നിയമത്തിന്റെ വാതില് തുറക്കാന് സമരം വേണ്ടിവരുന്ന സാഹചര്യം ജനാധിപത്യത്തിന് ആശ്വാസകരമല്ല. ഡല്ഹിയില് 19 വയസ്സുകാരനായ സാഹില് ലോചവിന് പെല്ലറ്റ് പ്രയോഗത്തില് ഗുരുതരമായി പരുക്കേറ്റ സംഭവത്തില് പരാതി ലഭിച്ചിട്ടും എഫ്.ഐ.ആര്. രജിസ്റ്റര് ചെയ്യാതിരുന്നത് ഡല്ഹി പോലീസിന്റെ പ്രവര്ത്തനത്തെക്കുറിച്ച് ഗുരുതരമായ ചോദ്യങ്ങളാണ് ഉയര്ത്തുന്നത്. ഒരു കണ്ണിന്റെ കാഴ്ച നഷ്ടപ്പെട്ടെന്ന ആരോപണം നിലനില്ക്കുമ്പോഴും നടപടി വൈകിപ്പിച്ചത് സാധാരണ ഭരണപരമായ വീഴ്ചയായി കാണാനാവില്ല.
പരാതിയില് കേസെടുക്കുന്നത് കുറ്റം തെളിഞ്ഞുവെന്ന പ്രഖ്യാപനമല്ല;ആരോപണത്തില് നിയമാനുസൃത അന്വേഷണം ആരംഭിക്കുന്നതിന്റെ ആദ്യപടിയാണ്. മെഡിക്കല് രേഖകളും പരുക്കിന്റെ തെളിവുകളും പരാതിക്കാരന്റെ മൊഴിയും ലഭ്യമായിരിക്കെ എഫ്.ഐ.ആര്. രജിസ്റ്റര് ചെയ്യാന് രാഷ്ട്രീയ ഇടപെടല് ആവശ്യമായത് പോലീസിന്റെ നിഷ്പക്ഷതയെ സംശയത്തിലാക്കുന്നു. സുപ്രീം കോടതിയുടെ ഉന്നതാധികാര സമിതി അമിത ബലപ്രയോഗം സംബന്ധിച്ച് പരിശോധിക്കുന്നുണ്ടെന്ന പോലീസിന്റെ വിശദീകരണവും എഫ്.ഐ.ആര്. ഒഴിവാക്കാനുള്ള ന്യായമാകില്ല. ഒരു വിഷയത്തില് മറ്റൊരു അന്വേഷണം നടക്കുന്നു എന്നത് പരാതിക്കാരന്റെ നിയമപരമായ അവകാശം നിഷേധിക്കുന്നതിനുള്ള കാരണമല്ല.
ഈ പശ്ചാത്തലത്തിലാണ് രാഹുല് ഗാന്ധിയുടെ ഇടപെടല് രാഷ്ട്രീയമായി ശ്രദ്ധേയമാകുന്നത്. പാര്ലമെന്റിലെ പ്രസംഗത്തില് വിഷയം ഒതുക്കാതെ പരുക്കേറ്റ വിദ്യാര്ഥിയോടും അമ്മയോടുമൊപ്പം പോലീസ് സ്റ്റേഷനിലെത്തി മണിക്കൂറുകളോളം ധര്ണ നടത്തിയത് പ്രതിപക്ഷ രാഷ്ട്രീയത്തില് തെരുവിലേക്കുള്ള തിരിച്ചുവരവിന്റെ സൂചനയാണ്. അധികാരകേന്ദ്രങ്ങളെ നേരിട്ട് സമ്മര്ദത്തിലാക്കുക എന്നതാണ് ഈ നീക്കത്തിന്റെ രാഷ്ട്രീയ സന്ദേശം. അതോടൊപ്പം വിദ്യാര്ഥികളുടെയും യുവാക്കളുടെയും പ്രശ്നങ്ങളെ ദേശീയ രാഷ്ട്രീയത്തിന്റെ കേന്ദ്രത്തിലേക്ക് കൊണ്ടുവരാനുള്ള ശ്രമവുമാണിത്. 2029ലെ തെരഞ്ഞെടുപ്പില് നിര്ണായകമാകാവുന്ന യുവ വോട്ടര്മാരെ മുന്നില് കണ്ടുള്ള രാഷ്ട്രീയ തന്ത്രമായും ഇതിനെ കാണാം.
പ്രതിപക്ഷ നേതാവെന്ന നിലയില് രാഹുല് ഗാന്ധി സ്വീകരിച്ച ഈ രീതിക്ക് രാഷ്ട്രീയമായ നേട്ടവും അപകടവുമുണ്ട്. ഭരണപരമായ ഓരോ വീഴ്ചയിലും തെരുവിലിറങ്ങുന്നത് സ്ഥിരമായ രാഷ്ട്രീയ മാതൃകയാകുന്നുവെങ്കില് അതിന്റെ ഫലപ്രാപ്തി കുറയാം. എന്നാല്, നീതി ലഭിക്കുന്നില്ലെന്ന് ജനങ്ങള്ക്ക് തോന്നുന്ന സന്ദര്ഭങ്ങളില് നേരിട്ടുള്ള ഇടപെടല് ജനാധിപത്യത്തിലെ പ്രതിപക്ഷത്തിന്റെ പ്രസക്തി ഓര്മിപ്പിക്കുകയും ചെയ്യും. ദേശീയതയെ ചൊല്ലിയുള്ള രാഷ്ട്രീയ വാഗ്വാദത്തില് നിന്ന്, യുവാക്കളുടെ പ്രതിഷേധത്തെ ചര്ച്ചാ വിഷയമാക്കി മാറ്റാന് രാഹുല് ഗാന്ധിക്ക് കഴിഞ്ഞുവെന്നത് ശ്രദ്ധേയമാണ്. രാഷ്ട്രീയ സന്ദേശത്തിനപ്പുറം, ഈ സംഭവത്തിന്റെ യഥാര്ത്ഥ പരീക്ഷണം ഇനി അന്വേഷണത്തിലാണ്.
എന്നാല് എഫ്.ഐ.ആര്. രജിസ്റ്റര് ചെയ്തതോടെ ഉത്തരവാദിത്വം അവസാനിക്കുന്നില്ല. പെല്ലറ്റ് പ്രയോഗത്തിന്റെ സാഹചര്യമെന്ത്, ഉത്തരവിട്ടവരും പ്രയോഗിച്ച ഉദ്യോഗസ്ഥരും ആരൊക്കെ, എന്തുകൊണ്ട് അത്തരം ബലപ്രയോഗം ആവശ്യമായി വന്നു എന്നതും സുതാര്യമായി അന്വേഷിക്കണം. നിയമം എല്ലാവര്ക്കും ഒരുപോലെ ബാധകമാണെന്ന വിശ്വാസം സംരക്ഷിക്കുകയാണ് പ്രധാനം. ഒരു പൗരന് നീതി ലഭിക്കാന് രാഷ്ട്രീയ ശക്തിയുടെ സഹായം തേടേണ്ടിവരുന്ന അവസ്ഥ മാറിയില്ലെങ്കില്, പ്രശ്നം ഒരു പോലീസ് സ്റ്റേഷനില് ഒതുങ്ങുന്നതല്ല;അത് ഭരണഘടനാപരമായ സ്ഥാപനങ്ങളിലുള്ള ജനവിശ്വാസത്തിന്റെ പ്രശ്നമായി മാറും. അന്വേഷണവും നീതിപൂര്വമെല്ലങ്കില് ഇപ്പോഴത്തെ നടപടി പ്രതീകാത്മകമായി മാത്രം ശേഷിക്കും. അതിനാല് പോലീസ് സ്വയം വിശദീകരിക്കേണ്ടതുണ്ട്: പരാതി ലഭിച്ച ദിവസം തന്നെ എഫ്.ഐ.ആര്. എടുക്കാതിരുന്നതിന്റെ കാരണം എന്തായിരുന്നു? ആ ഉത്തരവാദിത്വവും അന്വേഷണത്തിന്റെ ഭാഗമാകണം.
Comments