ബെംഗളൂരു: നാട്ടുകാരില്‍ ഭീതിപടര്‍ത്തി കര്‍ണാടകയില്‍ ക്രിക്കറ്റ് മൈതാനത്ത് മനുഷ്യത്തല കണ്ടെത്തി. കൊലപാതകമാണെന്ന സംശയത്തെ തുടര്‍ന്ന പോലീസ് സ്ഥലത്തെത്തുകയും ട്രെയിന് മുന്നില്‍ചാടി ആത്മഹത്യ ചെയ്തയാളുടേത് ആണെന്ന് കണ്ടെത്തുകയും ചെയ്തിട്ടുണ്ട്.
ട്രെയിന് ഇടിച്ചതിനെ തുടര്‍ന്നുള്ള ആഘാതത്തില്‍ തല ഉടലില്‍ നിന്നും വേര്‍പെട്ടുപോയി എന്നും അത് പിന്നീട് തെരുവ്‌നായ്ക്കള്‍ കടിച്ചുകൊണ്ട് മൈതാനത്ത് കൊണ്ടിട്ടതാണെന്നുമാണ് പോലീസിന്റെ പ്രാഥമികമായ വിലയിരുത്തല്‍. കര്‍ണാടകയിലെ വര്‍തൂര്‍ പൊലീസ് സ്റ്റേഷന്‍ പരിധിയില്‍ കോടതിയക്ക് സമീപമുള്ള ഒരു ക്രിക്കറ്റ് മൈതാനത്ത് നിന്നുമാണ് ആളുടെ വേര്‍പെട്ട തല കണ്ടെത്തിയത്.
തുടക്കത്തില്‍ ഇതൊരു കൊലപാതകമാണെന്ന് സംശയിച്ചെങ്കിലും പൊലീസെത്തി നടത്തിയ അന്വേഷണത്തിലാണ് ആത്മഹത്യായാണെന്ന് വ്യക്തമായത്. ആന്ധ്രാപ്രദേശിലെ ചിറ്റൂര്‍ സ്വദേശിയായ വിശ്വനാഥ് (25) ആണ് മരിച്ചത്. വ്യക്തിപരമായ ചില കാര്യങ്ങളില്‍ അസ്വസ്ഥനായിരുന്ന വിശ്വനാഥ്, ചൊവ്വാഴ്ച സുഹൃത്തിനെ വിളിച്ച് സംസാരിച്ചിരുന്നു. തുടര്‍ന്ന് രാത്രി 8:30നും 9നും ഇടയില്‍ ട്രെയിനിന് മുന്നില്‍ ചാടി ജീവനൊടുക്കിയതായി റെയില്‍വേ പൊലീസ് അറിയിച്ചു.
ട്രെയിനിന്റെ ശക്തമായ ആഘാതത്തില്‍ അദ്ദേഹത്തിന്റെ തല ശരീരത്തില്‍ നിന്ന് പൂര്‍ണ്ണമായി വേര്‍പെട്ട് ദൂരത്തേക്ക് തെറിച്ചുപോവുകയായിരുന്നു. സംഭവത്തെക്കുറിച്ച് വിവരമറിഞ്ഞ് രാത്രിയില്‍ സ്ഥലത്തെത്തിയ റെയില്‍വേ പൊലീസ് ഉദ്യോഗസ്ഥര്‍ സ്വാഭാവികമരണത്തിന് കേസെടുത്ത് അന്വേഷണം ആരംഭിച്ചു. എന്നാല്‍ ഇരുട്ടില്‍ റെയില്‍വേ പൊലീസിന് തലയില്ലാത്ത ശരീരം മാത്രമാണ് കണ്ടെത്താനായത്. തല പിന്നീട് തെരുവ് നായ്ക്കള്‍ ക്രിക്കറ്റ് മൈതാനത്തേക്ക് എത്തിച്ചതായും പറയുന്നു.
റെയില്‍വേ പാളത്തില്‍ നിന്ന് 300 മീറ്റര്‍ അകലെയാണ് ക്രിക്കറ്റ് മൈതാനമുള്ളത്്. രാവിലെ കളിക്കാന്‍ എത്തിയ നാട്ടുകാരാണ് തല കണ്ടത്. ഇവര്‍ ഉടന്‍ തന്നെ പൊലീസ് എമര്‍ജന്‍സി ഹെല്‍പ്ലൈനില്‍ വിവരം അറിയിക്കുകയുമായിരുന്നു. വിവരം ലഭിച്ചയുടന്‍ വര്‍തൂര്‍ പൊലീസെത്തി സത്യം കണ്ടെത്താന്‍ അന്വേഷണം ആരംഭിച്ചു. മൈതാനത്ത് തല കണ്ടെത്തിയെന്ന വിവരം ലഭിച്ചയുടന്‍ പൊലീസ് സ്ഥലത്തെത്തുകയും പരിസരത്ത് ശരീത്തിനായി തെരച്ചില്‍ നടത്തുകയും ചെയ്തു.
മറുവശത്ത്, ബയ്യപ്പനഹള്ളി റെയില്‍വേ പൊലീസും അതേ പ്രദേശം പരിശോധിച്ചു. അന്വേഷണത്തില്‍ കഴിഞ്ഞ രാത്രി 8 മണിക്കും 9 മണിക്കും ഇടയില്‍ ട്രെയിന് അപകടത്തില്‍പ്പെട്ട ഒരാളുടെ ശരീരം കണ്ടെത്തിയതായി വ്യക്തമായി. പാളത്തിന് സമീപം കണ്ടെത്തിയ മൃതദേഹത്തിന് തലയുണ്ടായിരുന്നില്ലെന്ന് വൈറ്റ്ഫീല്‍ഡ് ഡിവിഷന്‍ ഡി.സി.പി സൈദുലു അദാവത്ത് പറഞ്ഞു.
അദ്ദേഹത്തിന്റെ അഭിപ്രായത്തില്‍, അപകടസ്ഥലത്ത് നിന്ന് തല അല്പം അകലേക്ക് തെറിച്ചുപോയിരിക്കാം. റെയില്‍വേ പൊലീസ് ഇതിനോടകം അസ്വാഭാവിക മരണത്തിന് കേസെടുക്കുകയും മൃതദേഹം സി.വി രാമന്‍ ആശുപത്രിയിലേക്ക് അയക്കുകയും ചെയ്തിട്ടുണ്ട്. അന്വേഷണത്തില്‍ ചിറ്റൂരില്‍ നിന്നുള്ള 25 കാരനായ യുവാവാണ് മരിച്ചതെന്ന് പൊലീസ് തിരിച്ചറിഞ്ഞിട്ടുണ്ട്. കുടുംബാംഗങ്ങളെയും വിവരം അറിയിച്ചിട്ടുണ്ട്.
Comments