ദുബായ്: യു.എ.ഇ.യുടെ പുത്തന് ഇത്തിഹാദ് റെയിലിന്റെ ആദ്യ ഇന്ത്യന് ട്രെയിന് ക്യാപ്റ്റനായി മലയാളി. വെറും 29-ാം വയസ്സില്, യു.എ.ഇ.യുടെ പുത്തന് അതിവേഗപാസഞ്ചര് ട്രെയിനുകള് നയിക്കുന്ന ഡ്രൈവര്മാരില് ഒരാളായി ആലപ്പുഴക്കാരന് മാറുമ്പോള്, യു.എ.ഇ.യിലെ മുഴുവന് ഇന്ത്യന് സമൂഹത്തിനും അഭിമാനമാണ്.
മെച്ചപ്പെട്ട അവസരങ്ങള് തേടിയാണ് മറ്റു പലരെയും പോലെ 2014-ല് നിഷാദ് യു.എ.ഇ.യിലേക്ക് കുടിയേറിയത്. വിദേശത്ത് ഒരു പുതിയ ജീവിതം കെട്ടിപ്പടുക്കാന് മുന്നില് വന്ന ജോലികളെല്ലാം അദ്ദേഹം ഏറ്റെടുത്തു. ഇത്തിഹാദ് റെയില് ഏറെ പ്രതീക്ഷയോടെ കാത്തിരുന്ന പാസഞ്ചര് സര്വീസ് ആരംഭിക്കുമ്പോഴാണ് അദ്ദേഹത്തിന്റെ ജീവിതത്തിലെ ഈ സുവര്ണ്ണ നിമിഷം എത്തിച്ചേരുന്നത്.
യു.എ.ഇ.യിലെ ഏറ്റവും വലിയ ഗതാഗത പദ്ധതികളിലൊന്നായ ഇത്തിഹാദ് റെയിലിന്റെ ആദ്യ ഇന്ത്യന് ട്രെയിന് ക്യാപ്റ്റനായി മാറുമ്പോള്, ഇരുപത്തിയൊന്പതുകാരനായ ഈ യുവാവിന്റെ കഠിനാധ്വാനത്തിന്റെ യാത്ര ഇന്ന് ഒരു പൂര്ണ്ണതയില് എത്തിനില്ക്കുകയാണ്.
ക്യാഷ്യറായും, പെര്ഫ്യൂം വില്പ്പനക്കാരനായും, ഹോട്ട് ഡോഗ് സാന്ഡ്വിച്ചുകള് ഉണ്ടാക്കിയും, ഡെലിവറി ബോയ്യായും ഒക്കെ ഈ മലയാളി യുവാവ് ഒരുകാലത്ത് ജോലി ചെയ്തിരുന്നു. ഇത്തിഹാദ് റെയില് തങ്ങളുടെ പാസഞ്ചര് സര്വീസിന് തുടക്കം കുറിക്കുന്ന വേളയിലാണ് ഈ ചരിത്ര നേട്ടം.
ഫുജൈറയില് നിന്ന് അബുദാബിയിലേക്കുള്ള ആദ്യ ട്രെയിന് പുറപ്പെടുമ്പോള്, അതിന്റെ ഡ്രൈവിംഗ് ക്യാബിനില് നിഷാദുണ്ടാകും. ഈ വര്ഷം ആദ്യം യു.എ.ഇ.യുടെ ആദ്യ സ്വദേശി ട്രെയിന് ക്യാപ്റ്റന്മാരായി മാറിയ ഇബ്രാഹിം അല് ഹമ്മാദി, സാറ അല് മസ്റൂയി എന്നിവര്ക്കൊപ്പം നിഷാദും ചേരും. 2017-ല് പാം ജുമൈറ മോണോറെയിലില് ജോലി ലഭിച്ചതോടെയാണ് അദ്ദേഹത്തിന്റെ ജീവിതം മാറിമറിഞ്ഞത്.
