മുംബൈ ലോക്കൽ ട്രെയിനിൽ അപ്രതീക്ഷിത അതിഥി; നിഹാങ് യുവതിയുടെ തലപ്പാവിൽ ശാന്തമായി ഇരുന്ന് പരുന്ത്, വീഡിയോ വൈറൽ

ട്രെയിനിലെ യാത്രയ്ക്കിടെ പലതരം കാഴ്ചകൾ കാണാറുണ്ടെങ്കിലും ഇങ്ങനെയൊരു കാഴ്ച ഒരുപക്ഷേ മുംബൈ ലോക്കൽ യാത്രക്കാർ പോലും പ്രതീക്ഷിച്ചിട്ടുണ്ടാകില്ല. തിരക്കേറിയ ലോക്കൽ ട്രെയിനിനുള്ളിൽ അപ്രതീക്ഷിതമായി ഒരു പരുന്ത് എത്തുകയും, യാത്രക്കാരിയായ നിഹാങ് സിഖ് യുവതിയുടെ തലപ്പാവിൽ ശാന്തമായി ഇരിക്കുകയും ചെയ്തതാണ് കൗതുകമായത്. ഓഗസ്റ്റ് 15ന് സിഎസ്എംടി-കല്യാൺ റൂട്ടിലോടിയ ട്രെയിനിലുണ്ടായ സംഭവത്തിന്റെ വീഡിയോ ഇപ്പോൾ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്.

പുറത്തുവന്ന 40 സെക്കൻഡ് ദൈർഘ്യമുള്ള വീഡിയോയിൽ ട്രെയിൻ സഞ്ചരിക്കുന്നതിനിടെ പരുന്ത് യുവതിയുടെ തലപ്പാവിൽ അനങ്ങാതെ ഇരിക്കുന്നത് കാണാം. ചുറ്റുമുണ്ടായിരുന്ന യാത്രക്കാർ അമ്പരപ്പോടെ പക്ഷിയെ നോക്കുകയും പലരും മൊബൈൽ ഫോണിൽ ദൃശ്യങ്ങൾ പകർത്തുകയും ചെയ്തു. തിരക്കേറിയ ട്രെയിനിനുള്ളിൽ ഇത്രയും ശാന്തമായി പരുന്ത് ഇരിക്കുന്ന കാഴ്ചയാണ് യാത്രക്കാരുടെ ശ്രദ്ധ പിടിച്ചുപറ്റിയത്.

അക്ഷയ് പാലവ് എന്ന ഇൻസ്റ്റഗ്രാം ഉപയോക്താവാണ് വീഡിയോ പങ്കുവച്ചത്. പിന്നാലെ ദൃശ്യങ്ങൾ സോഷ്യൽ മീഡിയയിൽ വേഗത്തിൽ പ്രചരിക്കുകയായിരുന്നു. റിപ്പോർട്ടുകൾ പ്രകാരം വീഡിയോയ്ക്ക് ഇതിനോടകം 3.74 ലക്ഷത്തിലധികം കാഴ്ചകൾ ലഭിച്ചിട്ടുണ്ട്. പരുന്ത് യുവതിയുടെ തലപ്പാവിൽ ഇരിക്കുന്ന അസാധാരണ ദൃശ്യമാണ് പ്രധാനമായും സോഷ്യൽ മീഡിയ ഉപയോക്താക്കളുടെ ശ്രദ്ധ നേടിയത്.

സംഭവം കൗതുകമുണർത്തുന്നതിനൊപ്പം സിഖ് മതത്തിലെ പരുന്തിന്റെ പ്രത്യേക സ്ഥാനവും ചർച്ചയാകുന്നുണ്ട്. സിഖ് പാരമ്പര്യത്തിൽ ‘ബാസ്’ അഥവാ പരുന്ത് ധൈര്യം, സ്വാതന്ത്ര്യം, പരമാധികാരം എന്നിവയുടെ പ്രതീകമായാണ് കണക്കാക്കുന്നത്. ഗുരു ഗോബിന്ദ് സിംഗുമായി പരുന്തിന് അടുത്ത ബന്ധമുണ്ടെന്നും സിഖ് ചരിത്രത്തിലും കലാരൂപങ്ങളിലും ഗുരുവിനൊപ്പം പരുന്തിനെ ചിത്രീകരിച്ചിട്ടുണ്ടെന്നും റിപ്പോർട്ടിൽ പറയുന്നു. എന്തായാലും, മുംബൈ ലോക്കലിലെ പതിവ് തിരക്കിനിടയിൽ അപ്രതീക്ഷിതമായി എത്തിയ ഈ ‘യാത്രക്കാരൻ’ ഇപ്പോൾ സോഷ്യൽ മീഡിയയിലെ കൗതുകക്കാഴ്ചയായി മാറിയിരിക്കുകയാണ്.