രോഗപ്രതിരോധ ശേഷി നിലനിര്‍ത്തുന്നതിനും, കൊളാജന്‍ ഉല്‍പ്പാദനത്തിനും, മുറിവുകള്‍ ഉണങ്ങുന്നതിനും, ഇരുമ്പ് സത്ത് (iron) ആഗിരണം ചെയ്യുന്നതിനും, ചര്‍മ്മത്തിന്റെ ആരോഗ്യത്തിനും ഏറെ ഗുണം ചെയ്യുന്ന ഒന്നാണ് വിറ്റാമിന്‍ സി. മനുഷ്യശരീരത്തിന് വിറ്റാമിന്‍ സി സ്വന്തമായി ഉത്പാദിപ്പിക്കാനോ ഉയര്‍ന്ന അളവില്‍ സംഭരിച്ചുവെക്കാനോ കഴിയില്ല. അതിനാല്‍ ഭക്ഷണത്തിലൂടെയോ പാനീയങ്ങളിലൂടെയോ ഇത് നിരന്തരം ശരീരത്തില്‍ എത്തേണ്ടത് അത്യാവശ്യമാണ്. വിപണിയില്‍ ഇതിനായി സപ്ലിമെന്റുകള്‍ ലഭ്യമാണെങ്കിലും, സമീകൃതാഹാരത്തിന്റെ ഭാഗമായി ദിവസവും കുടിക്കുന്ന ചില പാനീയങ്ങള്‍ ശ്രദ്ധാപൂര്‍വ്വം തിരഞ്ഞെടുക്കുകയാണെങ്കില്‍ ശരീരത്തിന് ആവശ്യമായ വിറ്റാമിന്‍ സി സ്വാഭാവികമായിത്തന്നെ ലഭിക്കും.
1. ഫ്രഷ് ഓറഞ്ച് ജ്യൂസ് - വിറ്റാമിന്‍ സിയുടെ ഏറ്റവും മികച്ചതും ജനപ്രിയവുമായ സ്വാഭാവിക സ്രോതസ്സുകളിലൊന്ന് ഫ്രഷ് ഓറഞ്ച് ജ്യൂസ് ആണ്. ഒരു ഗ്ലാസ് ഓറഞ്ച് ജ്യൂസിന് നമ്മുടെ ദൈനംദിന വിറ്റാമിന്‍ സി ആവശ്യകതയുടെ വലിയൊരു പങ്ക് നല്‍കാന്‍ കഴിയും. ഓക്‌സിഡേറ്റീവ് സ്‌ട്രെസ്സില്‍ (oxidative stress) നിന്ന് ശരീരത്തെ സംരക്ഷിക്കാന്‍ സഹായിക്കുന്ന ആന്റിഓക്സിഡന്റുകള്‍ ഇതില്‍ അടങ്ങിയിട്ടുണ്ട്. പഞ്ചസാര ചേര്‍ക്കാത്ത, പോഷകങ്ങള്‍ നിറഞ്ഞ ഫ്രഷ് ജ്യൂസുകള്‍ ലഭിക്കുന്ന കടകളില്‍ നിന്ന് ഇത് വാങ്ങി കുടിക്കാന്‍ ശ്രമിക്കുക.
2. നെല്ലിക്ക ജ്യൂസ് (Amla Juice) - വെള്ളം ചേര്‍ത്ത് നേര്‍പ്പിച്ച ഫ്രഷ് നെല്ലിക്ക ജ്യൂസ് രോഗപ്രതിരോധ ശേഷിയും പൊതുവായ ആരോഗ്യവും വര്‍ദ്ധിപ്പിക്കാന്‍ സഹായിക്കും. ഇതിലടങ്ങിയിരിക്കുന്ന സസ്യ സംയുക്തങ്ങള്‍ (plant compounds) കൂടുതല്‍ ആന്റിഓക്സിഡന്റ് ഗുണങ്ങള്‍ നല്‍കുന്നു. നെല്ലിക്കയ്ക്ക് നല്ല പുളിയും കടുപ്പമേറിയ രുചിയുമുള്ളതിനാല്‍, ആവശ്യത്തിന് വെള്ളവും അല്പം ഉപ്പും (black salt) ചേര്‍ത്ത് ഇത് കുടിക്കാവുന്നതാണ്.
3. നാരങ്ങാവെള്ളം - രാവിലെ എഴുന്നേറ്റയുടന്‍ ഒരു ഗ്ലാസ് നാരങ്ങാവെള്ളം കുടിക്കുന്നത് ശരീരത്തിന് ആവശ്യമായ വിറ്റാമിന്‍ സി എളുപ്പത്തില്‍ ഉറപ്പാക്കാനുള്ള ഒരു മാര്‍ഗ്ഗമാണ്. ശരീരത്തിന് വേണ്ട മുഴുവന്‍ വിറ്റാമിന്‍ സിയും ഇതില്‍ നിന്ന് മാത്രം ലഭിക്കില്ലെങ്കിലും, സ്ഥിരമായി കുടിക്കുന്നത് ദിവസേനയുള്ള വിറ്റാമിന്‍ സിയുടെ അളവ് കൂട്ടാനും ശരീരത്തില്‍ ജലാംശം നിലനിര്‍ത്താനും സഹായിക്കും. കൂടുതല്‍ ആരോഗ്യപ്രദമാക്കാന്‍ ഇതില്‍ അമിതമായി പഞ്ചസാര ചേര്‍ക്കാതിരിക്കാന്‍ ശ്രദ്ധിക്കുക.
4. പേരയ്ക്ക സ്മൂത്തി (Guava Smoothie) - പല സിട്രസ് പഴങ്ങളെക്കാളും (നാരങ്ങ വര്‍ഗ്ഗത്തില്‍പ്പെട്ട പഴങ്ങള്‍) കൂടുതല്‍ വിറ്റാമിന്‍ സി പേരയ്ക്കയില്‍ അടങ്ങിയിട്ടുണ്ട്. പഞ്ചസാര ചേര്‍ക്കാതെ തൈരോ പാലോ ഉപയോഗിച്ച് തയ്യാറാക്കുന്ന ഫ്രഷ് പേരയ്ക്ക സ്മൂത്തിയിലൂടെ വിറ്റാമിന്‍ സി, ഫൈബര്‍, പ്രോട്ടീന്‍, മറ്റ് പ്രയോജനകരമായ പോഷകങ്ങള്‍ എന്നിവ ലഭിക്കുന്നു. വൈകുന്നേരങ്ങളിലോ അല്ലെങ്കില്‍ വ്യായാമത്തിന് ശേഷമോ കുടിക്കാന്‍ പറ്റിയ ഒരു മികച്ച പാനീയമാണിത്.
5. കിവി, ബ്ലൂബെറി സ്മൂത്തി - കിവി, സ്‌ട്രോബെറി തുടങ്ങിയ ബെറി വര്‍ഗ്ഗത്തില്‍പ്പെട്ട പഴങ്ങളില്‍ സ്വാഭാവികമായിത്തന്നെ വിറ്റാമിന്‍ സി വളരെ കൂടുതലാണ്. ഇവ സാധാരണ തൈരുമായോ (plain yoghurt) സസ്യങ്ങളില്‍ നിന്നുള്ള പാലുമായോ (plant-based milk) ചേര്‍ത്ത് അടിച്ചെടുക്കുമ്പോള്‍ ആന്റിഓക്സിഡന്റുകള്‍, വിറ്റാമിനുകള്‍, മിനറലുകള്‍ എന്നിവ അടങ്ങിയ രുചികരവും പോഷകസമൃദ്ധവുമായ ഒരു സ്മൂത്തി ലഭിക്കുന്നു. ഇത് ആരോഗ്യകരമായ ദിനചര്യയ്ക്ക് പെട്ടെന്നൊരു ഊര്‍ജ്ജം പകരാന്‍ സഹായിക്കും.
Comments