കൊച്ചി: സംസ്ഥാന വഖഫ് ബോര്‍ഡിനെതിരേ തടസ്സഹര്‍ജി സമര്‍പ്പിച്ച് കോണ്‍ഗ്രസ് ഉപാദ്ധ്യക്ഷന്‍ ഷോണ്‍ ജോര്‍ജ്ജ്. വഖഫ് ബോര്‍ഡിന്റെ പ്രവര്‍ത്തനം നിര്‍ത്തിവെച്ച ഇടക്കാല ഉത്തരവ് സ്‌റ്റേ െചയ്യണമെന്ന് ആവശ്യപ്പെട്ട് വഖഫ്‌ബോര്‍ഡ് സുപ്രീംകോടതിയില്‍ നല്‍കിയ ഹര്‍ജിയില്‍ വിധി പറയുന്നതിനാണ് തടസ്സ ഹര്‍ജി നല്‍കിയത്.
ഇക്കാര്യത്തില്‍ തന്റെ ഭാഗം കേള്‍ക്കാതെ ഒരു ഉത്തരവും പുറത്തുവിടരുത് എന്നാവശ്യപ്പെട്ടാണ് ബിജെപി നേതാവ് സുപ്രീംകോടതിയില്‍ എത്തിയത്. നേരത്തേ ഷോണിന്റെ ഹര്‍ജിയില്‍ കേരള സംസ്ഥാന വഖഫ് ബോര്‍ഡിന്റെ പ്രവര്‍ത്തനം ഹൈക്കോടതി താത്കാലികമായി മരവിപ്പിച്ചിരുന്നു. ഇതിനെതിരേയാണ് വഖഫ്‌ബോര്‍ഡ് സുപ്രീംകോടതിയെ സമീപിച്ചത്.
നിലവിലെ വഖഫ് ബോര്‍ഡിന്റെ രൂപീകരണവും പ്രവര്‍ത്തനവും ചോദ്യം ചെയ്ത് ബിജെപി സംസ്ഥാന ഉപാധ്യക്ഷന്‍ അഡ്വ. ഷോണ്‍ ജോര്‍ജ് നല്‍കിയ പൊതു താല്‍പ്പര്യ ഹര്‍ജി പരിഗണിച്ചാണ് കോടതി ഇടക്കാല ഉത്തരവ് പുറപ്പെടുവിച്ചത്. 2025ലെ വഖഫ് (ഭേദഗതി) നിയമപ്രകാരം ബോര്‍ഡില്‍ രണ്ട് അമുസ്ലിം അംഗങ്ങള്‍ നിര്‍ബന്ധമായും ഉള്‍പ്പെടണമെന്ന വ്യവസ്ഥ പാലിക്കാതെയാണ് സര്‍ക്കാര്‍ ബോര്‍ഡ് രൂപീകരിച്ചതെന്ന് ഷോണ്‍ ജോര്‍ജിനറെ ഹര്‍ജിയില്‍ പറയുന്നു.
2026-ല്‍ പുനഃസംഘടിപ്പിച്ച വഖഫ് ബോര്‍ഡില്‍ സര്‍ക്കാര്‍ നിയമിച്ച ഒമ്പത് അംഗങ്ങളും മുസ്ലിം സമുദായത്തില്‍പ്പെട്ടവരാണെന്നും, ഇത് ഭേദഗതി നിയമത്തിന്റെ വ്യവസ്ഥകള്‍ക്ക് വിരുദ്ധമാണെന്നും ഹര്‍ജിയില്‍ ചൂണ്ടിക്കാട്ടുന്നു. നിലവിലെ ബോര്‍ഡിന്റെ പ്രവര്‍ത്തനം നിയമവിരുദ്ധമാണെന്നും ഹര്‍ജിക്കാര്‍ കോടതിയെ അറിയിച്ചു. ഹര്‍ജികളിലെ വാദങ്ങള്‍ വിശദമായി കേട്ട ശേഷമാണ് വഖഫ് ബോര്‍ഡിന്റെ പ്രവര്‍ത്തനം താത്കാലികമായി നിര്‍ത്തിവെക്കാനും ഭരണപരമായ ചുമതല ജോയിന്റ് സെക്രട്ടറിക്ക് കൈമാറാനും ഹൈക്കോടതി ഉത്തരവിട്ടത്.
Comments