കുവൈത്ത് സിറ്റി: കുവൈത്തിനെ ലക്ഷ്യമിട്ട് ഇറാൻ നടത്തിയ തുടർച്ചയായ ആക്രമണങ്ങളെ രാജ്യം ശക്തമായി അപലപിച്ചു. മേഖലയിൽ സംഘർഷം രൂക്ഷമാക്കുന്നതും പ്രാദേശിക സമാധാനത്തിനും സുരക്ഷയ്ക്കും ഭീഷണിയാകുന്നതുമാണ് ഇത്തരം നടപടികളെന്ന് കുവൈത്ത് വിദേശകാര്യ മന്ത്രാലയം വ്യക്തമാക്കി.
പ്രശ്നങ്ങൾ സമാധാനപരമായി പരിഹരിക്കാനുള്ള നയതന്ത്ര ശ്രമങ്ങളെ ഇത്തരം ആക്രമണങ്ങൾ ദുർബലപ്പെടുത്തുകയും സ്ഥിതിഗതികൾ കൂടുതൽ അപകടകരമാക്കുകയും ചെയ്യുമെന്ന് മന്ത്രാലയം ചൂണ്ടിക്കാട്ടി.
ഇറാന്റെ ശത്രുതാപരമായ സമീപനത്തിന്റെ തുടർച്ചയാണ് ഈ ആക്രമണങ്ങളെന്നും, കുവൈത്തിന്റെ പരമാധികാരത്തിന്റെ വ്യക്തമായ ലംഘനവും രാജ്യത്തിന്റെ സുരക്ഷയ്ക്കും സ്ഥിരതയ്ക്കും നേരിട്ടുള്ള വെല്ലുവിളിയുമാണിതെന്നും പ്രസ്താവനയിൽ പറയുന്നു.അന്താരാഷ്ട്ര നിയമവും യു.എൻ ചാർട്ടറും സുരക്ഷാ കൗൺസിൽ പ്രമേയങ്ങളും ലംഘിക്കുന്ന നടപടിയാണ് ഇതെന്നും, രാജ്യത്തെ പൗരന്മാരുടെയും താമസക്കാരുടെയും സുരക്ഷയെ ഇത് അപകടത്തിലാക്കുമെന്നും കുവൈത്ത് മുന്നറിയിപ്പ് നൽകി.
