ഇടുക്കി: മുമ്പ് താമസിച്ചിരുന്നയാള്‍ വരുത്തിയ വൈദ്യൂതിബില്‍ കുടിശ്ശികയില്‍ കറന്റില്ലാതെ ഒമ്പത് മാസമായി തൊഴിലാളിലയത്തില്‍ ദുരിതമനുഭവിച്ച് ആറുമാസം പ്രായമുള്ള പിഞ്ചുകുഞ്ഞ് അടക്കമുള്ള കുടുംബം. മുമ്പ് താമസിച്ചിരുന്നയാള്‍ വൈദ്യുതി കുടിശ്ശിക കൈ മാറിയിട്ടും കമ്പനി ബില്ലുകെട്ടാത്തതിനെ തുടര്‍ന്ന് ഇരുട്ടില്‍ ദുരിതജീവിതം നയിക്കുകയാണ് കുടുംബം.
ഇടുക്കി പാമ്പനാര്‍ റാണികോവില്‍ എസ്റ്റേറ്റിലാണ് സംഭവം. എസ്റ്റേറ്റ് മാനേജ്മെന്റിന്റെ ഭാഗത്ത് നിന്ന് വന്ന വീഴ്ചയെ തുടര്‍ന്ന് ഒമ്പത് മാസമായി തൊഴിലാളി ലയത്തില്‍ ദുരിതജീവിതം നയിക്കുകയാണ് പളനിയമ്മാളും കുടുംബവും. പളനിയമ്മാളും ഭര്‍ത്താവ് ബാലകൃഷ്ണനും സ്ഥിരജോലിക്കാരായിരുന്ന എസ്റ്റേറ്റ് മറ്റൊരു ഗ്രൂപ്പ് ഏറ്റെടുത്തതോടെ ബാലകൃഷ്ണന് ജോലി നഷ്ടമായിരുന്നു.
ഇവര്‍ പിന്നീട് മറ്റൊരിടത്തേക്ക് മാറി താമസിക്കുകയും ചെയ്തു. എന്നാല്‍ ഈ സ്ഥലത്തെ സൗകര്യം തീരെ മോശമായിരുന്നതിനാല്‍ ഇവര്‍ പിന്നീട് പളനിയമ്മാളിന്റെ പേരില്‍ അനുവദിച്ച ലയത്തിലേക്ക് മാറുകയുമായിരുന്നു. കുടുംബം ഇവിടേയ്ക്ക് ചെല്ലുമ്പോള്‍ തന്നെ അവിടെ വൈദ്യുതി കണക്ഷന്‍ ഉണ്ടായിരുന്നില്ല. മുന്‍പ് താമസിച്ചിരുന്നവര്‍ വൈദ്യുതിബില്‍ കെട്ടിയില്ല. ആറായിരത്തിലധികം രൂപ കെഎസ്ഇബിക്ക് കുടിശിക വരുത്തിയതിനാല്‍ തുടര്‍ന്ന് വൈദ്യുതി കണക്ഷന്‍ കമ്പനി കട്ട് ചെയ്യുകയായിരുന്നു.
പിന്നീട് താമസം മാറി പോയ ആളുകളില്‍ നിന്ന് ഈ കുടിശിക തുക എസ്റ്റേറ്റ് അധികൃതര്‍ ഈടാക്കിയിരുന്നു. എന്നിട്ടും പണമടച്ച് വൈദ്യുതി പുനഃസ്ഥാപിക്കാന്‍ കമ്പനി തയ്യാറായില്ല. ഇതോടെ പിഞ്ച് കുഞ്ഞ് ഉള്‍പ്പെടെയുള്ള കുടുംബം ഇപ്പോള്‍ ഇരുട്ടിലാണ്. അതേസമയം വൈദ്യുതി പുനസ്ഥാപിക്കാന്‍ തോട്ടം ഉടമ അപേക്ഷ നല്‍കാത്തതാണ് ദുരവസ്ഥയ്ക്ക് കാരണം. ലയം എസ്റ്റേറ്റ് വക സ്ഥലത്ത് ആയതിനാല്‍ മാനേജ്മെന്റ് അപേക്ഷ നല്‍കിയാല്‍ മാത്രമേ വൈദ്യുതി ബോര്‍ഡ് കണക്ഷന്‍ പുനഃസ്ഥാപിക്കുകയുള്ളു.
Comments