കൊച്ചി: എറണാകുളം ജില്ലയിൽ ഗതാഗതക്കുരുക്കിൽപ്പെട്ട് ഹൃദയാഘാതമുണ്ടായ ഒരു വ്യക്തിയുടെ ജീവൻ, രണ്ട് നഴ്സുമാരുടെ സമയോചിതമായ ഇടപെടലിലൂടെ രക്ഷപെട്ടു. അങ്കമാലി ലിറ്റിൽ ഫ്ലവർ ആശുപത്രിയിലെ സ്റ്റാഫ് നഴ്സായ അഞ്ജലി ബൈജുവും, മറ്റൊരു നഴ്സിംഗ് വിദ്യാർത്ഥിനിയായ ആർദ്ര രാജുമാണ് ഓടിക്കൊണ്ടിരുന്ന കെഎസ്ആർടിസി ബസിൽ നിന്ന് ചാടിയിറങ്ങി 43-കാരനായ യുവാവിന് സിപിആർ നൽകി ജീവൻ രക്ഷിച്ചത്.
ബുധനാഴ്ച രാവിലെ എംസി റോഡിൽ കാലടി പാലത്തിന് സമീപമായിരുന്നു സംഭവം. ഒക്കലിനടുത്ത് താന്നിപ്പുഴയിൽ ലോട്ടറി കട നടത്തുന്ന സിനോജിന്, സ്വന്തമായി കാറോടിച്ച് ആശുപത്രിയിലേക്ക് പോകുന്നതിനിടെ കടുത്ത നെഞ്ചുവേദന അനുഭവപ്പെടുകയായിരുന്നു. ഗതാഗതക്കുരുക്കിൽപ്പെട്ട് വണ്ടി കിടന്നതോടെ അദ്ദേഹം കാറിനുള്ളിൽ കുഴഞ്ഞുവീണു. ഈ സമയം കെഎസ്ആർടിസി ബസിൽ യാത്ര ചെയ്യുകയായിരുന്ന നഴ്സുമാർ റോഡരികിലെ ബഹളം ശ്രദ്ധിക്കുകയും, ഉടൻ തന്നെ ബസിൽ നിന്നിറങ്ങി കാറിനടുത്തേക്ക് ഓടിയെത്തി സിപിആർ നൽകാൻ ആരംഭിക്കുകയുമായിരുന്നു.
സിനോജിനെ അങ്കമാലിയിലെ ആശുപത്രിയിൽ എത്തിക്കുന്നത് വരെ ഇരുവരും വാഹനത്തിനുള്ളിൽ വെച്ച് സിപിആർ നൽകുന്നത് തുടർന്നു. ആശുപത്രിയിൽ എത്തുമ്പോഴേക്കും അദ്ദേഹം ജീവന്റെ ലക്ഷണങ്ങൾ തിരികെ കാണിച്ചുതുടങ്ങിയിരുന്നതായി ഡോക്ടർമാർ പറഞ്ഞു. തുടർന്ന് നടത്തിയ പരിശോധനയിൽ ഹൃദയധമനിയിൽ തടസ്സം കണ്ടെത്തിയതിനെ തുടർന്ന് അദ്ദേഹത്തെ അടിയന്തര ആൻജിയോപ്ലാസ്റ്റിക്ക് വിധേയനാക്കി. വിദഗ്ധ ചികിത്സയ്ക്കായി അദ്ദേഹത്തെ മറ്റൊരു മെഡിക്കൽ സെന്ററിലേക്ക് മാറ്റുമെന്നാണ് വിവരം .
പ്രദേശവാസികളുടെ സഹായവും ഈ രക്ഷാപ്രവർത്തനത്തിൽ നിർണായക പങ്കുവഹിച്ചു. സിനോജ് നെഞ്ചുവേദനയോടെയാണ് ആശുപത്രിയിലേക്ക് പോകുന്നതെന്നറിഞ്ഞ ഒരു വഴിപോക്കൻ കാറിന്റെ നിയന്ത്രണം ഏറ്റെടുക്കുകയായിരുന്നു. മറ്റുള്ളവർ ഗതാഗതക്കുരുക്കിൽ നിന്ന് വാഹനം മാറ്റാനും ആംബുലൻസ് സൗകര്യം ഒരുക്കാനും സഹായിച്ചു.
