ഗുരുഗ്രാം: ഭാര്യയെ കാമുകിയുടെ വീട്ടിലെത്തിച്ച് വെടിവെച്ചു കൊലപ്പെടുത്തിയ ശേഷം യുവാവ് കാമുകിയുമായി ഒളിച്ചോടി. ഹരിയാനയിലെ ഗുരുഗ്രാം മനേസറിലാണ് രാജ്യത്തെ ഞെട്ടിച്ച ഈ സംഭവം നടന്നത്. കൊലപാതകത്തിന് ശേഷം നേപ്പാളിലേക്ക് കടന്ന ഭര്ത്താവ് അങ്കിത്, ഇയാളുടെ കാമുകി രജനി ദേവി (38) എന്നിവരെ പോലീസ് അറസ്റ്റ് ചെയ്തു. പുണെയിലെ റിയല്റ്റര് കേതന് അഗര്വാളിന്റെ കൊലപാതകത്തിന്റെ ഞെട്ടല് മാറും മുന്പാണ് സമാനമായ മറ്റൊരു ക്രൂരകൃത്യം ഗുരുഗ്രാമില് നിന്നും റിപ്പോര്ട്ട് ചെയ്യുന്നത്.
22 കാരിയായ കൊല്ലപ്പെട്ട യുവതിയുമായി 25 കാരനായ അങ്കിതിന്റെ വിവാഹം വെറും മൂന്ന് മാസം മുമ്പായിരുന്നു. ഫെബ്രുവരിയിലായിരുന്നു അങ്കിതും യുവതിയും തമ്മിലുള്ള വിവാഹം കഴിഞ്ഞത്. വിവാഹം കഴിഞ്ഞ് മൂന്നാം മാസം ഭാര്യയെ കാണാതായ മകളെ കണ്ടെത്തണം എന്നാവശ്യപ്പെട്ട് പെണ്കുട്ടിയുടെ മാതാവ് മേയ് 22 ന് മനേസര് പോലീസ് സ്റ്റേഷനില് പരാതി നല്കുകയായിരുന്നു. മകളെ കാണാനില്ലെന്നും ഭര്ത്താവിനും കുടുംബത്തിനും ഇതില് പങ്കുണ്ടെന്ന് സംശയിക്കുന്നതായും പരാതിയില് പറഞ്ഞിരുന്നു.
തുടര്ന്ന് പോലീസ് നടത്തിയ അന്വേഷണത്തില് മേയ് 22-ന് മനേസറിലെ ഒരു വാടകമുറിയില് നിന്ന് യുവതിയുടെ മൃതദേഹം കണ്ടെടുത്തു. യുവതിക്ക് വെടിയേറ്റിട്ടുണ്ടെന്ന് വ്യക്തമായതോടെ പോലീസ് കൊലക്കുറ്റത്തിന് കേസെടുത്ത് അന്വേഷണം ഊര്ജിതമാക്കുകയായിരുന്നു. ചോദ്യം ചെയ്യലില് പ്രതികള് കുറ്റം സമ്മതിച്ചു. അങ്കിത് തന്നേക്കാള് 10 വയസ്സ് മൂപ്പുള്ള ബ്യൂട്ടി പാര്ലര് ജീവനക്കാരിയായ രജനി ദേവിയുമായി കഴിഞ്ഞ മൂന്ന് വര്ഷമായി പ്രണയത്തിലായിരുന്നു. വിവാഹശേഷവും തങ്ങളുടെ ബന്ധം തുടരുന്നതിനാണ് അങ്കിത് ഭാര്യയെ കൊലപ്പെടുത്താന് പദ്ധതിയിട്ടത്.
കൊലപാതകത്തിന് രണ്ട് മാസം മുന്പ് തന്നെ ഇതിനായി ഉത്തര്പ്രദേശില് നിന്ന് തോക്ക് വാങ്ങി സൂക്ഷിച്ചിരുന്നു. കൃത്യം നടന്ന ദിവസം അങ്കിത് ഭാര്യയെ രജനിയുടെ വാടകമുറിയില് എത്തിക്കുകയും, അവിടെവെച്ച് വെടിയുതിര്ത്ത് കൊലപ്പെടുത്തുകയുമായിരുന്നു. കൊലപാതകത്തിന് ശേഷം പ്രതികള് നേപ്പാളിലേക്ക് കടന്നു. ഒളിവില് കഴിഞ്ഞിരുന്ന പ്രതികള് ജൂണ് 30-നാണ് തിരികെ ഇന്ത്യയില് എത്തിയത്. രഹസ്യവിവരത്തിന്റെ അടിസ്ഥാനത്തില് മനേസര് ക്രൈംബ്രാഞ്ച് സംഘം വളഞ്ഞ് പിടികൂടുകയായിരുന്നു.
കോടതിയില് ഹാജരാക്കിയ പ്രതികളെ അഞ്ച് ദിവസത്തെ പോലീസ് കസ്റ്റഡിയില് വിട്ടു. കൊലപാതകത്തിന് ഉപയോഗിച്ച ആയുധം കണ്ടെത്താനുള്ള ശ്രമത്തിലാണ് പോലീസ്.
