എനര്‍ജി ഡ്രിങ്കുകള്‍ ചില സമയങ്ങളില്‍ നമുക്ക് ആവശ്യമായ ഊര്‍ജ്ജം നല്‍കുമെങ്കിലും, ഇവയുടെ സ്ഥിരമായ ഉപയോഗം പല്ലുകള്‍ക്ക് ദോഷം ചെയ്യും. ഉയര്‍ന്ന അളവില്‍ പഞ്ചസാര അടങ്ങിയ ഭക്ഷണങ്ങള്‍ പല്ലുകളില്‍ പഴുപ്പുണ്ടാക്കുമെന്ന് (cavities) പൊതുവെ ആളുകള്‍ക്ക് അറിയാമെങ്കിലും, എനര്‍ജി ഡ്രിങ്കുകളില്‍ അടങ്ങിയിരിക്കുന്ന അമ്ലങ്ങള്‍ (acids) കാരണം അവ വായുടെ ആരോഗ്യത്തിന് കൂടുതല്‍ ദോഷകരമാണെന്ന് പലരും തിരിച്ചറിയുന്നില്ല.
1. എനര്‍ജി ഡ്രിങ്കുകളിലെ ഉയര്‍ന്ന അളവിലുള്ള പഞ്ചസാര - വിപണിയില്‍ ലഭ്യമാകുന്ന പല എനര്‍ജി ഡ്രിങ്കുകളിലും ഉയര്‍ന്ന അളവില്‍ പഞ്ചസാര അടങ്ങിയിട്ടുണ്ട്. ഇത് വായിലെ ദോഷകരമായ ബാക്ടീരിയകള്‍ക്ക് വളരാന്‍ ആവശ്യമായ പോഷണം നല്‍കുന്നു. ഈ ബാക്ടീരിയകള്‍ ഉത്പാദിപ്പിക്കുന്ന അമ്ലങ്ങള്‍ (acids), പല്ലുകളെ സംരക്ഷിക്കുന്ന കടുപ്പമേറിയ പുറംപാളിയായ ഇനാമലിനെ നശിപ്പിക്കുന്നു.
2. എനര്‍ജി ഡ്രിങ്കുകളുടെ അമ്ലസ്വഭാവം (Acidic nature) - പഞ്ചസാരയില്ലാത്ത (sugar-free) എനര്‍ജി ഡ്രിങ്കുകള്‍ തിരഞ്ഞെടുക്കുന്നത് കൊണ്ട് മാത്രം ഒരാള്‍ പൂര്‍ണ്ണമായി സുരക്ഷിതനാകുന്നില്ല. ഇത്തരം പാനീയങ്ങളില്‍ സിട്രിക് ആസിഡ്, ഫോസ്‌ഫോറിക് ആസിഡ് തുടങ്ങിയ അമ്ലങ്ങള്‍ അടങ്ങിയിട്ടുള്ളതിനാല്‍ ഇവയും ദോഷകരമാണ്.
3. എനര്‍ജി ഡ്രിങ്കുകള്‍ പല്ലിന് പുളിപ്പ് (Tooth sensitivity) ഉണ്ടാക്കാം - ഇനാമലിന് തേയ്മാനം സംഭവിക്കുമ്പോള്‍ പല്ലിന്റെ ഉള്ളിലെ പാളിയായ 'ഡെന്റിന്‍' (dentin) പുറത്താകുന്നു. ഡെന്റിനില്‍ പല്ലിലെ നാഡികളുമായി ബന്ധിപ്പിക്കുന്ന ചെറിയ സുഷിരങ്ങള്‍ അടങ്ങിയിട്ടുണ്ട്. തല്‍ഫലമായി, ചൂടുള്ളതോ തണുത്തതോ അല്ലെങ്കില്‍ മധുരമുള്ളതോ പുളിയുള്ളതോ ആയ ഭക്ഷണങ്ങള്‍ കഴിക്കുമ്പോഴൊക്കെ പല്ലിന് പുളിപ്പ് അനുഭവപ്പെടുന്നു. എനര്‍ജി ഡ്രിങ്കുകളുടെ ഉപയോഗം ഈ പ്രക്രിയയുടെ വേഗത കൂട്ടുന്നു.
4. ഉമിനീരിന്റെ സംരക്ഷണ ശേഷി എനര്‍ജി ഡ്രിങ്കുകള്‍ കുറയ്ക്കുന്നു - പല്ലുകളെ വൃത്തിയാക്കുക, ആസിഡുകളെ നിര്‍വീര്യമാക്കുക, കേടുവന്ന ഇനാമലിനെ പുനരുദ്ധരിക്കുക എന്നിവയാണ് ഉമിനീരിന്റെ ഏറ്റവും പ്രധാനപ്പെട്ട ധര്‍മ്മങ്ങള്‍. എനര്‍ജി ഡ്രിങ്കുകളിലുള്ള ആസിഡുകള്‍ വായുടെ സ്വാഭാവിക സമതുലിതാവസ്ഥയെ തെറ്റിക്കാന്‍ സാധ്യതയുണ്ട്. ഇതുവഴി ആസിഡ് ആക്രമണങ്ങളില്‍ നിന്ന് പല്ലുകളെ സംരക്ഷിക്കാന്‍ ഉമിനീരിന് കഴിയാതെ വരുന്നു.
5. എനര്‍ജി ഡ്രിങ്കുകള്‍ ഇടയ്ക്കിടെ അല്പം അല്പമായി കുടിക്കുന്നത് കേടുപാടുകളുടെ ആക്കം കൂട്ടുന്നു - പലരും എനര്‍ജി ഡ്രിങ്കുകള്‍ മണിക്കൂറുകളോളമെടുത്ത് പതുക്കെയാണ് കുടിക്കുന്നത്. ഓരോ തവണ കുടിക്കുമ്പോഴും പഞ്ചസാരയും ആസിഡുകളും പല്ലുകളുമായി നേരിട്ട് സമ്പര്‍ക്കത്തില്‍ വരുന്നു, ഇത് ഇനാമലിന് നേരെയുള്ള ആസിഡ് ആക്രമണത്തിന്റെ സമയം ദീര്‍ഘിപ്പിക്കുന്നു. സാധാരണ വെള്ളം കുടിക്കുന്നതില്‍ നിന്ന് വ്യത്യസ്തമായി, ഇടയ്ക്കിടെ ഇത്തരം പാനീയങ്ങള്‍ കുടിക്കുമ്പോള്‍ വായുടെ പി.എച്ച് (pH) മൂല്യം വീണ്ടും സമതുലിതാവസ്ഥയിലാക്കാന്‍ ആവശ്യത്തിന് സമയം ലഭിക്കുന്നില്ല.
Comments