെലിവിഷന് പരമ്പരകളിലും സജീവമാണ് താരം. എന്നാല് സീമയുടെ ഓണ് സ്ക്രീന് ജീവിതത്തേക്കാള് പ്രേക്ഷകരുടെ മനസില് ഇടം നേടിയത് ഓഫ് സ്ക്രീന് ജീവിതമാണ്. രോഗികള്ക്കും അനാഥരാക്കപ്പെട്ടവര്ക്കും അശരണര്ക്കും സഹായവുമായി സന്നദ്ധപ്രവർത്തനങ്ങളിലും സജീവമാണ് താരം. സഹതാരങ്ങളെ സഹായിക്കുന്നതിലും മുന്നിലാണ് താരം. സോഷ്യല് മീഡിയയിലൂടെ സീമ പങ്കിടുന്ന കുറിപ്പുകള് വളരെ വേഗത്തില് പ്രേക്ഷകരുടെ ഹൃദയം കീഴടക്കാറുണ്ട്.
ഇപ്പോഴിതാ അഭിനേത്രി എന്ന നിലയില് പരമാവധി ഡെഡിക്കേറ്റഡാകാന് താന് ശ്രമിക്കാറുണ്ടെന്ന് പറയുകയാണ് താരം. ഇന്നത്തെ പെണ്കുട്ടികള് ഒരു പീരിഡ്സ് വേദന പോലും സഹിക്കാന് ബുദ്ധിമുട്ട് കാണിക്കാറുണ്ടെന്നും ഒരു മൂക്കിപ്പനി വന്നു കഴിഞ്ഞാൽ ഷൂട്ടിങ് മുടക്കാൻ പറ്റുമോ എന്ന് ചിന്തിക്കുന്നവരാണെന്നും പറയുകയാണ് താരം.
‘‘ഇന്നത്തെ പെൺകുട്ടികൾക്ക് പീരിഡ്സ് ആയിക്കഴിഞ്ഞാൽ ഭയങ്കര തളർച്ചയും പ്രശ്നങ്ങളും അയ്യോ പൊത്തോ വിളികളും പിന്നെ കൂടെയുള്ളവര് തിരുമ്മി കൊടുക്കലും ഒക്കെയാണ്. അതു കാണുമ്പോൾ ഞാൻ ഓർത്തിട്ടുണ്ട്, ഒരു പീരിയഡ്സിന്റെ വേദന സഹിക്കാൻ കഴിയാത്ത കുട്ടികൾ എങ്ങനെയാ ഒരു പ്രസവവേദന സഹിക്കുന്നത്, എങ്ങനെയാ പ്രസവിക്കുന്നത് എന്ന്. അതൊരു നിസ്സാര കാര്യമല്ലല്ലോ, നമ്മുടെ ജീവൻ കൊടുത്ത് ഒരു ജീവനെ ഉണ്ടാവുകയാണ്.
ഒരു മൂക്കിപ്പനി വന്നു കഴിഞ്ഞാൽ ഷൂട്ടിങ് മുടക്കാൻ പറ്റുമോ അല്ലെങ്കിൽ ഷൂട്ട് മുടക്കാന് പറ്റുമോ എന്നൊക്കെ ചിന്തിക്കുന്നവർ ഉണ്ട്. അതുവച്ച് നോക്കിയാല് നാടക അഭിനയിക്കുമ്പോള് ഒരുപാട് സാഹചര്യങ്ങളും ബുദ്ധിമുട്ടുകളും നേരിട്ടിട്ടുണ്ട്. ജീവിതത്തിൽ പല പ്രതിസന്ധികൾ ഉണ്ടായപ്പോഴും ഞാനതൊക്കെ തരണം ചെയ്തിട്ടുണ്ട്
എന്റെ ഈ വലത്തെ കാല് ലിഗമെന്റ് അടിച്ചതാണ്. ഒരടി എനിക്ക് നടക്കാൻ പറ്റില്ല, ഡോക്ടർ എന്നോട് റെസ്റ്റ് പറഞ്ഞിരിക്കുകയാണ്. കാരണം കാല് മുന്നോട്ടു വച്ച് നടക്കാന്, എന്തിന് ശരിക്ക് ബാത്റൂമിൽ പോലും പോകാൻ പറ്റില്ല. ഇരിക്കാൻ ഭയങ്കര ബുദ്ധിമുട്ടാണ്. ബാത്റൂമിൽ പോകാന് ഇരിക്കണമല്ലോ. ഈ കാലു കൊണ്ട് അങ്ങനെ ഇരിക്കാൻ പറ്റില്ല. കാല് വേദനയുള്ളതു കൊണ്ട് ഒരു പ്രത്യേക രീതിയിലേ ഇരിക്കാൻ പറ്റുകയുള്ളൂ.
ഈ വേദനയുള്ളപ്പോഴും ഞാന് ഷൂട്ടിംഗ് മുടക്കാറില്ല. വണ്ടിയിൽ പുറകിലിരുന്ന് തലയിണയുടെ മുകളിൽ കാല് നീട്ടിവച്ചാണ് ഞാൻ ‘സുന്ദരി’ സീരിയലിന്റെ ഷൂട്ടിങ് മുടങ്ങാതെ ചെയ്തത്. അവിടെയാണെങ്കിലും ബാത്റൂമിൽ പോകുന്നത് ഒരാളുടെ സഹായം കൊണ്ടാണ്. കൂടെയുള്ള ആള് ബാത്ത്റൂമില് കൊണ്ടിരുത്തിയിട്ട് പോകും. ഭയങ്കര ബുദ്ധിമുട്ടാണത്.
കണ്ണീന്ന് പൊന്നീച്ച പറന്നിട്ടാണ് ഞാൻ ആ ഷൂട്ട് മുടക്കാതെ ചെയ്തത്. അതെന്തുകൊണ്ടാണെന്ന് അറിയുമോ? കാരണം ഞാൻ വർക്ക് ചെയ്തില്ലെങ്കിൽ, ഞാൻ തൊഴിൽ ചെയ്തില്ലെങ്കിൽ എന്റെ ജീവിതമോ എന്റെ വീട്ടുകാര്യങ്ങളോ മുന്നോട്ട് പോവില്ല. അപ്പൊ അതുകൊണ്ട് എത്ര വേദന സഹിച്ചും ഞാൻ ഇത് ചെയ്തേ പറ്റുകയുള്ളൂ എന്ന തിരിച്ചറിവ് എനിക്കുണ്ട്...’’ സീമ ജി നായര് പറഞ്ഞു. താരത്തിന്റെ അഭിപ്രായത്തെ പിന്തുണച്ചും നിശിതമായി വിമര്ശിച്ചും നിരവധി പേര് കമന്റുകള് കുറിക്കുന്നുണ്ട്.
