ടോയ്‌ലെറ്റ് സീറ്റിനേക്കാൾ കൂടുതൽ ബാക്ടീരിയ അടുക്കളയിലെ സ്പോഞ്ചിൽ; മുന്നറിയിപ്പുമായി ഫുഡ് സേഫ്റ്റി ഓഫീസർ

വീടുകളിൽ പാത്രങ്ങൾ കഴുകാൻ ഉപയോഗിക്കുന്ന സ്‌പോഞ്ച് (Kitchen Sponge) വലിയ രീതിയിലുള്ള ആരോഗ്യപ്രശ്നങ്ങൾക്കും രോഗങ്ങൾക്കും കാരണമായേക്കാമെന്ന് മുന്നറിയിപ്പ്. അടുക്കളയിലെ സ്‌പോഞ്ചുകളിൽ ടോയ്‌ലെറ്റ് സീറ്റുകളിലേതിനേക്കാൾ കൂടുതൽ അപകടകാരികളായ ബാക്ടീരിയകൾ അടങ്ങിയിട്ടുണ്ടെന്നും ഇവ കൃത്യമായ ഇടവേളകളിൽ മാറ്റണമെന്നും ഖത്തറിലെ ഫുഡ് സേഫ്റ്റി ഓഫീസറായ അഹാന നസാർ ഹഫീസ് മുന്നറിയിപ്പ് നൽകുന്നു.

മാസങ്ങളോളം ഒരേ സ്‌പോഞ്ച് തന്നെ ഉപയോഗിച്ച് പാത്രങ്ങൾ കഴുകുന്ന ശീലം ആളുകൾക്കിടയിൽ സാധാരണമാണ്. എന്നാൽ, വൃത്തിയാക്കുന്നതിന് പകരം ബാക്ടീരിയകളെ പാത്രങ്ങളിലേക്ക് പടർത്താനാണ് ഇത് ഇടയാക്കുന്നതെന്ന് ഇൻസ്റ്റാഗ്രാമിൽ പങ്കുവെച്ച വീഡിയോയിൽ അഹാന വ്യക്തമാക്കുന്നു.

സ്‌പോഞ്ചുകൾ ബാക്ടീരിയകളുടെ താവളമാകുന്നത് എന്തുകൊണ്ട്?

ഈർപ്പവും സുഷിരങ്ങളും: സ്‌പോഞ്ചിന്റെ സുഷിരങ്ങളുള്ള ഘടനയും എപ്പോഴും ഈർപ്പമുള്ള അന്തരീക്ഷവും ബാക്ടീരിയകൾക്ക് വേഗത്തിൽ വളരാൻ അനുയോജ്യമായ സാഹചര്യമൊരുക്കുന്നു.

ഭക്ഷണാവശിഷ്ടങ്ങൾ: പാത്രങ്ങൾ കഴുകുമ്പോൾ ഇതിൽ കുടുങ്ങുന്ന ഭക്ഷണാവശിഷ്ടങ്ങൾ ബാക്ടീരിയകൾക്ക് പോഷണമാകുന്നു.

രോഗപ്പകർച്ച: കൃത്യമായി ഉണക്കി സൂക്ഷിക്കാത്ത പഴയ സ്‌പോഞ്ചുകൾ ഉപയോഗിക്കുമ്പോൾ ഓരോ തവണയും രോഗാണുക്കൾ പാത്രങ്ങളിലേക്കും അതിലൂടെ ശരീരത്തിലേക്കും എത്തുവാൻ സാധ്യതയേറുന്നു.

ശ്രദ്ധിക്കേണ്ട കാര്യങ്ങൾ:

ഓരോ തവണ പാത്രങ്ങൾ കഴുകിയ ശേഷവും സ്‌പോഞ്ച് നന്നായി കഴുകി വെള്ളം പൂർണ്ണമായും പിഴിഞ്ഞുകളഞ്ഞ് ഉണങ്ങാൻ അനുവദിക്കുക.

മാസങ്ങളോളം ഒരേ സ്‌പോഞ്ച് ഉപയോഗിക്കാതെ കൃത്യമായ ഇടവേളകളിൽ പുതിയത് മാറ്റുക.